13
Kama'da'ihi ida Paulo, Barnabé vihiki vaadahana varani hini
1 Hari. Oniaroa, Antioquia sidajia vajoronibakhiaha adani Jesus Cristo kaija'ari vaipohiki. Vahararana vahojaki adani Deus athi namoniva abono, ija'ari vaka'ojomo'iva abono vihiki. Onivani fori hihi ida vaonina: Barnabé, Simão, Lúcio, Manaém, Saulo vihina. Tapajona ada Simão. Lúcioa biva'banaki ibavini sidaji Cirene oniki. Manaém, Iroji khama isai vihina kari vaabono vavavijavajabana'iki. Karaho'aha ada Iroji kohana arabo vaka'da'diva hi'aha.
2 Hari. Vajoronijabana'aha adani Jesus athi-ra vanaaba'iki Deu-ra vakanamasivivini. Vako'baina kaba'i vi'bairina vahojaha Deu-ra khai vani'avini. Vajoronina vani Ma'onahai Jahaki va'ora ni'aha:
—Va'ora vanahoariha bana hadani Saulo, Barnabé khama kodimoni vihina. Va'ora onofiki hadani bana bada vani'aja kaimoni ida badani va'ora ohonariavini hi'iki, Jesus monina-ra avavaadahaonira kaimoni.
3 Vi'bairina kaba'i adani Jesus athi-ra vanaaba'iki, Saulo, Barnabé vihiki va'da'di a'ani namani vakaabadavini Deu-ra vara vani'a'avini va'ora kakodiara kaimoni. Oniaroa, va'ora vakaamina'aha.
Chipre kajoviri kakaarabonia vaadaha'iki adani Saulo
4 Hari. Oniaroa, Antioquia sidajia ai vihi'aha adani Barnabé, Saulo khama. Ma'onahai Jahaki va'ora honariavini avikhana ibavi hoariha. Selêucia sidajia avikharafoniha, kanava kakarahoa vaki'dama'aha vahoariha khama, ai vakihi'aha. Chipre kajoviri kakaaraboni-ra avakanikha'aha.
5 Avako'omisi'aha Salamina sidajia. Judeus kaija'ari Deu-ra vara vani'avini kagorania avikhaha afonana va'ora vanava'isohivini hi'ihi ida Deus athi. João Marcos hojaki Saulo vakadiania vakadibadani biakodiavini.
6 Ai vihi'ianaha adani Barnabé, avikharimanani'aha, Pafos sidajia avakhano'aha. Vakaragarari'aha ada makhira Bajiso oniki. Arabani kabadani fori hiki ida kidibadani. Judeus kaija'ari ada. Deus athi namoniva abono hina-ra kahi'badaraki ada. Onina hoariha grego athinia Elimas.
7 Elimas kava'ahi ada kajoviri kavaka'da'diva Sérgio Paulo oniki. Ogahaki ada Sérgio Paulo.
Hari. Kajoviri kavaka'da'diva va'ora kaboa'iha adani Barnabé vara vavani'aja kaimoni ida Deus athi. Bikamithavini binofiki ida Deus athi kavaranihi.
8 Elimas ni-va'ora vajahaki adani Barnabé, ni-binofiki ada Sérgio Paulo abono-ra gahinai nihavini Jesus kania.
9 Ma'onahai Jahaki Saulo va'i-ra nahonariahihi'iki. Sauloa vada bini'aha ada arabani Elimas oniki.
10 Bini'aha:
—Jahari fori ihi'oamanija. Ivajahariki ida nahina hahavi jahaki. Ijahari'oamanija. Korijanahia ikavaraniki i afobakhia. Ka'oa oamani ida Deus athia akavaranina. Ka'oa hirihi ida ini'aki Deus athi.
11 Deus ira naabosivini kadahojai jahariki nahina jaharikia. Ikamaodorohaki bana i. Deus ira naabosivini oadani, ni-inokijanaki bana ida safini vagana — Sauloa bini'aha.
