Da 60. Psalm.
En Gebayt In Greeks-Zeida
Zumm foah-singah. Fa ksunga sei zumm leet, “Di Lilya Fumm Zeiknis.” En Psalm fumm Dawfit fa en lanning vo eah kfochta hott mitt di Aramayah funn Mesopotamia un funn Zoba, un vo da Joab zrikk kumma is un hott zvelf dausend Edomiddah nunnah kshlauwa.
1 Oh Gott, du hosht uns vekk kshtohsa un fashtroit;
du voahsht bays mitt uns, nau du uns viddah drayshta.
2 Du hosht's land kshiddeld un's uf kshpalda;
nau hayl em land sei rissa, fa's is am funn-nannah shpalda.
3 Du hosht dei leit gmacht soffahra,
du hosht uns vei gevva zu drinka es uns macht shtaekkahra.
4 Du hosht selli es dich firchta gvand,
so es si vekk kenna fannich em bow.
(Sela)
5 Mitt dei rechtsi hand nemm uns aus di kfoah un heich uns ab,
so es selli es du leeb hosht frei gmacht vadda.
6 Gott hott kshvetzt in sei heilichkeit,
“Mitt fraylichkeit zayl ich Sichem fadayla,
un zayl's Deich funn Sukkoth ausmessa.
7 Gilead is mei, un Manasse is mei;
Ephraim is mei greeks-hoot,
un Juda is mei zeptah.
8 Moab is mei vesh-shissel;
ivvah Edom shmeis ich mei shoo,
ivvah Philishtia greish ich laut veil ich di ivvah-hand habb ivvah si.”
9 Veah zayld mich in di shtatt bringa es feshti vanda hott?
Veah zayld mich zu Edom fiahra?
10 Is es nett dich, oh Gott, deah es uns falossa hott,
un es nimmi naus gayt mitt unsah greeks-gnechta?
11 Gebb uns hilf geyyich unsah feinda,
fa di hilf funn mensha is nix veaht.
12 Mitt Gott zayla miah beeda;
eah drett uf unsah feinda.