Es 2. Gabiddel.
1 Ich vill havva es diah visset vi oahrich feel es ich deich mach fa eich un fa selli an di shtatt Laodicea, un aw fa awl selli vo mei ksicht noch nett ksenna henn.
2 Dess is so es si drohsht greeya in iahra hatza un zammah gebrocht vadda in leevi; un so es si folshtendich un reichlich fashtay kenna un vissa kenna veyyich di deefa sacha funn Gott, fumm Faddah un funn Christus.
3 In eem sinn awl di keshtlichi sacha vi veisheit un eisicht fashtekkeld kalda.
4 Ich sawk dess so es nimmand eich fafiahra kann bei eich fashvetza.
5 Ich binn nett bei eich in meim leib, avvah ich binn bei eich in meim geisht. Ich froi mich fa eiyah adning sayna un eiyah feshtah glawva in Christus.
Folkumma Deich Christus
6 So dann, vi diah Jesus Christus ohgnumma hend, so lawfet in eem;
7 un seind gvatzeld un ufgebaut in eem, un fesht im glawva so vi diah gland voahret. Un in demm seind oahrich dankboah.
8 Gevvet acht es nimmand eich fangd deich en leahri un fafiahrichi philosophy vo gegrund is uf di gebodda funn mensha un di veld, un nett uf Christus.
9 Fa in eem voond di foll Gottheit imma leiblichah vayk,
10 un diah sind folkumma in eem, deah vo da kobb is funn alli graft un macht.
11 In eem voahret diah aw beshnidda mitt en beshneidung es gmacht voah unni hend, bei eiyah sindlich leib ablayya im flaysh deich di beshneidung funn Christus.
12 Diah voahret fagrawva mitt eem deich di dawf, un sind viddah uf kshtanna mitt eem deich da glawva in di verka funn Gott, deah vo een uf gvekt hott funn di dohda.
13 Un diah, vo doht voahret in eiyah sinda un nett beshnidda in eiyahm flaysh, hott Gott levendich gmacht mitt eem, un hott uns awl unsah sinda fagevva.
14 Eah hott's hand-shreives funn gebodda ausgrivva vo geyyich uns voah. Dess shreives hott eah vekk gnumma un hott's uf's greitz gnakkeld.
15 Eah hott di gvald vekk gnumma funn di geishtlicha ivvah-saynah un selli vo macht henn, hott si awl uf gvissa fannich di leit, un hott di ivvah-hand gnumma funn eena deich een.
16 Fasell losset nimmand eich richta veyyich ess-sach un drinkes, adda feiyah-dawwa, adda da nei moon, adda Sabbat-Dawwa.
17 Dee sinn yusht en shadda funn di sacha vo kumma zayla, avvah's leib vass da shadda macht is in Christus.
18 Losset nimmand es sich uf hald mitt falshi daymoot un en deensht funn di engel eich vekk fiahra funn eiyah betzawling. Dess sinn sacha es eah nett ksenna hott. So aynah blohst sich selvaht uf mitt sei nadiahlichi gedanka,
19 un bei nett ohhayva zumm kobb vo's gans ivvahrich fumm leib feedaht un zammah haybt mitt gnocha un flexa, un vaxt vi Gott's vaxa macht.
20 Vann diah kshtauva sind mitt Christus zu di nadiahlicha sacha funn deahra veld, favass layva diah es vann diah alsnoch ditzu heahra daydet un haldet iahra gebodda, so vi:
21 “Du nett haendla! Du nett fasucha! Du nett ohrayya!”?
22 Dee sacha zayla awl fagay vi si gyoost vadda, veil si mensha-gebodda un lanninga sinn.
23 Dee sacha henn en shein funn veisheit in geishtlichkeit vo selvaht gmacht is, deich falshah daymoot un deich's leib nett faseiya. Avvah so sacha halda em nett fumm flaysh nohch gay un ufgnomma vadda in nadiahlichi sacha.