Es 18. Gabiddel.
Da Bildad Shvetzt
1 No hott da Bildad funn Suah ksawt,
2 “Vee lang zaylsht du vadda macha?
Grikk eisicht, no kenna miah shvetza.
3 Favass sinn miah ohksenna es vi fee,
un sinn gnumma es leah-kebbich in dei awwa?
4 Du dusht dich yusht selvaht vay mitt deim zann.
Soll di eaht falossa sei fa dei sayk?
Sella di shtay aus iahra blatz gnumma sei?
5 Es licht fumm gottlohsa gayt aus,
di flamm funn sei feiyah gebt kenn helling.
6 Es licht in sei tent vatt dunkel,
un's licht ovvich eem gayt aus.
7 Sei greftichah shritt vatt katzah,
un sei ayknah roht macht een falla.
8 Sei shritt shmeist een in's net,
un sei fees vadda kfanga bei di shtrikk.
9 En fall fangd een bei sei heel,
un's net haybt een fesht.
10 Da shtrikk is fashtekkeld fa een im grund,
un di fall is in sei pawt.
11 Alles um een rumm fagelshtaht een mitt angsht,
un dess gayt eem nohch mitt alli shritt.
12 Sei grefta vadda vennichah mitt hungah,
shreklichi sacha sinn am voahra fa een falla macha.
13 Grankheit fazeaht sei haut,
un's eahsht-geboahra fumm doht frest sei eahm un bay.
14 Da sayf roo funn seim tent vatt eem vekk gnumma,
un eah vatt zumm kaynich funn angsht gnumma.
15 In seim tent is nix es zu eem heaht,
un shvevvel vatt ausnannah kshtroit drinn rumm.
16 Sei vatzla fadrikla unna drunnah,
un sei nesht favelka ovva droh.
17 Sei ohdenkes vatt fagessa uf di eaht,
un eah hott kenn nohma im land.
18 Eah is fumm licht in's dunkla gedrivva,
un is vekk gedrivva funn di leit in di veld.
19 Eah hott kenn nohch-kummashaft unnich sei leit,
nimmand is ivvahrich funn sei haymet vo eah glaybt hott.
20 Awl selli funn di east biss zu di west
zayla heahra vass gevva hott mitt eem,
un si zayla sich oahrich fashtauna.
21 Dess is geviss vass gebt mitt selli es ungettlich sinn,
mitt selli es Gott nett achta.”