Jorakia Elima binokihi ida nokho ha'dini ihimini. Kamaodorohana binako'di'aha ada hoariha sa'a biakavanamara kaimoni.
12 Arabo vaka'da'diva vada bini'a'ihi ida Elimas pohimaja'ina, oniani ida Jesus varani hina-ra kajari'daravini hija. Bikava'ibodivaranikaraho'ihi ida Jesus varani hina Sauloa bikava'ojomo'ihaki.
Pisídia kaarabonia vaadahaki adani Paulo
13 Hari. Oniaroa, Pafos sidajia ai vakihi'aha adani Paulo. Saulo onina hoariha Paulo. Avakakha'aha. Panfília kaarabonia avako'omisi'aha. Vigaimoraha'aha Perge sidajia avikhaha, avakhano'aha. Oniania João Marcos va'ora nahojaha'aha, Jerusaléa ajoi'aha.
14 Perge sidajia ai vihi'aha adani Paulo, Barnabé khama. Pisídia kaarabonia avikhaha, Antioquia hoariha sidajia vakaikahi'aha. Avakoirina kamahini vani judeus kaija'ari Deu-ra vara vani'avini kagorania avi'oiha vavithi'aha.
15 Hoarana vara bivani'ahi ida Deus kava'isohihi jiriki. Hoariha maina vara bivani'ahi ida Deus athi namoniva abono kohana vaathi kapapirani. Hari hi'ihi ida papira-ra vara vani'avini. Judeus kaija'ari Deu-ra vara vani'avini kagorani avakadava'ava abono vaathi-ra vakarona'aha Paulo vakadiania. Vani'aha:
—Arigamina, ija'ari-ra avanava'isohivini-ra avanofihi; ba va'ora vanava'isohi Deus athia — Paulo-ra vani'a'aha.
16 Gaamanani'aha ada Paulo. Va'ora kaabani'aha sa'a, mitha vani'aja kaimoni ida kidivarani. Paulo va'ora ni'a'aha adani ija'ari hahavi:
—A'onivaniti arigamina, Israel kaija'ari a'oni. A'onivani judeus kaija'ari avihirini kaba'i Deu-ra khai avani'aki. Mitha vani'a hida a'onira vara oni'avini.
17 Vara ovani'aki bana ada Israel kaija'ari vakadiDeus. Deus va'ora nagathogatho'iki adani akadija'ari avikhananavaki, kidija'ari vihira kaimoni. Egito kaarabonia vahojana kari Deus va'ora ana'ba'di'iki adani. Vakadiarabo hirini ida Egito kaaraboni. Danoki ada Deus, oniani ida Egito kaarabonia va'ora anivini hija.
18 Avikhaonanina naothinia 40 badara ipohini Deus va'ora kahinanika'aha amasia. Deu-ra vanofijahakiravini kaba'i, Deus va'ora kahinanika'aha.
19 Deus va'ora kakodiavini hiki ida Canaã kaaraboni ahoroani. Va'ora naabini'aha adani 7 vihiki nação afohahavi Canaã kaarabonia vahojaki. Arabo kaija'arini vaabinina naothinia Deus Canaã kaarabonia va'ora no'a'aha adani Israel kaija'ari.
20 Hari. 450 badara ipohini vavahoja'ihi ida arabo. Naothinia Deus va'ora honariahanana'aha adani ija'ari nasohiva abono va'ora vaka'da'dira kaimoni. Naothinia bihonariaha ada athi namoniva abono Samuel kohana oniki vakadiania.
21 Akadija'ari avikhananavakia vani'aha ada Deus:
“Anofiki ada arabo
vaka'da'diva haria
vasohiki kaimoni.
Haria nava'isohi bana
hana hina ada inofira
akadika'da'di hina.”
Oniaroa, Deus va'ora nava'isohi'aha va'ora vaka'da'dira kaimoni ada Saul kohana. Saul kaabi'i onina Quis kohana. Kidi'arahoda kohana ka'arahoda Benjamim kohana oniki. 40 badara ipohini Saul va'ora vaka'da'di'aha adani Israel kaija'ari.
