21
Jesus Jerusalente u'kani
(Mr 11.1-11; Lk 19.28-40; Jn 12.12-19)
1 Jerusalente utxaana pa'jaççxa', Betfxagé çxhabkuẽte khuẽ'y pa'jtx. Txãa çxhabkuẽ' Oliwos vxiç utxagak ũsu'. Txajũ' Jesusa' txãa yakh u'jusawe'sx e'zsatx na'jĩnak kaah:
2 —Ay dxi'pga çxhabkuẽ ũsa' kxtee me'jwe, sa' kxteea' uyuune'kwe buçxu luuçx njĩ'jsa tudni ũsna txã'sa' jxũkhwedeçxa jxũne'kwe.
3 Jxũna yuhte uyçxa' pẽyiwáatxna aça' kwe'sxtxi jxpe'jsa' peejxa', nawa txaçxmeyna kaasxwedu'juna jĩne'kwe.
4 Dxus yuwe pta'sxsa we'weni' kxtey yuuk. Txã' na'jĩnak fxi'j:
5 Sion çxhabte nasatx na'jĩna pta'sxine'kwe:
Mthegwe, i'kwe'sxtxi jxkaahsa yuja',
Pxthaakwesa na'wẽ thegna, buçxu luuçxte a'jçxa,
Aça' txãa buçxu njĩ'ja' ktũ'se'jnisa' jĩna fxi'jni'.
6 Txajũ' txãawe'sxa' u'jçxa Jesus ma'wẽ jxkaathe', kxtey yuutx.
7 Sa' buçxu njĩ'ja's jxũna pa'jtx luuçx yã'jçxa. Txajũ' buçxu luuçx kastxaja'jnimeesa's txãawe'sx atxhtxi pustxi, aça' Jesusa' txãate a'kh.
8 Nasa wala kuh pi'kxna u'jsawe'sx yu', txãawe'sx atxhtxi dxi'jsutx pusna u'jwe' Jesus skhẽwwa'jsu. Maaíi yu' ẽjxa spẽ'thçxa txã'wẽytxi dxi'jsu pusna u'jwe'.
9 Aça' nasa' yaçte u'jsa vxite' e'ste yuusa txãawe'sx jxukaysa na'jĩnatx sus we'wena u'jwe':
—Dxus kaahnisa wala yuh jxtuhthesa yuja' jxkaahsa Davxid ji'j. Dxusa's weçxaaga wala ew yũupa'ga jĩ'tx.
10 Txajũ' Jesusa' Jerusalente u'kate', kxtee nasa jxukaysa seena' wala sustxi na'jĩna paapẽjxna:
—Na' ¿kimna? jĩte',
11 pta'sxtxi na'jĩna:
—Naaíi Dxus yuwe pta'sxsa Jesusa', Galilea kiwesu Nasaret çxhabtewe'sx jĩ'tx.
Dxuus yatte txweysaatx Jesus kasxisxni
(Mr 11.15-19; Lk 19.45-48; Jn 2.13-22)
12 Txã'wẽ yũuni e'su' Jesusa' dxuus yatte u'kaçxa jxuka eka kasxisxku kxtee txweyna ki' weyna ũssatx. Sa' vxyu yu'pthehna ũsni mesa vxite' tub çxihme txweyna u'pnitxwa jxuka pũsxku.
13 Sa' na'wẽk we'we:
—Dxus librute' na'wẽk we'we': Adx yata' Dxus yakh puutx we'wena ũswa'jçxá' jĩ'k. Nawa i'kwe'sxa' peswée pkhaakhena ũsni kafx na'wẽçxáa vxitçxa ji'phi'kwe jĩk.
14 Kxtee dxuus yatte maaíi yu' Jesus tasxte utxaatx, uyya' ãjasamée, çxida legsa, aça' txãawe'sxtxi' nuykatxhik.
15 Nawa sacerdote npiiçthẽ'jwe'sx vxite' ley kaapiya'jsawe'sx txãawe'sxa' ũusaçxatx, txã'wẽ kim yuhwa ãjanimeesa's kaavxya'ja'the' kxtee dxuus yatte ũssa luuçxa' sus we'weçxa' jxkaahsa Davxid ji'ja's wala weçxa'tha'w jĩna susni's wẽse'jçxa.
16 Sa' Jesusa's pẽjxtxi:
—Na'wẽ we'wena ũsta' txã'sa' ¿wẽse'je'ga'? jĩte', Jesusa' pasku:
—Wẽse'je'íith. Nawa i'kwe'sxa' ¿iilẽeymeekwe'? txã'wẽ yũuwa'ja's Dxus librute na'jĩnak we'we':
Luuçx le'çxkuẽ vxite' çxu'çxsawa txã'wẽ zhiçxkwe tuuthe'jwa'ja'sgu vxit jĩ'k.
