13
Skuutxh uuhsa's kaaja'da'jni
(Mr 4.1-9; Lk 8.4-8)
1 Txãa enteyíiçxáa Jesusa' yatuh kasehçxa ĩkhwala pukate ũsya'k u'j.
2 Aça' txajx ũsnite wala nasa pkhaakhete', Jesusa' barkotek khẽe. Aça' nasa yu' ĩkh pukatee neeyũutx.
3 Txajũk wala kaapiya'j ejemplo kaaja'da'jçxa na'jĩna:
—Skuutxh uuhsa' ujxa' kasejk.
4 Aça' uhna u'jweçte', msuuíi yu' dxi'jsutx ũsxi skuutxh fxiwa'. Aça' vxiçxakwe pa'jçxa skuutxh fxiwtxi ũ'tx.
5 Vxite ahsu' kwet kajkwesutx ũsxi, kiwe wejkuẽçxáa ji'phsu. Aça' kxsũ ũsxisa' wala dud buçxatx kiwe walameene'ta ya'fxihb txãa pa'ga.
6 Nawa sek açxaate' jxuka uhdxtxi, iiwehçeya' ãjameene'ta naa pa'ga.
7 Vxite skuutxh fxiwa' çhũçh ksxavxysutx ũsxi, aça' çhũçh khuẽ'y walaaçxa', skuutxha's aphçxa ivxiitutx.
8 Nawa vxite ahsu' kiwe wala ewsu ũsxitx, sa' wala yũntxi. Maa tasxíi yu' cien, vxite' sesenta, vxite' treinta nxinx txã'wẽtx çut.
9 Na'wẽ pta'sxni's jiyuwa'jsa ũsçxa', jiyune'kwe jĩk.
Kĩh yũupa'ga ejemplo yakhçxáa kaaja'da'jçxa pta'sxni
(Mr 4.10-12; Lk 8.9-10)
10 Txajũ' txãa yakh u'jusawe'sxa' Jesus tasxte utxaaçxa na'wẽtx pẽjx:
—¿Kĩjxa'ga ejemplo kaaja'da'jçxaçxáa nasatx pta'sxi'? jĩte',
11 na'wẽk pas Jesusa':
—Dxus jxkaahni ensu ma'wẽ yũuwa'ja'swa kim yuhwa jiyunimeesa's i'kwe'sx yuutxi's kaajiyu'jwa'ja'. Nawa vxite yuutxi's kaajiyu'jwa'jme'.
12 Txãa pa'gatey jiyuwa'jsa's jweeíiçxáa ãate ya'kaajiyu'juna, wala jiyukahn. Nawa jiyuwa'jmeesa's ya'kaajiyu'jmeena, wejxwa le'çxkweçxáawa jiiwáa yuuna txã's yuhnawa kusa'jni yuuna.
13 Txãa pa'gath ejemplo kaaja'da'jçxaçxáa we'we'. Txã'wẽ yuukahníi txãawe'sxa' uyçxawa, uysamée na'wẽ jiyu'çmeeta', sa' wẽse'jçxawa wẽse'jsamée na'wẽ nwẽese'je'çmeeta'.
14 Txãawe'sx fxi'zewa'ja's Dxus yuwe pta'sxsa Isaias we'weni' kxtey yuuk. Txã' na'wẽk we'we:
I'kwe'sxa' wẽse'jewá'kwe, nawa jiyumeene'kwe.
Uyuwá'kwe, nawa txãana sũhmeene'kwe.
15 Txãa pa'gatey txãa nasa ũusa' jxuka ewmeesaçxáa yuuna pa'jni'.
Txãa pa'gatx wẽse'jya' wa'lu',
Sa' txãawe'sx yafxju uykahmén,
Txãawe'sx thũ'wẽjuwa wẽse'khamen,
Yafxa' jxuka aphanita' txãawe'sx ũuste ew jiyukahmén.
Txãa pa'gatx adx tasxte pa'ja'çmée adx nuykatxhikahn jĩ'k.
16 Nawa i'kwe'sx yakha' wala yuh weçxa yuja' i'kwe'sx yafxju yuu uyi'kwe, sa' i'kwe'sx thũ'wẽju yuu wẽse'ji'kwe naa pa'ga.
