Es 23. Gabiddel.
Da Hiob Shvetzt
1 No hott da Hiob ksawt,
2 “Heit is mei glawk alsnoch biddah;
sei hand is shveah uf miah even vann ich mich fayammahra du.
3 Vann ich yusht vist vo een zu finna,
un zu sei shtool kumma kend.
4 No kend ich mei seit funn di sach auslayya zu eem,
un eem's veisa mitt mei maul.
5 Ich kend no ausfinna vass eah miah andvadda dayt,
un fashtay vass eah zu sawwa hott zu miah.
6 Dayt eah awl sei macht yoosa geyyich mich?
Nay, eah dayt mich abheicha.
7 Datt kann en ufrichtichah mensh sei sach fannich een du,
un ich dayt fa'immah frei vadda funn mei richtah.
8 Avvah vann ich fassich gay, dann is eah nett datt,
vann ich hinnahsich gay, kann ich een nett finna.
9 Vann eah shaft uf di lings seit, kann ich een nett sayna,
un vann eah rechts drayt, kann ich een nett fameika.
10 Avvah eah vayst da vayk es ich gay;
vann eah mich moll broviaht hott, dann kumm ich raus vi pyuah gold.
11 Ich habb mei foos grawt in sei pawt kalda;
ich habb sei vayk kalda un binn nett vekk gedrayt.
12 Ich habb's gebott funn sei leftz nett ivvah-gedredda;
di vadda funn sei maul sinn may keshtlich zu miah es ess-sach.
13 Avvah eah shtayt laynich; veah kann geyyich een gay?
Eah dutt vass eah vill.
14 Eah drawkt aus vass eah auskshprocha hott veyyich miah,
un feel so sacha es noch in sei meind sinn.
15 Sell is favass es ich oahrich engshtlich binn fannich eem,
vann ich ivvah dess denk, feich ich mich veyyich eem.
16 Gott hott mei hatz shvach gmacht;
da Awlmechtich hott mich fagelshtaht.
17 Avvah doch binn ich nett shtill gmacht beim dunkla,
un aw nett veil's dunkla mei ksicht zu dekt.”