Da 4. Psalm.
En Ohvet Gebayt
En Psalm fumm Dawfit. Zumm foah-singah: fa foah-kshpeeld sei mitt harfa.
1 Gebb andvat zu miah vann ich roof, oh Gott funn mei gerechtichkeit.
Du hosht miah drohsht gevva in meim angsht.
Sei gnaydich zu miah un heich mich ab in meim gebayt.
2 Oh diah mennah, vi lang zayld mei eah in shohm gedrayt vadda?
Vi lang lohvet diah leahri vadda un gaynd leeya nohch?
(Sela)
3 Avvah fagess nett es da Hah da gettlich mensh raus ksetzt hott fa sich selvaht.
Da Hah heaht vann ich een ohroof.
4 In eiyah zann, doond nett sindicha;
In eiyah beddah, seind shtill
un suchet vass in eiyah hatza is.
(Sela)
5 Opfahret gerechti opfahra,
un doond eiyah fadrauwa in da Hah.
6 Feel leit sawwa, “Veah kann uns goodi sacha sayna lossa?”
Loss di helling funn dei ksicht uf uns falla, oh Hah.
7 Du hosht frayt in mei hatz gedu,
may es si henn vann si feel frucht un neiyah vei henn.
8 Ich layk mich anna un shlohf in fridda,
fa du laynich, oh Hah, losht mich voona aus di kfoah.