15
Nasa's ewmée vxit-sa
(Mr 7.1-23)
1 Fxariseowe'sx vxite' ley kaapiya'jsa txãawe'sxa' Jerusalen çxhabu pa'jçxa', maaíi yu' na'jĩnatx Jesus tasxte utxáa:
2 —Idx yakh u'jusawe'sxa' ¿kĩh yũuçxata yaçgawe'sx kaapiya'jnitxi' kxtey yu'çmée, txã'wẽ kusekhẽ yu' kaahmée ũ'wé'?
3 Txã'jĩte', Jesuswa pẽjxku na'jĩna:
—I'kwe'sxwa ¿kĩh yũuçxakwe i'kwe'sx yaçgawe'sx kaapiya'jniçxá's nwẽese'jçxa' Dxus jxkaahni yu'sa' kxtey yu'çmée?
4 Dxusa' na'wẽk jxkaaja': Iidx tata iidx mama txãawe'sxtxi' peeygãhna pu'çxwa'ja'. Aça' txã'wẽ yũumée neywe'sxtxi açewe'wesa' uu ena's ji'phuna jĩ'k.
5 Nawa i'kwe'sxa' yaçga kaapiya'jniçxá's nwẽese'jçxa Dxus jxkaahni yu'sa' kxtey yuumée ũsi'kwe.
6 I'kwe'sx yaçgawe'sxa' na'wẽtx kaapiya'ja': Maa nasawa neywe'sxtxi peeygãhna pu'çxmée, adx ji'phuni i'kwe'sxtxi pu'çxwa'ja's Dxusna dukhe'nja jĩna we'weçxaçxáa, neywe'sxtxi' pu'çxmeetewa ewa' jĩ'tx.
7 Yuwejuçxáa ew we'weçxa', ũuste yu' ewmeeçxáa yaakxsai'kwe, aça' Dxus yuwe pta'sxsa Isaiasa' isa yuh Dxus we'weni's na'jĩna fxi'jne':
8 Naa nasa' yuweju yu' adxa's yaaki'tha'w jĩçxawa, ũusuh yu' adxa's yaaki'çmeeta'.
9 Naa kiwete nasaa kaapiya'jniçxá's kxtey yuuna ũsçxa, txã'wẽ Dxus jxkaahni'stha'w kxtey yu' jĩte', kxul yuhna jĩ'k.
10 Txajũ' nasatx pa'yaçxa na'wẽk we'we Jesusa':
—Jiyuya' mwẽese'jwe.
11 Kĩh ũ'wa tutxhteçxáa khẽesa yu', nasatx ewmeesa vxitu'çme', naasáa ũusuh ewmée yaakxnisa yuuçxáak nasatx ewmeesa vxitu'.
12 Txajũ' Jesus yakh u'jusawe'sxa' utxaaçxa na'wẽtx we'we:
—Idx txã'wẽ we'wete', fxariseowe'sxa' ũusaçxanatx neeyũu jĩte',
13 Jesus pasçxa':
—Kĩh tasxwa adx Tata cielute ũssa uuhnisamée yu'sa' khubeni yuuwa'ja'.
14 Aça' ũukhnuwe. Txãawe'sxa' yafx ji'phmeesa, yafx ji'phmeesa nwe'sxtxi pe'jna u'jusaçxáata'. Txã'wẽ yafx ji'phmeesa yafx ji'phmeesa nwe'sxtxi pe'jna u'juçxa', e'zíi kafxkhẽ khẽjetxna.
15 Txã'jĩte', Pedro' Jesusa's na'jĩnak pẽjx:
—Ejemplo kaaja'da'jçxa we'weni's ãate mpeeta'sx jĩte',
16 Jesusa' na'jĩnak we'we:
—¿I'kwe'sxwa jiyu'çmeewá'kwe?
17 Kĩh ũ'wa tutxhkhẽçxáak u'jwe', sa' txajũ ki' kaseje'k.
18 Nawa ũusuh yaakxnisa yuuçxáak nasa's ewmeesa vxitu'.
19 Txãa pa'gatey ũusujk kaseje' ewmée yaakxnisa, nasatx ikh wẽenisa, ptamçxawa vxitesa yakh fxi'zeni, ma'wẽsa yakhwa pkal yuuna fxi'zeni, pesweeni, ĩsxiina ewmée nuywe'weni, Dxusna açewe'weni.
