20
Jesus ki' ĩtxi yuuni
(Mt 28.1-10; Mr 16.1-8; Lk 24.1-12)
1 Ki'sen khikhiiçte wala kusíi çxhi'dxtey Maria Magdalena' pedaní kafxte kũhçxa', kxtee aphni kweta's kiisniyã'j ũstek uy.
2 Txajũ' wuwuuçxáak u'j Simon Pedro vxite' Jesus wedxnisa tasxte pa'j. Sa' na'jĩnak pta'sx:
—Kwe'sxtxi jxpe'jsa kakwe's jxũna u'jne'ta pedaniijũ, aça' jiyumeetha'w mkaane'ta khikh nanwa jĩte',
3 Pedrowe'sxa' teehwed pedani kafxte thegya' u'jtx.
4 E'zíi wuwuuçxáatx u'j, nawa teeçxsa' thaakwe dud wuwuuçxa Pedro's phyahççxa' txãa khuẽ'y yaçte kũjk pedani kafxte.
5 Sa' kuyçxa' Jesus kakwe's yapnisaçxáa u'ptek uy. Nawa txã'wẽ uyçxawa, dxiite yu' u'kame'.
6 Txajũ' Pedrowa e'ste kũhçxa pedani kafxte u'kak, sa' txãawa uyku Jesus kakwe's yapnisaçxáa ki'pni u'pte.
7 Sa' Jesus dxikthé yapnisa yu' tpehgçxa fxiite ki'pni u'ptek uy.
8 Aça' yaçte kũusawa kafx dxiite u'kaçxa', txã'wẽ tpehgçxa ki'pni u'pte uyçxa', Jesusa' ĩtxi yuu yuhgakx sũhwa'ja's ji'phuk.
9 Nawa Jesusa' uuçxa ki' ĩtxi yuuna jĩna Dxus librute fxi'jni's jiyumeytxi yu'.
10 Txajũ' Pedro Juanwe'sxa' txã'wẽ uyçxa', yatna ki' sxawedna u'jtx.
Maria Magdalena's Jesus vxyaani
(Mr 16.9-11)
11 Pedrowe'sx u'jweçpkaçxha', Maria Magdalena' pedaní kafx pukate ũ'nena neeyũuk. Txã'wẽ ũ'nena u'píi, kafx dxiiga kuyçxa' uyku
12 e'z angeleswe'sx çxihmeçxáa iikãh jxaathsatx Jesus kakwe's khikhnite pdxi'p kaçxçxa u'pu', teeçxsa' dxikthé ja'date vxite' çxida ja'date.
13 Txajũ' angeleswe'sxa' na'wẽtx pẽjx:
—I'kwe' ¿kĩh yũuçxa ũ'nena ũskwe? jĩte', na'jĩnak pas:
—Ũ'kwe's jxpe'jsa's jxũna u'tha, aça' jiimeeth mkaane'ta khikh nanwa.
14 Txã'wẽ we'wepu'na' yu'thegçxa', teeçx piçthẽ'j yujuçxa ũstek uy. Nawa txã' Jesusna sũhme'.
15 Aça' Jesusa' na'jĩk:
—I'kwe' ¿kĩh yuutekwe ũ'né'? sa' ¿kimnakwe pakwé'? jĩte', Maria' kxtee walta thegsa wá' txã'wẽ we'we' sũhçxa', na'wẽk pas:
—Idx wá'ga ũ'kwe's jxpe'jsa kakwe's jxũna u'j na' mpeeta'sx mkaa khikhçxawa, ũ'kwe jxũna u'khan.
16 Txã'jĩte' Jesusa':
—¡Maria! jĩnak kxsus.
Aça' Maria tuphiçxa na'wẽk we'we hebreo yuweju:
—¡Raboni! jĩk, txã' Kaapiya'jsa jĩni'.
17 Txajũ' Jesusa' na'jĩk:
—Adxa's jxa'dxnuwe, Tata tasxna u'jmeythu naa pa'ga. Wejxwa adx yakhthẽ'jwe'sxtxi pta'sxya' me'jwe na'jĩna: Adx Tata' i'kwe'sx Tataíiçxá', sa' adx Dxusa' i'kwe'sx Dxusíiçxá' txajx tasxna u'jweçthu jĩnak pta'sxkaah jĩne'kwe.
