Es 3. Gabiddel.
Da Micha Pshuldicht Di Foah-Gengah Un Brofayda
1 No habb ich ksawt,
“Heichet moll diah foah-gengah funn Jakob,
diah es di roolahs sinn im Haus funn Israel.
Seddet diah nett vissa vass recht is?
2 Diah hasset vass recht is un leevet evil,
diah zeeyet di haut ab funn mei leit,
un reiset's flaysh funn iahra gnocha.
3 Diah esset's flaysh funn mei leit,
diah shtribbet iahra haut ab
un fabrechet iahra gnocha.
Diah hakket si uf es vi flaysh fa di pann,
vi flaysh fa da kessel.”
4 No zayla si naus roofa zumm Hah,
avvah eah gebt eena kenn andvat.
An selli zeit zayld eah sei ksicht fashtekla funn eena,
veil si evil gedu henn.
5 Dess is vass da Hah sawkt veyyich di brofayda
es mei leit letz fiahra:
“Vann ebbah si feedaht,
dann fashprecha si eem fridda.
Avvah vann eah si nett feedaht,
dann rishta si fa greek macha geyyich een.
6 Fasell zayld di nacht ivvah eich kumma,
un diah greeyet kenn visions,
di finshtahnis kumd unni ennich voah-sawwes.
Di sunn zayld unnah gay fa di brofayda,
un da dawk vatt dunkel fa si.
7 Di foah-sayyah zayla sich shemma,
un di voah-sawwah vadda fashpott.
Si zayla iahra meilah zu dekka,
veil si kenn andvat greeya funn Gott.”
8 Avvah fa mich, ich binn foll graft,
foll mitt em Geisht fumm Hah.
Ich binn foll graft un eahnshtlich es recht gricht vatt,
so es ich raus bringa kann zumm Jakob veyyich sei ivvah-dreddes,
un zu Israel veyyich iahra sind.
9 Nau heichet dess, diah foah-gengah fumm Jakob sei haus,
diah roolahs fumm Israel sei haus,
diah es eahlich richtes hasset,
un fadrayyet vass goot un recht is.
10 Diah hend Zion gebaut bei bloot fageesa,
un Jerusalem mitt eiyah ungerechtichkeit.
11 Iahra evvahshti nemma geld hinna rumm,
iahra preeshtah vadda betzawld fa leit lanna,
un iahra brofayda broffetzeiya fa geld.
Avvah doch falossa si sich uf da Hah un sawwa,
“Is da Hah nett unnich uns?
Nix shlechtes zayld uf uns kumma.”
12 Fasell, deich eich,
zayld Zion geblookt vadda vi en feld;
Jerusalem zayld en shtay haufa vadda,
un da tempel hivvel vatt ivvah-gvaxa mitt veetz.