12
Wẽt putasa's Jesus çxidakhẽ teeçx u'y awni
(Mt 26.6-13; Mr 14.3-9)
1 Paskua fxiesta ãjxa' seis en peejiyna, Jesusa' Betania çxhabna u'kh, Lasaro uuniitewa ĩtxi vxitku kxtee.
2 Kxteea' ũ'wa'j pheu'jtx Jesusna weçxana, naapkaçxha' Marta yu' puuçuçsak yu'. Aça' Lasaro' Jesus yakh kaçxku ũ'ya'.
3 Txajũ' Maria' teeçx libra ãjk wẽt putasáa wala pa'gasa's jxũna pa'jçxa', Jesus çxidakhẽ sxũsxçxa', txajx dxkhasjuk adxi'. Aça' yat dxiite txãa wẽt putasaçxáa jxuka utak.
4 Txajũ' Jesus yakh u'jusa Simon nçxi'k Judas Iskariote yaasesa' Jesusa's ikhkahn dukhwa'jsa' na'wẽk we'we:
5 —¿Ma'wẽteki'k naa u'ya' wẽt putasa's tres cientos pesote txweyçxa nasa puuplesatx peesu'çmée? jĩk.
6 Nawa Judasa' puuplesatx pees jxthãasçxa txã'jĩçme'. Txã' vxyuu jxaawsak yu', nawa vxyuu pkhakhnitx kim yuhwa jiyunimée paaçte nkuutxi'ji'u'ga, txãasak txã'wẽ we'we'.
7 Txajũ' Jesusa' na'wẽk we'we:
—Naa u'ya's txã'wẽ yuja' we'wewa'j ji'phmeeg. Naa wẽt putasa's adx kakwe's pedaaçtewe'sxku jxaawni ji'phu'.
8 Puuplesa' bagaçxtewa i'kwe'sx yakh nes yuutxna. Nawa adxa' jwee yu' i'kwe'sx yakh nes yuuwa'jsameeth jĩnak pta'sx.
Lasaro's ikh wẽeni
9 Jesusa' Betaniate ũsa' jĩni's jiyuçxa', judiuwe'sx wala kuhsa pkhaakheçxa Jesusa's thegya' txãa çxhabna u'jtx. Nawa Jesusçxá's thegya' u'jmée, Lasaro's ja'datx thegya' u'j, txã'sa' uuniitewa Jesusa' ki' ĩtxi vxitku txãa pa'ga.
10 Txajũ' sacerdote npiiçthẽ'jwe'sxa' puutx we'wetx Lasaro'swa ikhya',
11 txã's Jesus ĩtxi vxitpa'gaçxáa judiuwe'sx wala yã'j txuteeçxa Jesus yakhtxi u'jweç yu' naa pa'ga.
Jerusalente Jesus u'kani
(Mt 21.1-11; Mr 11.1-11; Lk 19.28-40)
12 Jerusalente Paskua fxiestate nasa wala pa'tha. Sa' kuskus enkhẽ' Jesuswa Jerusalente fxiestate pa'jana jĩni's jiyuçxa',
13 lamus eç spẽ'thçxa Jesusa's pu'thegya' kasehtx. Sa' na'jĩnatx sus we'we':
—¡Dxus txakwe ewte, teeçx yuja' Dxus kaahni, Israelwe'sxtxi Jxkaahsa wala ewsa'! jĩnatx weçxá'.
14 Txajũ' Jesusa' teeçx buçxu ũste uyçxa', txãatek a'jçxa u'j, Dxus librute na'wẽ fxi'jni' txãa kxtey yuukahn:
15 Ũukhnuwe, Sion çxhabtewe'sx.
Mthegwe, i'kwe'sxtxi Jxkaahsa yuja', teeçx buçxute a'jçxa jĩnak fxi'jni yu'.
16 Txãapkaçxhíi yu', Jesus yakh u'jusawe'sxa' jiyumeeta' txã'wẽ yũuni's. Nawa Jesus cielun u'jnite', jiyutx txã'wẽ fxi'jni' kxtey yuutewa.
17-18 Txã'wẽ uusá's Jesus ĩtxi vxitpa'gatx nasa jiyuwẽesa' txakwe wala pu'thegya' kaseh, Lasaro's ĩtxi vxituçte' kxtee ih thegna ũssa' jiimeesatxwa pta'sxne'ta txãa pa'ga.
