Da 68. Psalm.
Di Macht Un Hallichkeit Funn Gott
Zumm foah-singah. En Psaltah-Leet fumm Dawfit.
1 Gott shtayt uf, un sei feinda vadda fashtroit;
selli es een hassa fabutza sich fannich eem vekk.
2 Vi shmohk vekk geblohsa is, so dreibt eah si vekk;
vi wax shmelst im feiyah,
so kumma di gottlohsa um fannich Gott.
3 Avvah di gerechta froiya sich,
un sinn fraylich fannich Gott;
si sinn froh un henn grohsi frayt.
4 Singet zu Gott, singet lohb zu sei nohma;
singet en leet zu demm es uf di volka foaht.
Sei nohma is Hah;
froiyet eich fannich eem.
5 Gott is en faddah zu selli unni en faddah,
un en helfah zu di vitt-veivah,
diveil eah in seim heilicha tempel voond.
6 Gott macht en haymet fa selli es zeidlang henn;
eah macht di kfangana frei un helft si goot ab sei.
Avvah selli es geyyich Gott shaffa missa in en drukka land layva.
7 Oh Gott, vo du fannich dei leit heah ganga bisht,
vo du deich di vildahnis gloffa bisht,
(Sela)
8 dann hott di eaht kshiddeld,
un di himla henn reyyah runnah gleaht,
fannich Gott, sellah funn Sinai,
fannich Gott, da Gott funn Israel.
9 Du, oh Gott, hosht gnaydichah reyyah gevvah,
du hosht's land funn dei eahbshaft viddah frish gmacht,
10 so es dei drubb leit drinn voona henn kenna.
Un deich dei goot-maynichkeit, oh Gott,
hosht du acht gevva uf di oahma.
11 Da Hah hott's vatt gevva,
un selli es es vatt gedrawwa henn voah en grohsi drubb.
12 Di kaynicha un iahra greeks-gnechta shpringa fatt,
un di veibsleit dihaym fadayla's sach es gnumma voah.
13 Even fa selli funn eich es an di shohf-penna zrikk geblivva sinn,
hott's dauva flikkel gedekt mitt silvah,
un iahra feddahra mitt sheinich gold.
14 Vo da Awlmechtich di kaynicha ausnannah kshtroit hott,
datt uf em Berg Zalmon is shnay kfalla.
15 En Gottes-berg is da berg funn Basan,
en berg mitt feel hohchi kebb, is da Berg funn Basan.
16 Favass gukket diah berga es feel shpitza henn, mitt fagunsht,
an da berg vo's Gott kfellich is fa voona,
datt vo da Hah voona zayld fa'immah?
17 Di greeks-veyya funn Gott sinn feel dausends un dausends;
da Hah is funn Sinai kumma un is in sei heilichah blatz ganga.
18 Du bisht nuff in di hay kfoahra,
un hosht kfangani mitt dich kfiaht.
Du hosht kshenkah grikt funn mensha,
even funn selli es geyyich dich shaffa,
So es du, Gott da Hah, datt voona kansht.
19 Glohbt sei da Hah, deah vo unsah lasht drawkt alli dawk;
eah is da Gott funn unsah saylichkeit.
(Sela)
20 Unsah Gott is da Gott es uns saylich macht,
eah is da Gott, unsah Hah, es uns fumm doht hald.
21 Avvah Gott zayld di kebb funn sei feinda fabrecha,
di hoahricha kebb funn selli es on gayn in iahra sinda.
22 Da Hah hott ksawt, “Ich zayl si viddah zrikk bringa funn Basan,
ich bring si zrikk fumm deefa say,
23 so es du dei fees bawda kansht im bloot funn dei feinda,
un es di zunga funn dei hund iahra dayl havva kenna.”
24 Alli-ebbah saynd dich lawfa vann du gaysht vi en kaynich, oh Gott,
si sayna mei Gott un Kaynich in da tempel nei gay.
25 Di singah gayn seahsht, un di shpeelah hinna nohch,
in di mitt kumma di mayt am di drumma shlauwa.
26 Lohvet Gott in di fasamling;
preiset da Hah, awl diah leit funn Israel.
27 Da Benjamin, da vennichsht funn eena, gayt fanna heah,
no kumma di evvahshta funn Juda un iahra drubb,
un di evvahshti funn Sebulon un Naphthali.
28 Grikk dei macht zammah, oh Gott,
veis dei graft, oh Gott, es du gvissa hosht fa uns difoah.
29 Deich dei tempel an Jerusalem,
zayla kaynicha kshenkah zu diah bringa.
30 Zank sell diah is um di shtengel im vassah is,
zank di heida, selli drubb bulla mitt iahra kelvah.
Drett selli nunnah es am gukka sinn fa silvah;
fashtroi selli leit es gleicha greek macha.
31 Aus Egypta kumma evvahshti es kshikt sinn,
Ethiopia zayld kshvind iahra hend naus shtrekka zu Gott.
32 Singet zu Gott, oh kaynich-reicha uf di eaht,
singet lohb zumm Hah,
(Sela)
33 zu demm es deich di himla foaht,
dee himla es datt voahra fumm ohfang.
Eah shvetzt mitt en mechtichi shtimm.
34 Gevvet Gott di macht!
Sei hallichkeit is ivvah Israel,
un sei macht is in di volka.
35 Unbegreiflich is Gott in seim heilicha tempel;
da Gott funn Israel gebt macht un graft zu sei leit.
Glohbt sei Gott!