Es 6. Gabiddel.
Gott Vill Havva Es Si Boos Doon
1 “Kummet, vella zrikk zumm Hah gay.
Eah hott uns in shtikkah grissa,
avvah eah zayld uns hayla;
eah hott uns vay gedu,
avvah eah bind's viddah zu.
2 Noch zvay dawk macht eah uns levendich,
un uf em dridda dawk viddah uf shtay,
so es miah fannich eem layva kenna.
3 Vella fleisich sei un da Hah bekenna;
so shuah es di sunn ufkumd
zayld eah sich veisa;
eah kumd zu uns vi da vindah reyyah,
un vi da free-yoah reyyah es di eaht vessaht.”
Em Hah Sei Andvat
4 “Vass soll ich du mitt diah, Ephraim?
Vass soll ich du mitt diah, Juda?
Eiyah leevi is vi da meiya-nevvel,
vi da meiya-dau es fagayt.
5 Fasell habb ich eich fahakt mitt mei brofayda,
ich habb eich umgebrocht mitt di vadda funn mei maul;
mei gericht is uf eich kumma vi licht.
6 Fa ich gukk fa bamhatzichkeit, nett fa opfahra,
un es leit Gott bekenna,
leevah es brand-opfahra.
7 Si henn's bund ivvah-gedredda vi mennah,
un so vi datt, henn si geyyich mich kshaft.
8 Gilead is en shtatt foll ivvah-dreddah,
un foll bloodichi kshpuahra.
9 Vi rawvah am voahra,
sinn di preeshtah;
si maddahra leit uf em vayk noch Sichem,
un doon shandlichi sacha.
10 Ich habb grauslichi sacha ksenna,
im haus funn Israel.
Ephraim dreibt huahrahrei
un Israel is unrein.
11 Un aw fa dich, Juda,
is en eahn ausgevva,
vann ich moll mei leit frei mach.”