Da 146. Psalm.
Lohb Zu Gott Fa Sei Hilf
1 Halleluja!
Lohb da Hah, mei sayl.
2 Ich vill da Hah lohva so lang es ich layb,
un lohb singa zu meim Gott so lang es ich do binn.
3 Falosset eich nett uf di evvahshta;
si sinn yusht mensha, un kenna eich nett helfa.
4 Vann iahra geisht si falost, dann vadda si viddah eaht,
uf sellah dawk drayt alles zu nix es si im sinn henn zu du.
5 Ksaykend is sellah es sei hilf grikt fumm Jakob sei Gott,
sellah es sich falost uf da Hah, sei Gott,
6 deah es da himmel, di eaht un da say gmacht hott,
un alles es drinn is;
deah vo shtandhaftich is fa'immah,
7 deah es recht dutt zu selli es nunnah gedredda sinn,
un gebt ess-sach zu di hungahricha.
Da Hah macht di kfangana frei.
8 Da Hah macht di blinda sayna.
Da Hah haybt selli uf es nunnah gebohwa sinn,
da Hah leebt di gerechta.
9 Da Hah vatsht ivvah di fremda;
eah gebt acht uf di kinnah unni eldra un di vitt-veivah,
avvah da vayk funn di gottlohsa bringd eah zu nix.
10 Da Hah is kaynich fa'immah,
dei Gott, oh Zion, roold ayvichlich.
Halleluja!