18 Txã'wẽ pta'sxkaathe', Maria Magdalena' pta'sxya' u'kh: Jxpe'jsa's uythu, aça' txãak txã'jĩna pta'sxkaah jĩk.
Jesus txãa yakh u'jusawe'sxtxi vxyaani
(Mt 28.16-20; Mr 16.14-18; Lk 24.36-49)
19 Txãa ki'sen entey kusa' Jesus yakh u'jusawe'sxa' yatte u'kaçxa vxitxtxi jxuka aphçxatx ũsu', judiuwe'sxtxi ũukhçxa. Txã'wẽ ũspkaçxha', Jesusa' txãawe'sx pxãhte vxyaaçxa na'jĩnak weçxa:
—Ũukhmée wẽt wẽtçxáa yajkxna meswe.
20 Txã'jĩçxa', txajx kuse kpã'tx pta'sxku, tabxte we'thu yãjani'swa txã'wẽy. Aça' txãawe'sxa' Jesusa's uyçxa' wala weçxweçxa yajkxtxi.
21 Txajũ' Jesusa' ki' we'weçxa na'jĩk:
—Ũukhmée wẽtwẽtçxáa yajkxna meswe. Adx Tatawa ma'wẽga adxa's kaah txã'wẽy adxwa i'kwe'sxtxi kajaçthu.
22 Txã'jĩçxa', txãawe'sx kajkwesu puthku na'jĩna:
—Miipa'gawe Dxus Espiritu's.
23 I'kwe'sxa' maatxwa we'weçxa': I'kwe'sx pkaltxi' Dxusa' peltunaĩna jĩte', peltunãyni yuutxna. Nawa peltunaĩmeena jĩte', peltunãynimée neeyũutxna jĩk.
Jesus ĩtxi yuuni's Tomas uyni
24 Jesus yakh u'jusaçxawa, Tomas melxisu jĩnisa' meek yu' Jesus txã'wẽ vxyaani ente yu'.
25 Aça' Tomas yu' uymeetewa, Jesus yakh u'jusa vxite yu' pta'sxtxi:
—Kwe'sxtxi jxpe'jsa's uytha'w jĩna.
Txã'wẽ pta'sxtewa, Tomasa' na'jĩk:
—Kusete klaus kpã'vxitni's uyçxa txajx tabxte we'thu yãjani'swa uyçxa txkaa adx kuse's kaahmeeçxa yu', txã'wẽ ĩtxi yuune' sũhme'nja jĩk.
26 Txajũ' teeçx ki'su skhẽwniite', Jesus yakh u'jusawe'sxa' ki' pkhaakheçxa ũsu'tx teeçx yatte. Aça' txãa ente' Tomaswa txãawe'sx yakh pkhaakhena ũsu'k. Aça' makwe vxitxtxi aphçxa ũstewa, Jesusa' txãawe'sx pxãhte vxyaaçxáak yuu, sa' na'jĩk:
—Ũukhmée wẽtwẽtçxáa yajkxna meswe jĩk.
27 Txã'wẽ we'weçxa', Tomasa'swa na'jĩk:
—Adx kusete kpã'yuunitx thegçxa, txkaa iidx kuse's mkuupath, sa' adx tabxte we'thu yãjanigawa mkuupath. Txã'wẽ yũuçxa', kuh jwed yajkxmée, ĩtxi yuu yuhga sũhwa'jçxá's ji'phune'ga jĩte',
28 Tomasa' na'jĩk:
—¡Adxna jxpe'jsa yuhg, sa' adx Dxus yuhg!
29 Txajũ' Jesusa' na'jĩk:
—Tomas, ãçxha' adxa's uyçxa', ĩtxi yuu yuhga sũhwa'ja's ji'phug. Nawa adxa's uymeeçxawa txã'wẽ ĩtxi yuu yuhne' sũhna yaakxsawa weçxweçxa fxi'zewa'jsata' jĩnak we'we.
Jesukristo' Dxus Nçxi'k yuh yu'k jĩna pta'sxsa' naa libru'
30 Naa kiwete kim yuhwa ãjanimeesatx Jesusa' wala kuh kaavxya'ja'kh txãa yakh u'jusawe'sxtxi. Nawa jxuka yu' naa librute fxi'jnimeeta'.
31 Nawa Jesukristo' Dxus kaahni txajx Nçxi'k yuh yu'ga sũhna jiyuçxa' txã'sna jxpa'gaçxa', pçumée ĩtxi fxi'zewa'ja's ji'phukahn pta'sxna fxi'jnisaçxáata'.