17 Txajũ' Jesusa' kxtee nvxihtçxa u'kh çxhabu kasehna sa' Betania çxhabtek pe'te.
Higwera fxtũu tasx yũnsame's Jesus açewe'weni
(Mr 11.12-14, 20-26)
18 Kuskuskhẽ' Jesusa' çxhabna ki' sxawedna u'jweççxa', wẽek.
19 Sa' dxi'j pukate higwera fxtũu tasx ũste uyçxa', thegya' utxaak. Nawa kĩh yũn yuhwa uyme', eççxáak ji'ph yu'. Aça' txãa fxtũu tasxa's na'wẽk we'we:
—Ãçxha' peena yu' yũnmeene'ga jĩçpkaçxha', naa dudtey fxtũu tasxa' uhdxku.
20 Txãa yakh u'jusawe'sxa' txã'wẽ uyçxa', wala kuh yajkxna na'wẽtx pẽjx Jesusa's:
—Fxtũu tasxa' ¿kĩh yũuçxaga txakwe wala dud uhdx? jĩte',
21 Jesusa' na'wẽk pas:
—Isath we'we': Kuh jwed yajkxmée Dxusa' pasyujuna sũhwa'jçxá's yajkxçxa', adx vxitthu txã'wẽçxáamée, na'wẽ yũuya'wa ãjane'kwe: Naa vxiç wala ayjxu u'jçxa ĩkh walate tee khẽe jĩne'kwe, aça' kxtey yuuna.
22 I'kwe'sxa' kĩh pẽjxçxawa Dxus yakh puutx we'wene'kwe Dxusa' pasuna sũhna, sa' txã'wẽ yũuçxa' jxpa'gane'kwe jĩk.
Dxuus yatte Jesus juuna' yũuni's pẽyni
(Mr 11.27-33; Lk 20.1-8)
23 Txajũ' Jesusa' dxuus yatte u'kaçxa kaapiya'jaçpkaçxha', sacerdote npiiçthẽ'jwe'sx vxite' judiu nthẽ'jsawe'sx kũhçxa' na'wẽtx pẽjx:
—¿Kĩh yũupa'gaga txã'wẽ dxuus yatte jxuka suw? ¿Kimga jxkaah txã'wẽ yũuwa'ja's? jĩte',
24 na'wẽk pas:
—Adxwa i'kwe'sxtxi pẽjx ya'wath, aça' adx pẽyni's pasya' ãjate', adxwa pta'sxi'nja kim jxkaathe txã'wẽ yũuçxawa.
25 Juana's ¿kimga jxkaah yu'te bautisãykahn? ¿Dxus wá' jxkaah, meeçxa' naa kiwete piçthẽ'jwe'sx wáa ne'ta jxkaah? jĩte', txãawe'sx pwe'sx puutx ya'paapẽyi'tx:
—Dxusne' jxkaah jĩna paste', txã'wẽte' ¿mjĩitekwe nwẽese'jmée? jĩna.
26 Aça' naa kiwega nasa jxkaahnine' yu' jĩya'wa ãjame'nja'w. Txã'wẽme', nasa jxukaysa Juan ju'guçxaçxáatx we'we', Dxus jxkaahnine' yu' jĩna txãatxtha'w ũukhu' jĩnatx puutx we'we.
27 Sa' ãjameeçxa', Jesusa's na'wẽçxáatx pas:
—Jiimeetha'w jĩna. Aça' Jesuswa txã'wẽyçxáak pas:
—Adxwa pta'sxme'nja kim jxkaathe txã'wẽ yũuçxawa jĩk.
E'z nçxi'ksatx kaaja'da'jçxa kaapiya'jni
28 Txajũ' Jesusa' na'wẽk we'we:
—I'kwe'sxa' ũus miiyajkxwe, na'wẽ kaaja'da'jçxa pẽjxya'wath: Teeçx piçthẽ'ja' e'z nçxi'kku ji'phu', sa' teeçxsa's na'wẽk jxkaah: Ãçxha' adx mjĩi ehte uwa uhdeya' me'j jĩte',
29 nçxi'k pasçxa': U'j wẽemeeth jĩçxawa, ũus yajkxna u'pçxa', mjĩiya' u'kh.
30 Txajũ' neya' vxite nçxi'ka'swa txã'wẽy jxkaakh. Aça' txã' na'wẽk pas: Ewna, u'jwe'nja jĩçxawa u'jme'.
31 Ãçxha' i'kwe'sxtxi ¿ma'wẽga thegu'? ¿Maasaga ney jxthãasni's kxtey yuu? jĩte', txãawe'sx pasçxa': Nyafxte jxkaahnisa nçxi'k jĩtx. Aça' Jesusa' na'wẽk we'we:
—Isath we'we', gobierno jĩi vxyu pkhakhsawe'sx vxite' u'ywe'sx pkal yuuna fxi'zesa txãawe'sx khuẽ'y Dxus jxkaahnite u'katxna, naapkaçxha' i'kwe'sxa' u'kaya' ãjamée ũsi'kwe.