17 Isath we'we', maazkuẽesawa Dxus yuwe pta'sxsa vxite' nasa ewsa nyafxiiwe'sxwa uy wẽetx i'kwe'sx uyna ũsi'kwe txã'sna, nawa uymeeta'. Wẽse'j wẽetx i'kwe'sx wẽse'jna ũsi'kwe txã'sna, nawa wẽse'jmeeta'.
Ejemplo yakh kaapiya'jni's ãate pta'sxni
(Mr 4.13-20; Lk 8.11-15)
18 Ãçxha' mjiyuwe skuutxh uuhsa's kaaja'da'jçxa pta'sxni's.
19 Naa kiwete Dxus jxkaahwa'ja's pta'sxni's wẽse'jçxawa jiyusame', skuutxh fxiw dxi'jsu ũsxisáa na'wẽsata': Nasa' Dxus yuwe's wẽse'thewa, eçxthẽ'ja' pa'jçxa ũusuh kutxi'jina.
20 Skuutxh fxiw kwet kajkwesu ũsxisa' Dxus yuwe's wala weçxana jxpa'gasa na'wẽsata'.
21 Nawa Dxus yuwe's açxamée çxhãçxha yaakxsa' çxhãçxha'çmeeta'. Txã'wẽ Dxus yuwe's jxpa'gapa'ga, pkxuuwa'j en pa'theçxáa jxuka fxĩykaja'tx.
22 Skuutxh fxiw çhũçh ksxavxysu ũsxisa' Dxus yuwe's wẽse'jçxawa naa kiwetewe'sxçxá's wejx wala yajkxna ji'phunisaçxá's pa'pçxusa na'wẽsata'. Aça' txã'wẽsaçxá's wejx wala yajkxte', txãaçxáa jxuka knayu'k Dxus yuwe yu'sa' kaapeçxkana'jna.
23 Nawa skuutxh fxiw kiwe ewte ũsxisa' Dxus yuwe's wẽse'jçxa kxtey yuusáa na'wẽsata': Skuutxh spiigawa ma'wẽga cien vxite' sesenta vxite' treinta nxinx ji'phu', txã'wẽyku txãawe'sx ũuste Dxus yuwe' wala pena' jĩk.
Jxũth ewmeesa skuutxh ksxavxyte buçxasa
24 Jesusa' vxite ejemplo na'wẽk kaaja'da'jçxa pta'sx:
—Naa kiwete Dxus jxkaahni ente Dxus yuwe ewsaçxá's pta'sxtewa, na'wẽ yuuna: Teeçx mjĩisa' txajx kiwete fxiw ewsa'sku uh.
25 Nawa jxukaysa dejeçpkaçxha', uuthasx namu's açesa pa'jçxa ũ'nimeesa'sku skuutxh ksxavxyte uhçxa u'j.
26 Aça' skuutxh buçxaçpkaçxha', txãa ksxavxyte jxũth tasx ũ'nimeesawa vxyaak.
27 Txã'wẽ yũute', selpisaawe'sxa' na'jĩnatx namu's pta'sxya' u'j: Idxa' fxiw ewsaçxá'sgu uh, aça' naa jxũth tasx ewmeesa' ¿ma'wẽ yũuçxaga buçxa? jĩte',
28 namu' na'wẽk pas: Maa açesa uhne'ta jĩk. Txajũ' selpisaawe'sxa' pẽjxtxi: ¿Txãa jxũth tasx ewmeesa's khubeya' u'jmtha'w? jĩte',
29 namu' na'wẽk we'we: Kuçx yuunuwe. Txã'wẽme', petx skuutxh tasx yã'jçxa ya'khubeetxna.
30 Manvxihtwe, peekx walaatxna, skuutxh wakawa'j en ãhpkaçx. Txãa ente adxa' jxkaaja'nja mjĩisatxi', aça' jxũth tasx ewmeesa khuẽ'yna jxuka khubeçxa tudutxna kabwa'j. Txã'wẽ yũuçxa skuutxha's adx yatte jxaawuutxna jĩk.
