9
Ẽseya' ãjasame's Jesus nuykatxhini
(Mr 2.1-12; Lk 5.17-26)
1 Txajũ' Jesusa' barkote khẽeçxa sxawedçxa txajx çxhabtey ki' pa'kh.
2 Aça' kxteea' teeçx piçthẽ'j ẽseya' ãjasame'stxi yakhna pa'j. Txã'wẽ yakhna pa'jsawe'sxa' Jesusa' nuykatxhiyujuna sũhni's jiyuçxa', ãça'sa's na'wẽk we'we Jesusa':
—Çxhãçxha myajkx. Iidx pkala' peltunãyni yã'jtx neeyũu jĩte',
3 ley kaapiya'jsawe'sx maaíi yu' na'wẽtx yajkx: Naa piçthẽ'ja' Dxusa's iiweeçx we'wena ãjawa'jmeea'sku we'we' sũju'tx.
4 Nawa txãawe'sx yaakxni's Jesus jiyuçxa', na'jĩnak we'we:
—¿Kĩh yuutekwe txã'wẽ ewmée yaaki'?
5 ¿Maa thẽymeesakx? Iidx pkala' peltunãyni yã'jtx neeyũu ¿jĩniá'? Meeçxa': Kiiteçxa me'j ¿jĩniá'?
6 Makwe thẽysatewa Dxus Nçxi'k Nasa Yuusa' naa kiwete pkaltxi peltunãyya' ãjawa'jsa' naa pa'ga kaajiyu'j ya'wath ãçxha'.
Txajũ' ẽseya' ãjasame's na'wẽk we'we:
—Kiiteçxa, iidx deeni's tu'sçxa yatna me'j jĩte',
7 txãa ẽseya' ãjasameea' kiitena'wa u'kh txajx yatna.
8 Txã'wẽ yũuni's nasa uyçxa', ũukhtxi. Sa' Dxusna weçxana tuuthe'jtx txã'wẽ çxhãçxhawa'ja's Dxusa' peesne' sũhçxa.
Mateo's Jesus pa'yani
(Mr 2.13-17; Lk 5.27-32)
9 Jesusa' txajũ u'jçxa', teeçx piçthẽ'j Mateo yaasesa txã'wẽ gobierno jĩi vxyu pkhakhna u'pte uyçxa', na'wẽk we'we:
—Adx yakh myuh jĩna.
Aça' Mateo' kiiteçxa Jesus yakh u'kh.
10 Txajũ' Jesusa' ũ'ya' yatte u'kak, aça' gobierno jĩi vxyu pkhakhsawe'sx vxite' pkalsawe'sxwa wala kuh u'katx vxite' Jesus yakh u'jusawe'sx yã'jçxa.
11 Aça' txã'wẽ yũuni's fxariseowe'sx uyçxa' pẽjxtxi Jesus yakh u'jusawe'sxtxi na'jĩna:
—¿Ma'wẽçxaga i'kwe'sxtxi kaapiya'jsa' gobierno jĩi vxyu pkhakhsawe'sx vxite' pkalsawe'sx yakh ũ'wé'?
12 jĩni's Jesus wẽse'jçxa', na'wẽk we'we:
—Yu'çe'jsa's jxpeejxmeeta' aka ji'phmée wẽt ũssa', naasáa ãça'sa yuuçxáa yu'çe'jsa's jxpeejxta'.
13 Mpiyawe Dxus librute na'wẽ fxi'jni ũsa' txã'sna: Tajkx ikhçxa Dxusa's weçxana kabni yu'sa' jxpeejxmeeth. Adxa' vxitetx peeygãaniçxá'sthu jxthãasu' jĩ'k. Adxa' nasa ewsatx pakweya' kĩhmeeth, naasáa pkalsatx pakweya'çxáath kĩh, kxah ewmée yũuna fxi'zeni's nvxihtçxa Dxus tasxte sxaweduutxna.
Yũunani's Jesusa's pẽyni
(Mr 2.18-22; Lk 5.33-39)
14 Txajũ' Juan Bautista yakh u'jusawe'sxa' Jesus tasxte utxaaçxa na'wẽtx pẽjx:
—¿Kĩh yuupa'gatka'w kwe'sx vxite' fxariseowe'sx txakwe wala yũuna', naapkaçxha' idx yakh u'jusawe'sx yu' yũuna'çmeeta'? jĩte',
15 Jesusa' na'wẽk pas:
—Miiyajkxwe: ¿bodate pi'kxnisa' ũ'mée nxusna ũswa'jsatxmanx novxio' txãawe'sx yakh nee ũsiite'? Naasáa novxio's txãawe'sx tasxuh txuhdete yuuçxáa yũunaatxna.
16 Ropa ĩisxsate tela u'sesa yakh ya'pã'khe'çme'. Txã'wẽme', tela u'sesa' jweeíiçxáak sude' ĩisxsa's, aça' sutenisa' jweeíiçxáa wala suteena.
17 Txã'wẽy beka u'se aahnisa's slun ĩisxsate ya'awu'çme'. Txã'wẽme', beka u'sesa slun ĩisxsa's sude'k, aça' beka yakh slun yakh e'zíi vxitu'tx. Txãa pa'ga beka u'sesa's slun u'sesate awwa'ja'. Txã'wẽ yu', maa yuhwa vxitumeetxna.
