4
Dxus tasxuh txuteeçxa ewmeesaçxá's kaapiya'jsa
1 Txã'wẽ ew ãate kaavxya'ja'jni yuutewa, maaíi yu' nmeh en yuuçte' Dxus tasxu txuteetxna eçxthẽ'j ĩsxiina kaapiya'jnite fxi'zeya'. Txã'jĩnak Dxus Espiritu' ãate pta'sxi'.
2 Txãa nasa ĩsxiina kaapiya'jsa' yuwejuçxáa ew we'weçxa', ũuste yu' eçx jxkaahniçxá's nwẽese'jna ewsa yu's nwẽese'jsame'
3 na'wẽ jxkaajatxna: Kabawa'jme' sa' ũ'tasxa's Dxus nvxihtku Dxus nwe'wenisa ewsaçxá's nwẽese'jsawe'sx Dxusa's weçxana ũ'kahn txãa ũ'a's txhitxçxaçxáa ũ'wa'ja' jĩtxna.
4 Txã'wẽ yuukahmeníi Dxus nvxiitnisa yu' kĩh ũ'wa jxuka ewsa', aça' ewmeesa' jĩmée ũ'wa'ja',
5 txãa pa'gatey Dxus yuwete we'weçxa': Ũ'a' jxuka ewsa' jĩ'k aça' ũ'a's jxpa'gaçxa' Dxusa's weçxaçxa ũ'te', ewmeesa yu'çme'.
Jesukristo's wala ew selpisáa
6 Txã'wẽ Dxus yakh fxi'zewa'ja's ũuste yu'akhçxa isasaçxá's kaapiya'jni's ew piyaçxa yakhthẽ'jwe'sxtxi kaypuba'jmée jxpe'jçxa', Jesukristo's wala ew selpisaaçxa txã'wẽ yuune'ga.
7 Dxus yakh fxi'zewa'jmeeçxá's we'weni seelpimeesatxi' nwẽese'jmée, Dxus yakh fxi'zewa'jçxá's çxhãçxha mpa'pçxu.
8 Txã'wẽme' kakwe çxhãçxhawa'jçxá's pa'pçxute', jwee yu' selpi'çme'. Nawa Dxus yakh fxi'zewa'ja's çxhãçxha pa'pçxunisak wejx jxthaakwe selpi'. Txã'wẽsa' naa kiwete ew fxi'zewa'thek selpi', sa' cielutewa selpiwa'jsaíiçxá'.
9 Na'wẽ pta'sxni' ĩsxiinisame', aça' jxukaysa nwẽese'jwa'j ji'phta'.
10 Txãa pa'gaíiçxáatha'w pxthaa ya'iiwẽesxuunawa çxhãçxha mjĩ', txãa pa'gatey Dxus ĩtxisa ũsa' txã' pu'çx yujuna sũju'tha'w, txã' naa kiwete nasa jxukaysatx nwe'wesa' txã'sna ũuste jxpa'gasa yuutxi' jxuka.
11 Txã'wẽ yũuwa'ja's ew kaapiya'jwa'j ji'phgu.
12 Sa' piçtakxa' jĩna weeçxwe'sxte wala ew mfxi'ze, kxah Dxusa's jiisawe'sx iidx fxi'zeni's uyçxa', txã'wẽy ew fxi'zekahn kĩhtewa ũus yajkxçxa mwe'we. Sa' txãawe'sxtxi peeygãhna mfxi'ze, Dxus yakh jxpubamée, kĩhte yuhwa pkalte wetemée.
13 Adx pa'phkaçx idxa' Dxus yuwe's nasaa ksxavxyte lẽeyna, yu'kxpehna kaapiya'jna yuuwa'jçxá's pa'pçxuna mes.
14 Idx kĩhtewa sxiigmée ãjawa'ja's Dxusa' ũsku ancianowe'sx idxa's peekizeçxa Dxus yakh puutx we'wete txãatxi' ivxiituya'mée wala mpa'yajkx.
15 Txã'wẽ ew fxi'zewa'ja's yuuçxáa peçxkanamée mfxi'ze, kxah idxa' Dxus yakh jweeíiçxáa çxhãçxhana u'jni's jxukaysa uyuutxna.
16 Peekíi wala mpa'yajkx sa' kaapiya'jni'swa txã'wẽy mpa'yajkx kĩhte yuhwa sxiigmée. Txã'wẽ yũuçxa', idxíiwa ewte neeyũune'ga, sa' iidx pta'sxni's wẽse'jsatxwa ewte nvxiitune'ga.