20 Txã'wẽ yaakxnisatx nasa's ewmeesa vxitu'. Nawa kusekhẽ yu' kaahmée ũ'nisaçxáa yu', nasatx ewmée vxitu'çme'.
Teeçx u'y judiu ji'jmeesa Jesusa's jxpa'gasa
(Mr 7.24-30)
21 Jesusa' txajũ kasehçxa u'kh Tiro vxite' Sidon kiwen.
22 Aça' teeçx u'y Kanaanuwe'sx txãa kiwete pa'jçxa u'psa' Jesus tasxte pa'kh pxthaa we'wena:
—Davxid ji'j, ũ'kwe's meen peeygãh. Ũ'kwe niisa's eçx iiyamute', iiméh wala pxthaa yuuna ũsa' jĩtewa,
23 Jesusa' ma'wẽçxáa yuhwa pasme'. Aça' Jesus yakh u'jusawe'sxa' Jesusa's we'wetx na'jĩna:
—Kwe'sx e'ste kuçx susna yuukahmen yatna mkaah jĩte',
24 Jesusa' na'jĩnak pas:
—Piisxakuẽ na'wẽ vxituna ũssa Israelwe'sxçxáatxku pakweya' kaah Dxusa' jĩtewa,
25 txãa u'ya' sxuuna' yuumée utxaana kũhçxa txajx tasxte peejxũkwek:
—Ũ'kwe's meen pu'çx jĩna.
26 Aça' Jesusa' na'jĩnak we'we:
—Luuçx ũ'wa'ja's kusa'jçxa alkutx ũswa'jme'
27 jĩtewa, txãa u'y pasçxa':
—Isa yuh we'we'g. Nawa alku' pejka ũ'we'tx mesa tasxsu pan pe'la ũsxisaçxáatxwa jĩte',
28 Jesus we'weçxa':
—Dxusa' pu'çxyujuna sũhwa'j yuuçxá's i'kwe yaaki', txãa pa'ga i'kwe pẽyni' kxtey yuuna jĩçpkaçxha', txãa dudtey txãa u'y niisa' katxhinik neeyũu.
Maazkuẽe ãça'satxwa Jesus nuykatxhini
29 Jesusa' txajũ kasehçxa Galilea ĩkh pukasuk u'j. Sa' thã'j vxiçtek tejka.
30 Aça' nasa wala pa'jtx txajx tasxte ãça'satx pe'jçxa, legsa, uyya' ãjasamée, we'weya' ãjasamée, ẽseya' ãjasameetx. Aça' txã'wẽ wala kuh ãça'satx Jesus tasxte nuypa'the', txã' nuykatxhik.
31 Txã'wẽ we'weya' ãjasameewa we'weya' ãjatx, aça' ẽseya' ãjasameewa katxhitx, aça' legsawa ew u'jya' ãjatx, naapkaçxha' uyya' ãjasameewa uyya' ãjatx. Aça' nasa' wala kuh yajkxna Israelwe'sx Dxusa's wala weçxatx.
Kuatro mil nasatx Jesus sã'jĩni
(Mr 8.1-10)
32 Txajũ' Jesusa' txãa yakh u'jusawe'sxtxi pa'yaçxa na'wẽk we'we:
—Naa nasa' ayte adx yakh tekh en yã'j ũsta', sa' kĩh yuhwa ũ'wa'j ji'phmeeta', txãa pa'gath peeygãja', sa' puuçmée yu' kaahme'nja. Txã'wẽme' dxi'the u'jya' çxhãçxhameetxna jĩte',
33 na'wẽtx pas:
—Nawa ¿kĩhte txakwe wala ũ' uyuukxtha'w nasa txãazkuẽesa ũ'wa'j? Ayte' kim yuhwa u'p kiweme' aça' jĩte',
34 Jesusa' pẽjxku:
—I'kwe'sxa' ¿maz pan ji'phkwe? jĩte', txãawe'sx pasçxa':
—Siete pan, wedx kuhmeekuẽçxáa ji'ptha'w jĩnatx pas.
35 Aça' nasatxi' kiwesu kaçxkaahçxa',
36 siete pan vxite' wedxtxi jxpa'gana'wa Dxusa's weçxak. Txã'wẽ yũuçxak pe'ltedeçxa txãa yakh u'jusawe'sxtxi ũs, aça' txãawe'sxa' nasatx ũsu'stxi.
37 Jxukaysa ũ'çxa txikte', kijxaasa's pkhakhtxi, aça' siete kanastate utak neeyũu.
38 Ũ'sawe'sxa' kuatro mil ãhtx yu', nawa u'y vxite' luuçx txãawe'sx yuutxi' isaniméek kxaz yu'.
39 Txã'wẽ yũuçxa Jesusa' nasatx kaahçxa', txãa yu' barkote khẽeçxa Magdala kiwenku u'j.