Es 21. Gabiddel.
Da Hiob Shvetzt
1 No hott da Hiob ksawt,
2 “Heichet mich goot ab,
sell is da aynsisht drohsht es ich frohk funn eich.
3 Sind geduldich mitt miah diveil es ich shvetz,
un vann ich faddich binn, kennet diah shpodda.
4 Is mei glawk geyyich mensha?
Favass sett ich nett ungeduldich sei?
5 Gukket an mich un seind fashtaund,
doond eiyah hand ivvah eiyah maul.
6 Vann ich an dess denk, is es miah angsht,
un ich fang oh ziddahra.
7 Favass halda di gottlohsa oh layva,
vadda ald un vadda mechtich mitt graft?
8 Iahra kinnah sinn um si rumm,
un iahra nohch-kummashaft is bei eena.
9 Iahra haymeda sinn sayf un unni furcht,
un Gott dutt si nett shtrohfa mitt sei shtekka.
10 Alli-mohl es iahra bulla un kee zammah gedu sinn, vadda di kee drawwich,
un iahra kelvah kumma nett eb zeit.
11 Iahra kinnah shpeela vi lemmah in en drubb shohf;
iahra glenni shpringa rumm heah.
12 Si singa mitt di tambourines un harfa,
un dansa diveil es di flute shpeeld.
13 Dee leit iahra layva is goot biss si ald vadda,
un in fridda gayn si nunnah in's grawb.
14 Avvah doch sawwa si zu Gott, ‘Loss uns gay!
miah vella dei vayya nett vissa.
15 Veah is da Awlmechtich, es miah een deena sedda?
Vass goot veah's zu uns fa bayda zu eem?’
16 Nau heichet moll, dee leit mayna si macha sich selvaht goot ab,
avvah ich nemm nett oh vass dee gottlohsi leit sawwa.
17 Vee oft vatt's licht funn di gottlohsa ausgmacht?
Vee oft kumd unglikk uf si?
Hott Gott selayva di ungettlicha kshtrohft in sei zann,
18 un si vekk geblohsa vi shtroh im vind,
adda vi shprau es fatt gedrawwa vatt im shtoahm?
19 Diah glawvet es Gott en kind shtrohft fa di sinda funn sei daett.
Nay! Loss Gott di sindah selvaht shtrohfa,
so es si vissa es es is fa iahra sinda.
20 Loss si iahra shtrohf sayna mitt iahra aykni awwa,
loss si selvaht da zann fumm Awlmechticha drinka.
21 Vass gevva si drumm vass es gebt mitt iahra kinnah noch eena,
vann moll awl di moonada es eena gevva voahra abkshnidda sinn.
22 Kann ennich ebbah Gott veisheit lanna,
siddah es eah even di haychshta richt?
23 Ay-ebbah shteahbt diveil es eah noch frish un ksund is,
eah brauch sich nett bekimmahra un sich nett feicha.
24 Sei millich-aymah is foll millich,
un sei gnocha sinn nett ufgedrikkeld.
25 Avvah ebbah shunsht shteahbt mitt en bedreebdi sayl,
un hott nee kenn goot layva fasucht.
26 Avvah si leiya awl zvay nayvich nannah im grund,
un di veahm dekka si zu.
27 Gukk moll, ich vays eiyah gedanka,
un eiyah shkeems fa miah letz du.
28 Diah frohwet, vo is es haus fumm grohsa mann,
un da tent vo di gottlohsa voona?
29 Hend diah nee nett selli kfrohkt es rumm heah gayn,
un iahra zeiknis ohgnumma es si zrikk bringa?
30 Si sawwa es da evil mann vatt nett kshtrohft,
es eah vatt vekk kfiaht uf em dawk funn zann.
31 Veah sawkt eem in's ksicht vass eah fadeend hott?
Veah betzawld een zrikk fa vass eah gedu hott?
32 Diveil es eah in da grawb-hohf gedrawwa vatt,
doon leit ivvah sei grawb vatsha.
33 Di sholla fumm grawb sinn sees zu eem;
alli-ebbah in di leicht kumd eem nohch,
un feel leit gayn fanna heah.
34 So vi kennet diah mich drayshta mitt eiyah dummi vadda?
Nix funn eiyah kshvetz is ivvahrich es yusht falshheit.”