Da 24. Psalm.
Da Kaynich Funn Hallichkeit
En Psalm fumm Dawfit.
1 Di eaht is em Hah seini,
un alles es drinn is.
Di veld un awl selli es drinn voona sinn sei.
2 Eah hott di eaht gegrund uf em deef vassah fumm say,
un hott si uf di revvahra ksetzt.
3 Veah dauf uf em Hah sei hivvel gay?
Veah dauf in seim heilicha-blatz shtay?
4 Deah es unshuldichi hend un en rein hatz hott;
deah es sei sayl nett ivvah-gebt zu falshheit,
un uneahlich shveaht.
5 Eah zayld en sayya greeya fumm Hah,
un da Gott funn sei saylichkeit gebt eem gerechtichkeit.
6 So sinn selli leit es een sucha,
selli es sucha fa's ksicht fumm Jakob sei Gott.
(Sela)
7 Hayvet eiyah kebb uf, diah doahra,
seind uf kohva, diah doahra funn lang zrikk,
so es da Kaynich funn hallichkeit rei kumma kann.
8 Veah is da Kaynich funn hallichkeit?
Es is da Hah, shteik un mechtich,
da Hah mechtich im greek.
9 Hayvet eiyah kebb uf, diah doahra;
hayvet si uf, diah doahra funn lang zrikk,
so es da Kaynich funn hallichkeit rei kumma kann.
10 Veah is deah Kaynich funn hallichkeit?
Da Hah Awlmechtich—
eah is da Kaynich funn hallichkeit.
(Sela)