Es 13. Gabiddel.
1 “Mei awwa henn awl dess ksenna;
mei oahra henn's keaht un's fashtanna.
2 Vass diah visset, vays ich aw;
ich binn nett vennichah es diah.
3 Avvah ich dayt gleicha shvetza zumm Awlmechticha,
un eem veisa es ich unshuldich binn.
4 Avvah diah dekket alles zu mitt leeya;
diah sind awl doktah es nix veaht sinn.
5 Ich vott diah veahret awl shtill;
sell dayt eiyah veisheit veisa.
6 Heichet ab vass ich zu sawwa habb,
un meiket di sacha es ich shvetz diveyya.
7 Shvetzet diah fa Gott mitt falshheit;
maynet diah es diah am shvetza sind fa Gott mitt leeya?
8 Zayla diah eich kfellich macha zu Gott,
zaylet diah sei lawyah sei?
9 Dayt's goot ausdrayya fa eich vann eah eich unnah-sucha dayt?
Kendet diah een fafiahra vi mensha fafiaht sei kenna?
10 Eah dutt geviss eich zanka
vann diah ayseidich sind hinna rumm.
11 Dayt nett sei hallichkeit eich fagelshtahra?
Dayt nett da angsht funn eem uf eich falla?
12 Eiyah aldi shpricha sinn vi esh,
eiyah vadda sinn so shvach es vi ebbes gmacht funn clay.
13 Seind shtill un losset mich shvetza,
es mawk ivvah mich kumma vass vill.
14 Favass nemm ich mei flaysh zvishich mei zay,
un nemm mei layva in mei hend?
15 Even vann eah mich doht macht,
doch doon ich mei hofning in een,
un zayl mei vayk fa'andvadda fannich sei ksicht.
16 Yau, dess zayld mich frei macha,
veil kenn gottlohsah mensh drauwa dayt fannich een kumma.
17 Heichet goot ab zu mei vadda,
un losset eiyah oahra einemma vass ich sawk.
18 Saynet nau, ich habb alles pinklich zammah gedu fa mei seit veisa;
ich vays es Gott mich unshuldich finna zayld.
19 Kann ennich ebbah ebbes geyyich mich finna?
Vann's kann, dann binn ich shtill un shteahb.
20 Avvah gebb miah yusht dee zvay sacha,
no doon ich mich nett fashtekla funn diah.
21 Nemm dei hand ab funn miah,
un heah uf mich fagelshtahra un mich engshtlich macha.
22 No roof mich un ich gebb diah andvat,
adda loss mich shvetza, un du gebsht miah andvat.
23 Vee grohs sinn mei shulda un mei sinda?
Veis miah mei sind un vo ich ivvah-gedredda habb.
24 Favass fashtekkelsht du dei ksicht,
un haldsht mich es dei feind?
25 Machsht du en geblohsani lawb-blatt ziddahra?
Adda gaysht du em drukka shprau nohch?
26 Fa du shreibsht biddah sach nunnah geyyich mich,
un machsht mich mei sinda funn yungem uf eahva.
27 Du bindsht mei fees mitt kedda,
un vatsht awl mei pawda,
bei dei awwa uf di foos-dabba funn mei fees halda.
28 Fasell binn ich am fagay vi en fafauld ding,
vi en shtikk glaydah es fafressa is bei di shawva.”