9
Teeçx piçthẽ'j uyya' ãjasame's Jesus yu'çe'jni
1 Jesusa' u'jweççxa', teeçx piçthẽ'j naa kiwete upxhí uyya' ãjasame'sku puutx uy.
2 Aça' txãa yakh u'jusawe'sxa' Jesusa's na'wẽtx paapẽjx:
—Naa piçthẽ'ja' ¿kĩh yuupa'gaki'k txã'wẽ yafx ji'phmée upxna ũsu'? ¿Txajx pkalpa'ga ma'k txã'wẽ nxus ji'phu, meeçxa' neywe'sx pkalpa'ga wá' txã'wẽ yuu? jĩte',
3 Jesus pasçxa' na'jĩk:
—Txajx pkalpa'gawa me', sa' neywe'sx pkalpa'gawa meek txã'wẽ yuu, naasáa Dxus ewuni's ãate kaavxya'ja'khançxáak txã'wẽ yuu.
4 Txãa pa'ga kaahsa mjĩia's ãate kaavxya'ja'jna mjĩiwa'j ji'pthu nee en ũsiyna. Txã'wẽme' kus yã'the', kim yuhwa mjĩiya' ãjameena.
5 Adxa' naa kiwete nee ũsíiçxáawa, nasatx eena'te kaafxi'ze'jwa'jsath.
6 Txã'jĩçxa', kiwe's fxne'sxju tuupha'çxa txãa piçthẽ'j yafxte sxũsxna'wa,
7 na'jĩnak jxkaah:
—Me'j pkhi'kxya' Siloé yu'kafxte. (Txãa Siloea' Jxkaahnisa jĩni'.)
Txajũ' txãa piçthẽ'ja' u'jçxa', yafxtxi pkhi'kxku, sa' uyna yã'kh sxawedna kũh.
8 Aça' txajx yat utxasuwe'sx vxite' nyafxíi txã'wẽ yafx ji'phmée upxsatewa ew jiisa' na'wẽtx we'we:
—Naa piçthẽ'jí ¿nyafxí' lmusxnu pẽjxna u'psa meená'? jĩte',
9 maaíi yu':
—Txãaíik jĩ'tx. Naapkaçxha' vxite':
—Txãa na'wẽ yuh thegu'k, nawa txãame' jĩ'tx. Nawa txãa piçthẽ'j yu':
—Adxíith jĩk.
10 Txajũ' pẽjxtxi:
—Idx upxnijũjx uyya' ãjameeçxa', ãçxha' ¿ma'wẽ yuuçxaga uyya' ãja'? jĩte',
11 pta'sxku:
—Teeçx piçthẽ'j Jesus yaasesa' kiwe's fxne'sxju tuupha'çxa adx yafxte sxũsxna'wa na'jĩk: Me'j pkhi'kxya' Siloé yu'kafxte jĩte', u'jna'wa pkhi'kxthu, aça' adx yafxa' phatetx aça' uyu'th jĩte',
12 paapẽjxtxi:
—Idxa's txã'wẽ kaahsa' ¿mtee ũsna? jĩte':
—Jiimeeth jĩnak pas.
Fxariseowe'sx txãa piçthẽ'ja's paapẽyni
13 Txajũ' txãa piçthẽ'ja's pe'jna u'jtx fxariseowe'sx tasxna.
14 Jesus txã'wẽ kiwe's fxne'sxju tuupha'jçxa uyya' ãjasame's yu'çe'jni' ki'swa'j enne' yu'.
15 Aça' fxariseowe'sxa' ki' paapẽjxtxi txãa piçthẽ'ja's:
—¿Ma'wẽ yũuçxaga ãçxha' uyya' ãja'? jĩte', na'jĩnak pta'sx:
—Kiwe's fxne'sxju tuupha'çxa adx yafxte sxũsxku, aça' pkhi'kxthu sa' uyya' ãjath jĩk.
16 Txajũ' fxariseowe'sx maaíi yu' na'wẽtx we'we:
—Txã'wẽ yũusa' Dxus luuçx meena, ki'swa'j ena's ki'su'çme' na' jĩte', vxite' na'wẽtx we'we:
—Pkalsaçxa', ¿ma'wẽ txã'wẽ kim yuhwa ãjãnimeesa's kaavxya'ja'jya' ãjãkx?
Txajũ' txãawe'sxíiçxáa txã'wẽ we'weçxa', puutx puiidxi'tx neeyũu.
17 Sa' txãa piçthẽ'ja's ki' paapẽjxtxi:
—Iidx yafxa's yu'çe'jsa' ¿kimna sũju'ga? jĩte':
—Txã' Dxus yuwe pta'sxsana sũju'th jĩnak pas.
18 Txã'wẽ upxnijũjx uyya' ãjasameeçxawa ãçxha' uyu'th jĩtewa, judiuwe'sx yu' txã'wẽne' yu' sũju'çmeeta'. Sa' txãa piçthẽ'j neywe'sxtxi pa'yaçxa',
19 paapẽjxtxi:
—¿Naa txã'wẽ i'kwe'sx luuçx upxnijũjx uyya' ãjasameena wakx? Sa' ¿ma'wẽ yũuçxaga ãçxha' uyya' ãja'? jĩte',
20 neywe'sx pasçxa':
—Na' kwe'sx luuçx yuja', txã'wẽ upxhíi uyya' ãjasameetewa txã'sa' jiitha'w.