Mostasa fxiwa's kaaja'da'jnisa
(Mr 4.30-32; Lk 13.18-19)
31 Jesusa' na'wẽk pta'sx vxite ejemplo kaaja'da'jçxa:
—Naa kiwete Dxus jxkaajxa' takhni ena' na'wẽsa': Teeçx mjĩisa' mostasa fxiwa's kiwete ujk.
32 Txãa fxiwa' maa maa fxiwtewa thaakwe le'çxkuẽesa'. Nawa buçxayã'jçxa', maa ũ'tasxtewa jxthaakwek walá'. Aça' txã'wẽ seena' walaate', vxiçxakwe yuhwa pa'jçxa ku'tasu yaatu'tx jĩk.
Lewadura's kaaja'da'jnisa
(Lk 13.20-21)
33 Vxite ejemplo kaaja'da'jçxa na'wẽk pta'sx:
—Naa kiwete Dxus jxkaahni ena' na'wẽ yũuwa'jsa': Teeçx u'y panu'juççxa', tekh libra skuutxh ũ'wete lewadura's ka'dte ma'wẽ jxuka pẽethejekx txã'wẽ yũuwa'jsa' jĩk.
Ejemplo yakh kaapiya'jwa'ja's pta'sxni
(Mr 4.33-34)
34 Jesusa' ejemplo kaaja'da'jçxa yuuçxáak pta'sxi' nasa jxukaysatx. Ejemplo kaaja'da'jmée yu', pta'sxi'çme'.
35 Txã'wẽ yũuwa'ja's Dxus yuwe pta'sxsa na'jĩna fxi'kh txãak kxtey yuu. Na'wẽk fxi'j:
Kim yuhtxwa kaajiyu'jnimeesa ũsyã'jtx yu' naa kiwe's vxitiyna txã'sna pta'sxi'nja ejemplo kaaja'da'jçxa yuuçxáa jĩnak fxi'j.
Jxũth tasx ewmeesa's ãate kaajiyu'jnisa
36 Txajũ' Jesusa' nasa tasxuh txuteeçxa yattek u'ka, aça' txãa yakh u'jusawe'sxa' utxaaçxa na'wẽtx pẽjx:
—Jxũth tasx ewmeesa's kaaja'da'jna we'weni's ãate mkaajiyu'j jĩte',
37 Jesusa' pta'sxku:
—Fxiw ewsana uuhsa' Dxus Nçxi'k Nasa Yuusá'.
38 Aça' uuthasx jĩnisa' naa kiwe'. Fxiw ewsa jĩna we'we'th txãa yu' nasa Dxus jxkaahnite ũswa'jsatxthu txã'jĩ'. Sa' eçxthẽ'j nasa yuutxi' jxũth tasx ewmeesa jĩ'th.
39 Aça' jxũth tasx ewmeesa's uuhsa yu', eçxthẽ'jíiçxá'. Skuutxh wakawa'j en jĩ'th txãa yu' naa kiwe pçuwa'ja'sthu txã'jĩ'. Aça' ũ'a's pkhakhsa', Dxus angeleswe'sxta'.
40 Jxũth tasx ewmeesa's ma'wẽta pkhakhçxa ipxte abu' çxhavxykahn, txã'wẽy yũuni yuuna naa kiwe pçuute'.
41 Dxus Nçxi'k Nasa Yuusá' angeleswe'sxtxi kajana txã'wẽ ewmée yũuna vxitetx pkalte kweete'jna ũssawe'sxtxi txajx jxkaahna ũsnijũ kutxi'jçxa
42 ipx walate akhkahn. Kxteea' seena' yuh pebeetxna ki'thtxi ksuusu'jna.
43 Naapkaçxha' Dxus jxthãasni's kxtey yuusa' sek na'wẽ eena' kweethetxna Tata cielute jxkaahna ũsnite. I'kwe'sxa' jiyuwa'jsa ũsçxa', jiyune'kwe.
