Da 141. Psalm.
En Gebayt Fa Frei Kalda Sei Funn Evil
En Psalm fumm Dawfit.
1 Oh Hah, ich roof zu diah, kumm kshvind zu miah,
heah mei shtimm vann ich dich roof.
2 Loss mei gebayt gnumma sei es vi insens,
un mei ufkohvani hend es vi en ohvet-opfah.
3 Setz en heedah ivvah mei maul, oh Hah,
vatsh ivvah di deah funn mei leftz.
4 Hald mei hatz funn gedrayt sei zu evil,
so es ich kenn dayl habb in gottlohsi sacha
mitt mennah es evil shaffa.
Loss mich nett essa vass si gleicha essa.
5 Loss en gerechtah mann mich freindlich shlauwa, un mich recht setza veil eah's goot maynd.
Loss een mich zanka; es is vi ayl uf mei kobb leahra,
un mei kobb soll sich nett veahra digeyya.
Doch ich bayt di gans zeit geyyich di ungerechta iahra verka.
6 Vann di ungerechta iahra roolahs
moll runnah kshmissa vadda funn di felsa-vanda,
no lanna leit vi recht es mei vadda voahra.
7 Vi ebbah blookt un di eaht uf brecht,
so vatt's grawb uf gmacht un iahra gnocha vadda fashtroit datt.
8 Avvah mei awwa sinn uf diah, Awlmechtichah Hah,
ich du mei drauwa in dich;
dray mei sayl nett ivvah zumm doht.
9 Hald mich aus di fall es si ksetzt henn fa mich,
funn di fang-shtrikk funn evil-shaffah.
10 Loss di gottlohsa in iahra aykni nets falla,
diveil es ich haus kalda binn.