Es 10. Gabiddel.
Abgettah Un Da Levendich Gott
1 Heichet ab vass da Hah sawkt zu eich, diah fumm haus funn Israel.
2 Dess is vass da Hah sawkt:
“Diah sellet nett di heida iahra vayya lanna,
adda eich feicha veyyich di zaycha im himmel,
so vi di heida sich feicha.
3 Da vayk vi di heida iahra abgettah deena is nix veaht;
si hakka en bohm nunnah im bush,
un da shreinah macht en gleichnis mitt en ax.
4 Si zeeya's ivvah mitt silvah un gold,
si macha's fesht mitt en hammah un nekkel,
so es es nett um fald.
5 Vi en butzamann fa fekkel fatt yawwa im goahra,
iahra abgettah kenna nett shvetza;
si missa gedrawwa sei,
veil si nett lawfa kenna.
Feichet eich nett veyyich eena;
si kenna eich kenn shawda du,
un si kenna aw nix goodes du.”
6 Oh Hah, es is nimmand vi dich;
du bisht grohs,
un dei nohma is grohs un mechtich.
7 Veah soll dich nett firchta,
oh Kaynich funn di heida?
Du bisht's veaht.
Unnich awl di heida iahra mennah mitt veisheit,
un unnich awl iahra kaynich-reicha,
hott's nimmand vi dich.
8 Si sinn awl dumm un nett ksheit,
iahra holsichi abgettah kenna si nix lanna.
9 Blech gmacht funn silvah vatt bei gebrocht funn Tharsis,
un gold funn Uphas.
Vass da shreinah un da gold-shmitt gmacht henn,
is no ivvah-gezowwa mitt en bloh un purpel glayt.
Awl dee abgettah sinn gmacht bei gegawbdi mensha.
10 Avvah da Hah is da recht Gott;
eah is da levendich Gott, un da ayvich Kaynich.
Vann eah bays vatt, dann shiddeld di eaht;
di heida kenna sei zann nett shtenda.
11 “Du solsht dess sawwa zu eena: ‘Dee gettah es da himmel un di eaht nett gmacht henn, zayla folshtendich zu nix gmacht vadda uf di eaht un unnich em himmel.’ ”
12 Gott hott di eaht gmacht mitt sei graft;
eah hott di veld gmacht deich sei veisheit,
un di himla deich sei fashtand.
13 Vann sei shtimm shvetzt,
dann doon di vassahra ovvich em himmel roahra;
eah macht di volka uf kumma fumm end funn di eaht.
Eah shikt gviddah mitt em reyya,
un bringd da vind aus sei shtoah-heisah.
14 Alli-ebbah is dumm un vayst nix,
da gold-shmitt muss sich shemma mitt sei abgettah.
Sei gleichnisa sinn falsh,
un henn kenn layva in sich.
15 Si sinn nix veaht un sedda fashpott vadda;
vann si moll gricht vadda, gayn si folshtendich zu nix.
16 Da Gott fumm Jakob is nett vi dee;
eah is sellah es alles kshaffa hott,
un eah hott's kshlecht funn Israel,
sei aykni leit gmacht.
Sei nohma is da Awlmechtich Hah!
Di Leit Vadda Vekk Gnumma
17 Geddahret eiyah shtoft zammah fa's land falossa,
diah es umringd sinn bei heida.
18 Fa dess is vass da Hah sawkt:
“An deahra zeit zayl ich eich naus shmeisa,
diah es im land voonet.
Ich zayl eich angsht gevva
so es diah's kshpiahret.”
19 Di leit funn Jerusalem greisha naus,
“Miah sinn veesht vay gedu,
un dess kann nett kayld sei.”
Avvah miah henn ksawt,
“Dess is unsah granket, un miah missa's ohnemma.”
20 Unsah tents sinn fadauva;
di shtrikk sinn farissa.
Unsah kinnah sinn awl fatt ganga.
'Sis nimmand ivvahrich fa unsah tents viddah uf du,
un fa di curtains viddah ufhenka.
21 Unsah shohf-heedah sinn nett ksheit vadda,
un henn da Hah nett kfrohkt;
fasell is nix recht ganga fa si,
un iahra gansi drubb is ausnannah kshtroit.
22 Heichet, en yacht is am kumma,
en grohsi ufruah fumm land funn di natt!
Dess zayld di shtett funn Juda fadauva un leah macha,
en leahrah blatz vo vildi hund bleiva.
Em Jeremia Sei Gebayt
23 Ich vays, oh Hah, es em mensh sei layva
nett in sei aykni hend is;
'sis nett een es ausmacht vi eah lawfa sett.
24 Shtrohf mich, Hah, avvah yusht vass recht is,
nett in deim zann,
adda sell veah's end funn miah.
25 Leah dei zann aus uf di heida,
selli es dich nett kenna,
uf di leit es dei nohma nett ohbayda.
Fa si henn da Jakob ufkfressa;
si henn een folshtendich ufkfressa,
un henn sei haymet un land fadauva.