32 Txãa pa'gatey Juan Bautista' kaapiya'jna pa'kh pçumée ĩtxi fxi'zewa'ja's. Txã'wẽtewa, i'kwe'sxa' jxpa'gameei'kwe. Naapkaçxha' gobierno jĩi vxyu pkhakhsawe'sx vxite' u'ywe'sx pkal yuuna fxi'zesa txã'wẽsa yu' jxpa'gatx. Nawa i'kwe'sxa' yafxju uyçxawa pkaltxi nvxihtçxa Dxus tasxte sxawedmeei'kwe.
Mjĩisawe'sx patron nçxi'ka's ikhni yakh kaaja'da'jni
(Mr 12.1-12; Lk 20.9-19)
33 Vxite ejemplo na'sna mwẽese'jwe: Teeçx kiwe namu' uuthasx vxitku, sa' peeku'j uphçxa teeçx ahte uwa's ku'swa'j txajk, sa' ẽete tejkaçxa jxuka thegwa'j yatwa txajk. Txã'wẽ yũuçxa txãa kiwe's mjĩisatx pki'jçxa jxu'j dxi'kh u'j.
34 Uwa thẽ'jwa'j en ãhte', txã'sna selpisaatx kaakh kiwee pki'jnipa'ga pẽjxya'.
35 Nawa kiwee pki'jsawe'sxa' txãa selpisaatx uweçxa maaíi yuutxi' pãpana vxitetx ikhna vxitetxi' kwet wãatatahnatx yũu.
36 Txã'wẽ yũute', kiwe namu' jweeíiçxáak kuh kaahna ũsu' selpisaatx. Nawa kiwee pki'jsawe'sxa' jxukaytxi txã'wẽçxaçxáatx yũu.
37 Txajũ' nmehte' txajx nçxi'k yuunak kaah: Adx nçxi'ka's kuçx txã'wẽ yũumeewáatxna sũhçxa.
38 Nawa kiwee pki'jsawe'sxa' nçxi'ka's uyçxa', txãawe'sx pwe'sx na'wẽtx puutx we'we': Ney uute' naa txã'wẽ kiwe's iiyamuwa'jsa', aça' txã'sa' ikhega kiwe' kwe'sx jĩi yuukahn jĩ'tx.
39 Txã'jĩyã'jçxa', uweçxa txãa kiwejũ kutxi'jçxa ikhtxi.
40 Txã'wẽ pta'sxçxa', Jesusa' na'jĩnak pẽjx:
—Txã'wẽ yũute', kiwe namu pa'jçxa', ¿kĩh yũukx kiwee pki'jsawe'sxtxi'? jĩte',
41 na'wẽtx pas:
—Txãa ewmeesatxi' peeygãhmée ikhçxa txãa kiwe's vxitetx pki'jina kiwee pa'ga namu's wa'lmée dukhwa'jsatx jĩtx.
42 Aça' Jesusa' na'wẽk we'we:
—I'kwe'sxa' ¿bagaçxte yuhwa iilẽeymeewá'kwe Dxus librute na'jĩna fxi'jni's?
Yat txaahsawe'sxa': Naa kweta's selpime' jĩçxa wãatahtx.
Nawa txãa íik yat makwesanawa çxhãçxha neewewa'jsa yuuna pa'j.
Txã'wẽ neewewa'jsa yuuna pa'jwa'ja's Dxusku vxitçxa nvxiht.
Txãa pa'ga kwe'sx yakha' wala weçxa yuja' ¿jĩ'çmeena'?
43 Txã'wẽ açepa'ga íiçxáath na'jĩ': Dxus jxkaahni's i'kwe'sxtxi kusa'jçxa vxite nasatx ũsni yuuna, kiwe namu's pki'pha'ga wa'lmée dukhkahn.
44 Sa' maawa txãa kwet kajkwega wetesa' jxuka çxkateteena, meeçxawa txãa kwet nasa kajkwekhẽ weteçxa' jxuka ku'çxina jĩk.
45 Aça' sacerdote npiiçthẽ'jwe'sx vxite' fxariseowe'sxa' jiyutx txãawe'sxtxi íiçxáa we'weçxa txã'jĩni's.
46 Sa' tud wẽeçxawa ũukhtxi, txã'wẽ nasa' Jesus ju'guçxaçxáatx ũs yu', Dxus yuwe pta'sxsa' jĩna txãa pa'ga.