Es 8. Gabiddel.
Israel Iahra Shtrohf
1 “Doond's blohs-hann zu eiyah leftz!
Da feind kumd ivvah's haus fumm Hah
vi en awdlah,
veil si mei bund gebrocha henn,
un sich geyyich mei ksetz kshteld henn.
2 Israel rooft naus zu miah,
‘Du bisht mei Gott, miah in Israel kenna dich!’
3 Avvah Israel hott nunnah gedrayt vass goot is;
da feind zayld eem nohch kumma.
4 Di leit henn kaynicha gmacht unni mich,
si henn evvahshti eiksetzt
unni mich frohwa.
Mitt iahra silvah un gold
macha si sich abgettah,
un shneida sich selvaht ab.
5 Shmeis dei abgott-kalb naus, oh Samaria!
Mei zann brend geyyich si.
Vi lang zayld's ummeeklich sei es si rein vadda?
6 Dess kalb is aus Israel kumma,
en shaff-mann hott's gmacht,
es is nett Gott.
So zayld dess kalb funn Samaria
in shtikkah fabrocha sei.
7 Si sayya da vind
un eahnda en vind-veahvel.
Iahra frucht im feld grikt kenn kebb,
un's macht kenn mayl.
Un vann's frucht gevva dayt,
dann dayda di fremda's essa.
8 Israel is uf kshlukt bei di heida,
see vatt rumm gedrawwa bei eena,
vi en shtikk ksha es nimmand vill.
9 Si sinn nuff an Assur ganga
vi en vildah aysel am laynich rumm lawfa.
Ephraim hott sich fakawft
fa di leevi es kumd funn huahrahrei.
10 Even vann si sich fakawft henn
unnich di heida,
doch zayl ich si nau zammah samla.
No zayla si ohfanga zu nix gay,
unnich di lasht es da mechtich kaynich uf si dutt.
11 Ephraim hott sich feel awldahra gmacht fa sind-opfahra,
avvah si sinn awldahra vadda fa sindicha.
12 Ich habb eena feel gebodda kshrivva funn meim ksetz,
avvah si henn si gacht vi ebbes fremdes.
13 Si macha feel opfahra zu miah
un essa's flaysh,
avvah si sinn em Hah nett kfellich.
Nau zayld eah an iahra ungettlichkeit denka,
un si shtrohfa fa iahra sinda;
si zayla viddah zrikk zu Egypta gay.
14 Israel hott fagessa veah een gmacht hott,
un hott kaynich-heisah gebaut;
un Juda hott feel eigmavvahdi shtett gmacht.
Avvah ich zayl feiyah uf iahra shtett shikka,
so es iahra grohsi heisah fabrenna.”