Da 21. Psalm.
En Dankboah Gebayt Fa Da Kaynich
En Psalm fumm Dawfit. Zumm foah-singah.
1 Oh Hah, da kaynich froit sich in dei graft;
eah is oahrich froh fa dei hilf.
2 Du hosht eem gevva vass sei hatz falanga hott,
un hosht nett kalda funn eem vass sei leftz kfrohkt henn.
(Sela)
3 Du hosht een ohgedroffa mitt goodi sayya,
un hosht en krohn funn fei gold uf sei kobb ksetzt.
4 Eah hott dich kfrohkt fa layva,
un du hosht eem's gevva,
en lang layva, fa'immah un immah.
5 Sei hallichkeit is grohs deich dei hilf,
du hosht eem hohchi kaynich-eah gevva.
6 Du hosht eem ayvichlich sayya gevva,
du hosht een froh gmacht veil du bei eem voahsht.
7 Da kaynich dutt sei fadrauwa in da Hah,
un deich di bamhatzich leevi fumm Alli-Haychshta
shtayt eah shtandhaftich.
8 Dei hand zayld awl dei feinda finna;
dei rechtsi hand zayld alli-ebbah finna es dich hast.
9 Du machsht si vi en feiyahrichah offa
vann du dich moll veisht.
In seim zann zayld da Hah si ufshlukka;
un feiyah brend si uf.
10 Du zaylsht iahra nohch-kummashaft vekk butza funn di eaht,
un iahra kinnah funn mensha.
11 Si henn im sinn fa evil du geyyich dich,
un henn en shkeem ufkokt,
avvah's zayld nett shaffa.
12 Du machsht si iahra bikkel drayya,
vann du dei gezowwanah bow zeelsht an iahra ksichtah.
13 Hayb dich hohch uf, oh Hah, in dei graft,
miah zayla singa un dei macht lohva.