Es 33. Gabiddel.
Da Mosi Saykend Di Israeliddah
1 Dess is da sayya es da Mosi, da mann funn Gott, gevva hott zu di Kinnah-Israel eb eah kshtauva is,
2 Eah hott ksawt,
“Da Hah is funn Sinai kumma,
un is uf kumma ivvah si funn Seir vi di sunn;
eah hott raus ksheind fumm Berg Pharan.
Eah is kumma mitt dausends funn heilichi,
un en feiyahrich ksetz voah an sei rechtsi hand.
3 Du hosht geviss di leit so oahrich leeb;
awl di heilichi sinn in dei hend;
si bikka sich nunnah an dei fees,
un lanna funn dei vadda.
4 Da Mosi hott uns es ksetz gevva,
di eahbshaft fa di fasamling fumm Jakob.
5 Eah voah da kaynich funn Jesurun,
vo di evvahshti funn di leit sich fasammeld henn,
mitt di shtamma funn Israel.
6 Da Ruben soll layva un nett shtauva,
un sei mennah sella nett vennich sei.”
7 Un veyyich em Juda hott eah ksawt,
“Oh Hah, heich di shtimm fumm Juda ab,
un bring een zrikk zu sei leit.
Mach sei hend shteik,
un helf eem geyyich sei feinda shtay.”
8 Veyyich em Levi hott eah ksawt,
“Dei Thummim un Urim heahra
zu dei gerechtah.
Du hosht een fasucht an Massa,
un hosht kshtreit mitt eem an di vassahra Meribah.
9 Eah hott ksawt veyyich sei maemm un daett,
‘Si mayna nix zu miah.’
Eah hott nix um sei breedah gevva,
un hott sei kinnah nett gacht.
Avvah eah hott dei vatt keicht,
un hott dei bund kalda.
10 Di Lefiddah zayla em Jakob dei adninga lanna,
un dei ksetz zu Israel.
Si opfahra insens fannich diah,
un gansi brand-opfahra uf dei awldah.
11 Sayken alles es eah hott, oh Hah,
un loss di eahvet funn sei hend diah kfellich sei;
shlakk selli es ufshtayn geyyich een,
un selli es een hassa, so es si nimmi uf shtayn.”
12 Veyyich em Benjamin hott eah ksawt,
“Deah leeblich fumm Hah soll sich nett feicha,
fa eah heet een da gans dawk lang,
un eah voond zvishich em Hah sei shuldahra.”
13 Veyyich em Joseph hott eah ksawt,
“Ksaykend beim Hah is sei land
mitt keshtlich sach fumm himmel, mitt dau funn ovva-heah,
un fumm deef vassah unna droh;
14 mitt em beshta es di sunn bringd,
un's frucht an sei zeit funn yaydah moonet;
15 mitt di beshta sacha funn di alda berga,
un di beshta kshenkah funn di ayvicha hivla;
16 mitt di beshta sacha funn di eaht un alles es drinn is,
un di gnawt funn Sellah es im feiyahricha putsha gvoond hott.
Awl dee sacha sella uf em Joseph sei kobb roowa,
uf di shtann funn sellah es en foah-gengah voah unnich sei breedah.
17 Sei hallichkeit is vi en eahsht-geboahranah bull,
sei hanna sinn vi di hanna funn en vildah ox;
mitt di hanna shtohst eah di heida,
even so veit vekk es es veld end.
Sei hanna sinn di dausends fumm Manasse,
un di zeyya dausends fumm Ephraim.”
18 Veyyich em Zebulun sawkt eah,
“Froi dich, Zebulun, vi du naus gaysht,
un du, Isachar, in dei tents.
19 Si roofa di leit nuff in di berga,
datt macha si opfahra funn gerechtichkeit;
si zeeya deiyah shtoft aus em say,
un keshtlichi sacha es fashtekkeld sinn im sand.”
20 Veyyich em Gad hott eah ksawt,
“Ksaykend is sellah es em Gad sei land grohs macht,
da Gad laykt sich anna vi en layb,
un sei zay reisa am oahm un am kobb.
21 Eah hott's besht land gnumma fa sich selvaht,
di foah-gengah iahra dayl voah kalda fa een,
vo di evvahshti funn di leit sich fasammeld henn
hott eah em Hah sei gerechtah villa ausgedrawwa,
un aw sei adninga fa di Kinnah-Israel.”
22 Veyyich em Dan hott eah ksawt,
“Da Dan is en yungah layb,
eah shpringd raus funn Basan.”
23 Veyyich em Naphthali hott eah ksawt,
“Da Naphthali hott feel fumm Hah sei gnawt,
un is kfild mitt em Hah sei sayya.
Eah nemd's land zu di west un zu di saut.”
24 Veyyich em Asser hott eah ksawt,
“Da Asser is ksaykend ovvich di anra boova;
eah is ohgnumma bei sei breedah,
un eah soll sei fees bawda in ayl.
25 Di shlossa rikkel funn dei doahra zayla gmacht sei funn eisa un bronze,
awl dei dawwa solsht du shteik sei.
26 Es is kenn gott vi da Gott funn Jesurun,
eah foaht deich di himla fa diah helfa,
un uf di volka in sei hallichkeit.
27 Da ayvich Gott is dei voon-blatz,
un unna drunnah sinn sei ayvichi eahm.
Eah dreibt dei feinda fannich diah vekk,
un sawkt, ‘Mach si doht.’
28 So zayld Israel laynich voona unni kfoah;
em Jakob sei shpring zayld
in en land sei mitt frucht un neiyah vei,
vo di himla da dau runnah falla lossa.
29 Ksaykend bisht du, oh Israel,
veah is vi du,
en leit saylich gmacht bei em Hah?
Eah is eiyah shield un eiyah hilf,
un di shvatt funn eiyah hallichkeit.
Eiyah feinda bikka sich fannich eich un feicha sich,
un diah shtambet iahra hohchi bletz nunnah.”