Es 25. Gabiddel.
Da Bildad Shvetzt
1 No hott da Bildad funn Suah andvat gevva un ksawt,
2 “Gott is awlmechtich un leit missa een firchta,
eah macht fridda im haychshta himmel.
3 Kenna sei greeks-gnechta gezayld sei?
Un uf veah dutt sei helling nett sheina?
4 Vee, dann, kann en mann gerecht sei fannich Gott?
Vee kann ebbah rein sei es geboahra is zu en veibsmensh.
5 Even da moon sheind nett hell,
un di shtanna sinn nett rein in sei awwa,
6 vi feel vennichah da mensh, es is vi veahm aus mukka,
un en mensha-kind, es yusht is vi en voahm.”