8
Dxus u'se puutx we'weni's kxtey yuukahn pu'çxsa' Jesusa'
1 Na'wẽ pkalsawe'sx ju'gu Dxus tasxte we'we pu'çxsa jĩ'tha'w txã' maatewa jxthaakwe ewsa cielute Dxus pukate kaçxçxa
2 pkalsawe'sx ju'gu we'we pu'çxna ũsa' Dxus ũsnite yuu u'kaçxa. Txãa Dxus ũsni' nasaa txaahnisame', txã'sa' Dxus yuuk txah.
3 Pkalsawe'sx ju'gu we'we pu'çxna ũssa nyafxiiwe'sxa' pkalpa'ga tajkx ikhçxa Dxus altalte kabna nes yuuwa'jsa jĩçxa nvxiitnisatx yu'. Txãa pa'gak Jesukristowa kĩhçxáawa nuykũuwa'j ji'phu.
4 Jesukristo' naa kiwetee txã'wẽ pkalsawe'sx ju'gu we'we pu'çxna ũswa'ja's vxit wẽewaça', ãjawa'jmeene' yu', txã'wẽ ãjakahmeníi Moises ley nvxiitnisatx ũs yu' pkalsawe'sx ju'gu we'we pu'çxsa.
5 Nawa naa kiwete txã'wẽ pkalsawe'sx ju'gu we'we pu'çxsa' naasáa cielute ma'wẽçxah yũuwa'jna txã'sna kaajiyu'jniçxá'stxi selpi'. Txã'wẽ cielutewe'sxa's kaajiyu'jnisate íiçxáak Dxusna neewe'wena ũswa'j yat Moises txajaçte', Dxusa' na'jĩna we'we: Ew mtheg, sa' thã'j vxiçte adx ma'wẽ kaavxya'ja'the', txã'wẽy yũune'ga jĩk.
6 Nawa Dxus tasxte kwe'sx ju'gu we'we pu'çxsa Jesukristo selpiini' thaakwe ewa', txãa pa'gatey Dxus thaakwe ew pu'çxwa'ja's iiméh ew puutx we'wek txã'sna selpiina ũsa'.
7 Nyafxíi puutx we'weni' ew kasehwaça', e'su ki' puutx we'wewa'j peejxmeene' yu'.
8 Nawa txã'wẽ ew kasehpa'gamée, nasa' ewmée fxi'zepa'ga, Dxusa' na'jĩk:
Israel vxite' Judá yakh adxa' ki' u'se puutx we'wewa'j en pa'jana,
9 Egipto kiwejũ peeygãhna kutxi'jçxa i'kwe'sx yaçgawe'sx yakh puutx we'weth txã'wẽmée yuuna.
Txãa ente' adx puutx we'weni's kxtey yuumeeta',
Txãa pa'gath thegmée nvxiht.
10 Nawa txãa e'su' Israelwe'sx yakh na'wẽ puutx we'we'nja jĩ'k Dxusa':
Adx jxkaahnitxi's txãawe'sxtxi kaajiyu'jçxa, ũuste fxi'jçxa nvxiitu'nja.
Sa' adxa' txãawe'sx Dxus yu'nja,
Aça' txãawe'sxa' adx jĩi yuutxna.
11 Dxusa's jiyukahn teeçxsa na'wẽçxah kaapiya'jwa'j ji'phumeetxna, txãawe'sx nwe'sx vxite' txãawe'sx nyakhçxáa yuhtxwa,
Txãa pa'gatey le'çxkwesa ma'tx yuu meeçxa' thẽ'jsa ma'tx yuu nawa thẽymée jiyuya' ãjatxna adxa's.
12 Sa' txãawe'sx pkaltxi peltunãyçxa, peena yu' bagaçxteçxáa yuhwa yajkxme'nja txãawe'sx pkaltxi's jĩ'k.
13 Dxusa' ki' vxite u'se puutx we'wewa'j ji'pthu jĩçxa', yaçíiwe'sxa' selpiime' jĩçxane' txã'jĩ'. Aça' selpimée yuuna pa'jsa' skhẽwwa'jsana.