19 Txajũ' txã'wẽ nasa pu'thegya' kasehpa'gaçxáa fxariseowe'sxa' na'jĩnatx ũusçxa we'we' txãawe'sx pwe'sx:
—Mthegwe wakx, kĩh yuhwa yũuya' ãjaçmeetha'w, naapkaçxçxáa nasa' jxukay Jesus yakhçxaçxáa u'jweçta' jĩ'tx.
Greciajũwe'sx Jesusa's pakwení
20 Jerusalente fxiesta ente jxu'j kiwe Greciajũwe'sx pa'jçxa ũsu'tx.
21 Txajũ' Greciajũwe'sxa' Galilea kiwesu Beçaidatewe'sx Fxelipe's utxaana kũhçxa', na'wẽtx pxthaa we'we:
—Jesusa'stha'w puutx uy wẽje' jĩte',
22 Fxelipe' u'jçxa Adresa's pta'sxku, sa' txajũ' e'zsay Jesusa's pta'sxya' u'jtx.
23 Aça' Jesus we'weçxa':
—Dxus Nçxi'k Nasa Yuusa' uuçxa ki' ĩtxi yuuwa'j en ãjaça'.
24 Na'jĩ'th na': Teeçx skuutxh nxinxa' kiwete weteçxa uumeeçxa yu', pehnamée teeçxçxáa nes yuuna. Nawa uuçxa buçxaçxa', jweeíiçxáa penana.
25 Maawa naa kiwete ĩtxĩ fxi'zewa'jçxá's yaakxsa' pçuwa'jmée ĩtxĩ fxi'zewa'ja's ivxiitutxna. Nawa naa kiwete ĩtxĩ fxi'zeni's yaakxsame', pçuwa'jmée ĩtxĩ fxi'zewa'ja's ji'phutxna.
26 Maawa adxa's selpíi wẽeçxa', adx yakh yuweena, sa' adx mtee ũste' txãawa kxtey ũsya' ãjana adxna selpiisa'. Aça' maawa adxna selpisaatxi's adx Tata' tuuthe'jena.
Jesusa' txajx uuwa'ja's pta'sxni
27 Ãçxha' wala nxusna ũsthu, sa' ¿ma'jĩtka? Meeçxa' Tata, adxa's meen nwe'we pxthaa yuukahmen jĩte, ewwáanakx. Nawa txã'wẽ pxthaa yuuya'íiçxáath yuwé' na' txã'jĩme'nja.
28 Tata, maawa idxna jiyuwa'jçxá's mkaavxya'ja'j.
Txajũ' cielujũ we'weni na'wẽk pthũuse:
—Adxna jiyuwa'ja's kaavxya'ja'jyã'th. Nawa maawa adxa's jiyukahn ki' kaavxya'ja'jya'wath jĩnik pthũuse.
29 Aça' nasa' txã'wẽ cielujũ we'weni's wẽse'jçxa':
—Kpi'sxne' txã'jĩ jĩ'tx, naapkaçxha' vxite yu':
—Teeçx angelne' txã'wẽ we'we jĩ'tx.
30 Txajũ' Jesusa' na'jĩk:
—Txã'wẽ we'weni' adxna pta'sxna we'weme', i'kwe'sxtxi pta'sxnak txã'wẽ we'we jiyukahn.
31 Ãçxha' naa kiwete jxukaysa yuuwesa yuuwa'j en ãjk, naapkaçxha' naa kiwete jxkaahna ũssa eçxthẽ'j yu' peena yu' jxkaajxa' ãjãwa'jmeete neeyũuna.
32 Txã'wẽ adxa's ẽekhẽ ki'pnijũ', jxukaytxi nwe'weya' ãjã'nja.
33 Txã'wẽ we'weçxak kaajiyu'j ma'wẽ uuya'waçxawa.
34 Txajũ' nasa' na'wẽtx we'we:
—Kwe'sxa' Dxus librute leya's iiwẽse'tha'w, aça' Kristo' bagaçxte yuhwa uuwa'jmée ĩtxi u'juwa'jsa' jĩ'k. Aça' idxa' ¿ma'wẽga Dxus Nçxi'k Nasa Yuusa's ẽekhẽ ki'pni yuuna jĩna we'we'? Dxus Nçxi'k Nasa Yuusa' ¿kimna? jĩte',
35 Jesusa' na'jĩnak pas:
—Eena'sa' i'kwe'sx yakh nee ũsuna, nawa maz ençxáa ũsuna. Txã'wẽte' eena'te fxi'zewa'ja's mpa'gawe, eena'sa nee ũsiyna, kxah çxhi'dxsa' i'kwe'sxtxi kpajkxmeena. Txã'wẽme', çxhi'dxte u'jusa' maa dxi'j ewsatewa jiyuya' ãjã'çme'.
