Es 28. Gabiddel.
1 “Es hott bletz vo silvah gegrawva is,
un bletz vo gold kshmolsa vatt.
2 Eisa vatt aus di eaht gnumma,
un kubbah vatt aus di shtay kshmolsa.
3 Mennah nemma lichtah in di dunkla bletz;
si sucha in di deefshta lechah fa keshtlichi shtay,
drunna vo's oahrich dunkel is.
4 Si grawva lechah veit vekk funn leit,
in bletz vo leit iahra fees nett lawfa;
si henka un shvinga funn shtrikk, un grawva di shtay raus.
5 Ovva uf di eaht dutt ess-sach vaxa,
avvah unna drunnah vatt alles ivvah-gedrayt es vi mitt feiyah.
6 Sapphires kumma funn shtay,
un da shtawb hott gold drinn.
7 Da voi in di luft vayst nett vo selli bletz sinn,
em awdlah sei awk hott si nett ksenna.
8 Shtolsi diahra lawfa nett drivvah,
un da layb gayt nett datt fabei.
9 Da mann grawbt da flint-shtay,
un drayt da grund ivvah unna an di berga.
10 Eah grawbt lechah deich di felsa,
un sei awwa sayna awl's keshtlich sach.
11 Eah damd di revvahra uf es si nett lawfa,
un vass fashtekkeld is bringd eah raus in's licht.
12 Avvah vo kann veisheit kfunna sei?
Vo kenna miah lanna fa fashtay?
13 Da mensh fashtayt nett vass veisheit veaht is,
un veisheit vatt nett kfunna im land funn di levendicha.
14 'S deefa sawkt, ‘See is nett in miah,’
un da say sawkt, ‘See is nett mitt miah.’
15 See kann nett gekawft sei mitt em beshta gold,
un genunk silvah kann nett raus gvohwa sei difoah.
16 See kann nett gekawft sei mitt em gold funn Ophir,
adda mitt keshtlich onyx un sapphires.
17 Gold un sheinich glaws kann ma nett fagleicha mitt iahra,
un ma kann see nett fahandla fa goldichi sacha.
18 Coral un crystal is nett diveaht shvetza diveyya;
veah veisheit grikt, hott may es keshtlichi pearls.
19 Topaz aus em land Kush is di veisheit nett gleich,
un see kann nett gekawft sei mitt pyuah gold.
20 Dann vo kumd di veisheit bei?
Vo kenna miah lanna fa fashtay?
21 See is fashtekkeld funn di awwa funn alles levendiches,
even funn di fekkel in di luft.
22 Di fadeahvung un's grawb sawwa,
‘Unsah oahra henn shund keaht difunn.’
23 Gott fashtayt di veisheit iahra vayk,
eah laynich vayst vo see bleibt.
24 Eah kann's end funn di eaht sayna,
eah saynd alles unnich em himmel.
25 Vo eah em vind sei macht gevva hott,
un di vassahra raus gmessa hott,
26 vo eah ausgmacht hott vo da reyyah falla soll,
un en pawt gmacht hott fa da gviddah-shtoahm,
27 no hott eah di veisheit ksenna un see ivvah-gegukt,
eah hott see eiksetzt un see ausbroviaht.
28 Un zumm mensh hott eah ksawt,
‘Gukk moll, di furcht fumm Hah, sell is veisheit,
un fa sich vekk halda funn evil, sell is fashtendes.’ ”