Es 32. Gabiddel.
Da Elihu Shvetzt Nau
1 No henn dee drei mennah ufkeaht andvat gevva zumm Hiob, veil eah sich selvaht gerecht kaysa hott.
2 Avvah da Elihu is vundahboah bays vadda ivvah da Hiob, veil eah sich gerecht kohva hott un nett Gott. Da Elihu voah em Baracheel funn Bus sei boo es fumm kshlecht Ram voah.
3 Eah voah aw bays ivvah di drei freind veil si kenn goodah andvat kfunna henn fa da Hiob, avvah henn een doch fadamd.
4 Da Elihu hott gvoaht fa shvetza zumm Hiob veil si eldah voahra es eah.
5 Vo eah ksenna hott es di drei mennah nix may katt henn zu sawwa, hott sei zann hays gebrend.
6 So hott da Elihu, em Baracheel funn Bus sei boo, ksawt,
“Ich binn yung in yoahra, un diah sind ald;
fasell habb ich mich kfeicht eich sawwa vass ich denk.
7 Ich habb gmaynd di eldra sedda shvetza,
diah es hohch sind in yoahra seddet veisheit veisa.
8 Avvah's is da geisht im mensh,
un da ohften fumm Awlmechticha es em mensh fashtand gebt.
9 'Sis nett yusht di alda es veisheit henn,
adda di alda es vissa vass recht is.
10 So nau vill ich havva es diah mich abheichet,
losset mich sawwa vass ich denk.
11 Ich habb gvoaht diveil es diah kshvetzt hend,
ich habb abkeicht zu vass diah gmaynd hend,
diveil es diah ksucht hend vi's zu sawwa.
12 Ich habb eich goot abkeicht,
avvah kens funn eich hott gvissa es da Hiob letz voah,
diah hend kenn andvat katt fa sei vadda.
13 Sawwet nett, ‘Miah henn veisheit kfunna;
Gott muss eem andvat gevva, nett da mensh.’
14 Da Hiob hott sei vadda nett kshvetzt geyyich mich,
un ich gebb eem nett andvat vi diah hend.
Da Elihu Shvetzt Zumm Job
15 Si sinn engshtlich, un henn nix may zu sawwa,
iahra vadda voahra kenn andvat zu eem.
16 Soll ich voahra, veil si nimmi shvetza,
veil si shtobba un kenn andvat henn?
17 Ich zayl aw sawwa vass ich mayn,
ich zayl aw mei andvat gevva.
18 Ich binn foll vadda,
da geisht in miah macht mich shvetza.
19 Innahlich binn ich vi en vei-boddel mitt en shtobbah,
vi en leddah vei-sakk yusht ball am ufblohsa.
20 Ich muss shvetza un ablawda,
ich muss mei leftz uf macha un andvat gevva.
21 Ich zayl kenn seit nemma in demm,
un ich zayl kenn mensh ohshmaychla.
22 Ich vays nett vi zu ohshmaychla,
adda dann dayt mei Sheffah mich vekk nemma.”