36 Nee i'kwe'sx yakh ũsiyna, eena'sa's mjiyuwe, kxah eena'te fxi'zesa yuune'kwe.
Txã'wẽ we'wena jxã'jçxa', Jesusa' u'jçxa vxyaame'.
Judiuwe'sxa' Jesusa's jxpa'gameeta'
37 Kim yuhwa ãjanimeesa's txakwe wala kaavxya'ja'thewa, nasa' jiyuya' ãja'çmeeta' Jesus kimtewa.
38 Nawa Dxus yuwe pta'sxsa Isaías fxi'jçxa nvxiitni' kxtey yuukahntxi txã'wẽ yuu: Kxte' na'jĩ'k:
Kwe'sx pta'sxni's ¿kimçxá' jxpa'gata'?
Dxusa' txajx ãjani's ¿kimtxiga kaavxya'ja'j? jĩ'k.
Kristo's jiyuya' ãjawa'jsameene'ta yu', txãa pa'gak Dxus yuwe pta'sxsa Isaiasa' txã'wẽ fxi'jçxa nvxiht.
39 Sa' Isaiasa' ki' we'weçxa':
40 Dxusa' txãawe'sx yafxtxi aphku uyya' ãjãkahmén.
Sa' txãawe'sx ũustxiwa nuywejik jiyukahmen,
Sa' Dxus tasxte sxawedçxa katxhiwa'ja'swa nvxihtme' jĩ'k.
41 Jesus ma'wẽ yuuwa'jsatewa jiyuçxak Isaiasa' txã'wẽ we'wena fxi'j.
42 Txã'wẽtewa, judiuwe'sx wala kuhsa Jesus kimtewa jiyutx, maaíi yu' npiiçthẽ'jwe'sx yã'jçxa. Nawa fxariseowe'sx ahçeçxa txãawe'sx pkhaakhenijũ kutxi'jçxa peena yu' pa'jwa'jmée vxitkahmen, ãate yu' pta'sxi'çmeeta' ũukhçxa.
43 Txãawe'sxa' nasaa tuuthe'jniçxá's wejx ji'phu wẽeçxatx txã'wẽ yu'.
Ney pta'sxkaahni's Jesus pta'sxni
44 Txajũ' Jesusa' na'jĩnak we'we:
—Maawa adxna ũuste jxpa'gasa', adxçxáana jxpa'gamée, adxna kaahsa Tatanawa jxpa'gana.
45 Txã'wẽy maawa adxna uysa', adx Tata'swa uysáa yuuna.
46 Adxa' nasatx eena'te kaafxi'ze'jya'th kĩh, kxah adxna ũuste jxpa'gasa' çxhi'dxte neeyũumeetxna.
47 Nawa maawa adx pta'sxni's wẽse'jçxawa kxtey nwẽese'jmeete', txã'wẽ yũusa's ewmeete nvxiitwa'jsa' adxmeeth. Adx yu' naa kiwetewe'sxtxi ewmeete nvxihtxa' yuwe'çmeeth, wejxwa nwe'weya'th yuwé'.
48 Adxa's wa'lçxa adx pta'sxnitxi' kxtey yuumeete', txã'wẽ yũusatx ewmeete nvxiitwa'jsa ũsa': ãçxh na'wẽ adx pta'sxna we'we'th txãa pta'sxnisa íiçxáa ewmeete nvxiitwa'jsata' nmeh ente'.
49 Txãa pa'gatey adxçxáa we'wena pta'sxiçmeeth. Adxna kaahsa Tataíik txã'wẽ pta'sxkaja',
50 kxah adxa' jiith adx Tata we'weni' bagaçxte yuhwa pçumée ĩtxi kaafxi'ze'jwa'jsatewa. Aça' adx Tata ma'wẽ pta'sxkaathe', txã'sna íiçxáath adxwa pta'sxi' jĩnak we'we Jesusa'.