21 Nawa jiimeetha'w ma'wẽ yũuçxane' ãçxha' uyya' ãja'. Sa' kim txã'wẽ yafxtxi' yu'çe'thewa txã'snawa jiimeetha'w. Txã's yuu mpẽjxwe, txã' thẽ'jsayã'ja' na' txãa pta'sxina.
22 Paapẽysatxi' ũukhçxatx txã'wẽçxáa pas. Txã'wẽme' maa txã'wẽ Jesusa' Dxus kaahni Kristo' jĩna tuuthe'jena txã'sa' fxariseowe'sxa' ahçeçxa peena yu' txãawe'sx pkhaakhenite kaapa'ja'jya'méetx ũsu'.
23 Aça' txã'wẽ yuuya'watetx ũukhçxa: Na' thẽ'jsayã'ja' na' txãa pta'sxina jĩnaçxáa pasu'.
24 Txajũ' fxariseowe'sxa' txãa piçthẽ'ja's ki' pa'yaçxa' na'wẽtx we'we:
—Dxus dxi'pte ĩsxiimée mpeeta'sx. Kwe'sxa' jiitha'w iidx yafxtxi yu'çe'jsa' pkalsatewa jĩte',
25 txãa piçthẽ'j pasçxa' na'jĩk:
—Pkalsa wáana nawa adxa' jiimeeth. Adxa' na'wẽçxáa jiith: nyafxí' uyya' ãja'çmeeth, nawa ãçxha' uyu'th jĩte',
26 ki' paapẽjxtxi:
—¿Kĩhga yũu? sa' ¿ma'wẽçxah yũuçxaga iidx yafxtxi' yu'çe'j? jĩte',
27 txã' na'wẽk pas:
—Pta'sxyã'th, nawa pta'sxtewa açewe'we'çxáa i'kwe. Sa' ¿kĩjxa'kwe peena pta'sxkaja'? ¿I'kwe'sxwa txãa yakh u'ju wẽje'wá'kwe? jĩte',
28 na'jĩnatx wẽesxũu:
—Idxa' txãa yakh u'jusag. Nawa kwe'sxa' Moises jxkaahni's nwẽese'jsatha'w.
29 Kwe'sxa' jiitha'w Dxusa' Moises yakh puutx we'wek. Nawa txãa thẽ'ja's majũwe'sxtewa jiimeetha'w.
30 Txajũ' txãa piçthẽ'ja' na'wẽk we'we:
—Wala yuh fxiya', adx yafxtxi yu'çe'jsa's majũwe'sxtewa i'kwe'sxa' jiyumeete'.
31 Maawa jiitha'w Dxusa' pkalsawe'sx we'weni's pasu'çme', naasáa Dxusna yajkxçxa txajx jxkaahni's kxtey yuusaçxáatxku Dxusa' pasu'.
32 Bagaçxte yuhwa iiwẽse'jmeetha'w upxhíi uyya' ãjasameetx ki' kaauyu'jni yu'sa'.
33 Adx yafxtxi yu'çe'jsa' Dxus kaahnisameewaça', txã'wẽ kaauyu'jya' ãjawa'jmeene' yu' jĩte',
34 na'wẽtx wẽesxũu we'we:
—Idxa' upxhí iidx ũuste pkalçxaçxáa uta ji'ph upxsag na' ¿ma'wẽtega kwe'sxtxi yu'kxpeh wẽje'? jĩna açewe'weçxa', neeutx peena yu' jxpa'gaya'mée.
Uysaaçxawa Dxus yu's jiimeesa
35 Txajũ' Jesusa' txãa piçthẽ'ja's neeuni's jiyuçxa', ki' puutx uyçxa' na'wẽk pẽjx:
—¿Dxus Nçxi'k kimtewa jiigá'? jĩte',
36 txãa piçthẽ'j pasçxa':
—Mpeeta'sx adx jiyukahn jĩna pẽjxte',
37 Jesusa' pta'sxku:
—Idxa' Dxus Nçxi'ka's iiuyyã'jg. Adxíith, aça' idxa' txãa yakhgu puutx we'we'.
38 Txã'jĩte', txãa piçthẽ'ja' Jesus tasxte peejxũkweçxa':
—Idxa' Dxus Nçxi'k yuh yu'ga sũju'th jĩte',
39 Jesusa' na'jĩnak pta'sx:
—Adxa' na'wẽ yuuya'íiçxáath naa kiwete kĩh, uyya' ãjasameeçxawa uyya' ãjãkahn, aça' makwe uysaaçxawa uyya' ãjãkahmén.
40 Txajũ' fxariseowe'sx kxtee ũssa' txã'wẽ wẽse'jçxa', na'wẽtx pẽjx:
—Kwe'sxwa uyya' ãjasameewá'ntka'w jĩte',
41 Jesusa' na'jĩnak pta'sx:
—I'kwe'sxa' uyya' ãjãsamée dxihwaça', yuuwesamée yuune'kwe. Nawa uyu'tha'w jĩ'i'kwe na', txãa pa'ga Dxus dxi'pte' yuuwesai'kwe jĩk.