Iiméh pa'gasa's sũthçxa txaahnisa
44 Naa kiwete Dxus jxkaahna ũsni ena' iiméh seena' pa'gasa's kiwe dxiite sũthçxa txaahni na'wẽsa': Teeçx piçthẽ'jwa ma'wẽ txã'wẽ pa'gasa's uyçxa', ãçxhíi yu' jxũna u'jya' ãjameeçxa kxteyçxáa wejx ew sũthçxa txajakx, sa' wala weçxana u'jçxa txajx ji'phuni's jxuka txweyçxa txãa vxyuju kiwe's weyuukx mteene' ewsa's sũthçxa txah txãa kiwe's txã'wẽysa'.
Perla iiméh pa'gasa's uyni
45 Naa kiwete Dxus jxkaahna ũsni ena' na'wẽsa': Perla zhiçxkwesa's weysaawa ma'wẽ pakweçxa
46 teeçx perla iiméh pa'gasa's uyçxa', txajx ji'phuni's jxuka txweyçxa txãa vxyuju perla's weyuukx txã'wẽysa'.
Wedx ukhe yakh kaaja'da'jçxa kaapiya'jni
47 Naa kiwete Dxus jxkaahna ũsni ente' na'wẽ yũuwa'ja': Wedx ukhe'swa ma'wẽ ĩkhwalakhẽ akhte', wedx ma'wẽsatxwa jxuka pkhakhekx.
48 Aça' wedx uwesá' ukhe's tuhmete kutxi'jçxa wedxtxi txhitxhya' kaçxçxa ewsa's kanastate ãsxçxa', ewmeesatxi' ĩkhwalakhẽ ãsxitxki
49 txã'wẽy yuutxna Dxus angeleswe'sxa' naa kiwe pçuwa'j en ãhte'. Sa' txãawe'sxa' ewmeesatxi' ewsa ksxavxyuh txhitxhçxa ipx walate akhetxna.
50 Kxteea' seena' yuh pebeetxna ki'thtxi ksuusu'jna.
Nyafxíi kaapiya'jni'swa jiisa u'sesa'swa jiisawe'sx
51 Txã'wẽ kaapiya'jni's Jesusa' na'jĩnak pẽjx:
—¿I'kwe'sxa' jxuka jiyukwe' na'wẽ pta'sxni's? jĩte', txãawe'sxa':
—Jiyuíitha'w jĩnatx pas.
52 Aça' Jesusa' na'wẽk we'we:
—Dxus jxkaahwa'j ena's jiyusa' ley kaapiya'jsawa ma'wẽ nyafxíi kaapiya'jni's piyaçxa kaapiya'jni u'sesa'swa jxpa'gaçxa wala jiisa yuukx txã'wẽy e'z jwed jiisa yuutxna jĩk.
Jesusa' Nasaretna u'jni
(Mr 6.1-6; Lk 4.16-30)
53 Naa ejemplotx Jesusa' pta'sxna jxã'jçxa', txajũ u'kh txajx kiwen.
54 Kxteea' judiuwe'sx pkhaakhenitek kaapiya'jna ũsu'. Aça' nasa' kuh yajkxna na'jĩ'tx:
—Naa piçthẽ'ja' ¿mteeki'k txakwe wala piya txã'wẽ ãjaya'? ¿Ma'wẽ yũuçxaga txã'wẽ kim yuhwa ãjanimeesa's kaavxya'ja'ja'?
55 Naaíi ¿karpintero nçxi'k meená', aça' njĩ'ja' Maria meená'? Aça' txajx nyakhwe'sxa' Jakobo, Jose, Simon, vxite' Judas txãawe'sxta',
56 aça' txajx npe'sxwe'sxwa ayte kwe'sx yakh ũsta'. ¿Majũki'k piya na'wẽ kĩhnawa jxuka ãjawa'ja's?
57 Txã'wẽ jiitx yu', txãa pa'gatx Jesus we'weni's kxtey yuumée. Nawa Jesusa' na'wẽk we'we:
—Dxus yuwe pta'sxsa' peekx kiwesu vxite' peekx yattewe'sx weeçxni yuuçxáa fxi'zetxna maawa jĩçxa',
58 kim yuhwa ãjanimeesa's jwee yu' kaavxya'ja'jme', txãawe'sxa' txajx we'weni's kxtey nwẽese'jmeeta' naa pa'ga.