Jairo niisa vxite' Jesus atxhte jxa'dxsa
(Mr 5.21-43; Lk 8.40-56)
18 Jesus txã'wẽ we'wena ũspkaçxha', judiu pkhaakhenite npiiçthẽ'jsa' Jesus tasxte peejxũkweçxa na'wẽk we'we:
—Adx niisa' uuyã'kh. Nawa idx yuhçxa kuseju jxa'dxwaça', ĩtxi yuuna jĩte',
19 Jesusa' kiitena'wa txãa yakh u'kh, txãa yakh u'jusawe'sx yã'jçxa.
20 Txã'wẽ u'jweçpkaçxha', teeçx u'y doce anxu kakwe yu'te ãça'na u'jusa Jesus e'ste paaçte kũhçxa, atxh vxiçte kpaajxa'dxku.
21 Atxh vxiçteçxáawa jxa'dxwaça', katxhi'nja sũhçxak txã'wẽ yũu.
22 Nawa Jesusa' jiyuçxa txãa u'ya's thegçxa na'wẽk we'we:
—Ũukhnuwe, wejxwa katxhini i'kwe neeyũu, txã'wẽ katxhi'nja sũhçxane'kwe txã'wẽ yũu naa pa'ga jĩte', txãa dudtey katxhiçxak neeyũu.
23 Txajũ' Jesusa' txãa npiiçthẽ'jsa yatte pa'jçxa uyku pedaaçte nxusna tukawa'jsa músiku jxuka pheu'jçxa ũste. Aça' nasa' nxusna wala ũ'nena ũste',
24 na'wẽk jxkaah:
—Ayjxu mkaasehwe. Luuçxa' uunime', deeniçxáa ũsa' jĩte', nasa' npeevxysxijkatx.
25 Nawa Jesusa' nasatx kasejkaahçxa dxiite u'kana'wa, txãa luuçxa's pu'kisuçpkaçxha', kiitek.
26 Aça' txã'wẽ yũuni's txãa kiwesu jxuka tuuthe'jnik yuu.
E'z piçthẽ'j uyya' ãjasameetx Jesus nuykatxhini
27 Txajũ' Jesus kasehna u'jweçte', uyya' ãjasamée e'ztxi sus we'wena yuwé':
—Davxid Nçxi'k, kwe'sxtxi mpeeygãh jĩna.
28 Txajũ' Jesusa' yatte u'kate', txãa uyya' ãjasameewe'sxa' utxaana kũhtx. Aça' Jesusa' na'wẽk pẽjx:
—¿Uywa'ja's ũsuna sũju'kwe' i'kwe'sxa'? jĩte', txãawe'sx pasçxa':
—Txãa sũju'íitha'w jĩtx.
29 Aça' Jesusa' txãawe'sx yafxte jxa'dxku na'jĩna:
—I'kwe'sx jxthãasni' kxtey yuuna jĩçpkaçxha',
30 txãawe'sx yafxa' ewuutx. Aça' Jesusa' wala neewe'wek na'jĩna:
—Kim yuhtxwa pta'sxmeene'kwe jĩtewa,
31 txajũ kasehna' txãa kiwesu jxuka pta'sxtxi Jesus txã'wẽ yũuni's.
We'weya' ãjasame's Jesus nuykatxhini
32 Txãawe'sx kasehna u'jweçpkaçxha', Jesus tasxte vxite piçthẽ'j nuypa'jtx, we'weya' ãjasamée eçx iiyamunisa's.
33 Aça' Jesusa' txãa eçxa's ũusuh kutxi'the', txãa piçthẽ'ja' we'weya' ãjak. Txã'wẽ yũute', nasa' wala kuh yajkxtxi na'jĩna:
—Israel kiwete bagaçxte yuhwa na'wẽsa yu' iiuymeetha'w jĩ'tx.
34 Nawa fxariseowe'sx yu' na'wẽtx we'we:
—Naa piçthẽ'ja' eçxtxi nasa ũusuh kutxi'ji'k, nawa eçxthẽ'j pu'çxteçxáak txã'wẽ yũ' jĩ'tx.
Mjĩisa yu' kuhmeeta'
35 Jesusa' çxhab walasu çxhab le'çxkwesu judiuwe'sx pkhaakheni yat iisa kaapiya'jnak pekũju'. Sa' Dxus jxkaahwa'ja'swa pta'sxna vxite' wee ma'wẽsate nasa ãça'satxwa nuykatxhina kĩh akatxwa jxuka kaykase'je'k.
36 Sa' Jesusa' txãa nasatx thegçxa', txãawe'sxtxi peeygãjk txã'wẽ nxusna çxhãçxhameekuẽ piisxáa namu ji'phmeesa na'wẽ ũspa'ga.
37 Sa' txãa yakh u'jusawe'sxtxi na'wẽk we'we:
—Isath we'we', mjĩia' seena' wala', nawa mjĩisa yu' kuh meeta'.
38 Txãa pa'ga mjĩi namu's mpẽjxwe mjĩiwa'jsa kaakhan jĩk.