Da 50. Psalm.
Gott Deena Mitt Voahheit
En Psalm fumm Asaph.
1 Da Awlmechtich Gott, da Hah, shvetzt,
un rooft di eaht,
fumm blatz es di sunn ufkumd,
biss an da blatz es si unnah gayt.
2 Gott sei hallichkeit sheind raus aus Zion,
di shtatt es drivvah-naus shay is.
3 Unsah Gott kumd, un eah is nett shtill;
feiyah es frest gayt fannich eem heah,
un en grohsah shtoahm is um een rumm.
4 Eah rooft zu di himla ovvich uns,
un zu di eaht, so es eah sei leit richta kann.
5 Eah sawkt, “Geddahret zu miah mei heilichi,
selli es en bund gmacht henn mitt miah deich en opfah.”
6 Di himla sawwa veyyich sei gerechtichkeit,
fa Gott selvaht is da richtah.
(Sela)
7 “Heichet mich ab, mei leit, un losset mich shvetza,
oh Israel, ich zeik geyyich dich,
ich binn Gott, dei Gott.
8 Ich zank dich nett fa dei opfahra,
un dei brand-opfahra sinn immah fannich miah.
9 Ich habb kenn noht fa en bull funn dei sheiyah,
adda fa gays funn dei shtall.
10 Fa alli diah im bush is mei,
un aw's fee uf dausends funn hivla.
11 Ich kenn alli fokkel uf di berga,
un alles es sich faraykt in di feldah is mei.
12 Vann ich hungahrich veah, dayt ich diah's nett sawwa,
fa di veld is mei, un alles es drinn is.
13 Maynsht du es ich's flaysh funn bulla essa vill,
adda's bloot drinka funn gays-bekk?
14 Opfah zu Gott en dank-opfah,
un gebb zumm Alli-Haychshta vass du fashprocha hosht.
15 Roof zu miah vann druvvel kumd,
ich mach dich frei, un du zaylsht mich fagleahra.”
16 Avvah zu di gottlohsa, sawkt Gott,
“Vass fa en recht hosht du fa mei gebodda ausshprecha,
adda fa mei bund in dei maul du?
17 Fa du hasht vass ich diah sawk fa du,
un shmeisht mei vadda hinnich dich.
18 Vann du en deeb saynsht, dann lawfsht du mitt eem,
du haldsht dich uf mitt aybrechah.
19 Du losht dei maul evili sacha shvetza,
un dei zung dreibt falshheit.
20 Du hoksht un shvetsht geyyich dei broodah,
un du shtroisht kshvetzah veyyich dei maemm iahra boo.
21 Du hosht dee sacha gedu un ich habb nix ksawt;
du hosht gmaynd ich binn grawt vi du.
Avvah nau setz ich dich recht,
un layk's aus grawt fannich dei awwa.
22 Nau meik dess, du es Gott fagesht,
eb ich dich in shtikkah fareis,
un's is nimmand fa's fahalda:
23 Sellah es dank uf opfaht,
sellah dutt mich recht eahra,
un sellah es ohhald da recht vayk lawfa,
een loss ich di saylichkeit funn Gott sayna.”