Da 108. Psalm.
En Gebayt Zu Gott Fa Hilf
En Psaltah-Leet fumm Dawfit.
1 Mei hatz is shtandhaftich, oh Gott,
ich zayl singa un dich lohva.
Vekk uf, mei sayl!
2 Vekk uf, psaltah un harf!
Ich zayl ufvekka eb dawk.
3 Ich zayl dich danka, oh Hah, unnich di leit;
ich zayl diah lohb singa unnich di heida.
4 Fa dei shtandhaftichi-leevi langd nuff ovvich da himmel,
un dei voahheit biss an di volka.
5 Hayb dich uf ovvich da himmel, oh Gott,
loss dei hallichkeit ivvah di gans eaht sei.
6 Mitt dei rechtsi hand nemm uns aus di kfoah un gebb miah andvat,
so es selli es du leeb hosht frei gmacht vadda.
7 Gott hott kshvetzt in seim heilichah blatz:
“Mitt fraylichkeit zayl ich Sichem fadayla
un zayl Tal Sukkoth abmessa.
8 Gilead is mei, un Manasse is mei,
Ephraim is mei greeks-hoot,
un Juda is mei zeptah.
9 Moab is mei vesh-shissel,
ivvah Edom shmeis ich mei shoo,
ivvah's land Philishtia greish ich laut, veil ich di ivvah-hand habb ivvah's.”
10 Veah fiaht mich zu di shtatt es shteiki mavvahra hott?
Veah fiaht mich zu Edom?
11 Is es nett dich, oh Gott, es uns falossa hott,
un es nimmi naus gayt mitt unsah greeks-gnechta?
12 Gebb uns hilf geyyich unsah feinda,
fa di hilf fumm mensh is nix veaht.
13 Mitt Gott zayla miah beeda,
eah drett uf unsah feinda.