22 Naothinia Deua biani'aha ada Saul ka'da'di hijanarara kaimoni. Bianivini naothinia Deua bihonariaha ada Davi kohana kidija'ari vaka'da'dina hiki kaimoni. Deua vara bivani'aha ada Davi:
“Ovajahaki ada Davi oniki Jessé kohana kaisai.
Ovaria bada bini'aki bana ida badani hahavi
onofiki.”
Niha ada Deus.
23 Davi kohana kahanodi avijavaronisiagaki ada Jesus. Deus Jesu-ra honariavini va'ora akava'ijoara kaimoni adani Israel kaija'ari. (Judeus kaija'ari vaonina 'bamini ida Israel kaija'ari.) Deus va'ora nava'iponijoravini hiki akava'ijoahi abono-ra karonavini.
24 Jesus kabadani kama'dani viahania João Batista va'ora nava'isohibakhiaki adani Israel kaija'ari hahavi:
“Vakava'ipahini'a oni
avakadihojai asohiriki
bada avani'aki mahija
a'onira okanavini.”
Va'ora ni'abakhiaha.
25 Hari hi'ini ida João Batista kabadani, va'ora ni'a'aha:
“Hora avakava'ibodivaranimanija koda
hi'ada avanokhaki hora avavanihamanija koda?
Ni-kha'iaki kaho ada ovari avanokhaki.
Homiro'a okhaja.
Ovari kasiagaki bana ada.
Ka'da'di oamani bana ada.
Hovani ka'da'di ohirihi.
Kidihonai abono oamani ho.”
Va'ora ni'aha ada João Batista kohana.
26 Paulo asia va'ora vara ni'aha adani ija'ari Deu-ra vara vani'avini kagorania vahojaki:
—Oigamina, a'onivani. Abraão kohana kahanodi vavijavaronisiagaki avakadimoni hida Deus ija'ari-ra akava'ijoavini kavaranihi. A'onivani Deu-ra avakanamasivivini judeus kaija'ari avihirini kaba'i, avakadimoni hini jaboni ida Deus athi. Harivani afohahavi akadimoni hini ida Deus athi, haria akava'ijoavini-ra nofivini.
27 Jerusalém sidaji kaija'arini, judeus kaija'ari vanava'isohiva abono vihiki khama ni-avigaki ada Jesus ija'ari hahavi ka'aihotahi abono hina. Aakoirina kamahini hahavi ija'aria vara bivani'aki ida Deus athi namoniva abono vaathi Deus athi kapapirani hojaki. Vakamithavini kaba'i ni-avigaki ida Deus athi namoniva abono kohana vaathi nahina hini. Avigaravini kaba'i, Jesus kania namitha'ihi ida Deus athi namoniva abono kohana vaathi. Jesu-ra vanaabinivini mani ida vaathi nanamithani hi'ia.
28 Hojai asohirikia kahojairina kaba'i ada Jesus, vanako'dihi ida hojai asohiriki kidiania. Ni-vakaraga'iki. Badani asohirikia kabadanirina kaba'i, vanaabinivini vanofi'aha.
Oniaroa, Pilato-ra vani'aha:
“Ivahonariahi o Jesus
abinina.”
29 Jerusalém kaija'arini, vakadika'da'di khama bada vani'ahahavihi ida Jesus varani hina Deus athia bivava'isohihijora'iki. Deus athi namitha'ini naothinia Jesus vaipohihava abonoa vaani'ihi ida Jesus aba'ona ava akasanakhamakia, avibai'ihi ja'di hodijama'oki bodinia.
30 Deus vania bianahoki'ara ada Jesus.
31 Ahoki'ina naothinia mahi ipohikia Jesus abono-ra nanokia'ianaki vaipohihava abono vakadiania. Hi'adani Jesus ahoki'ina-ra vanoki'iki Galiléia vaadahajabanaki adani, abinina viahania. Jerusaléa avikhajabanaki adani Jesu-ra vavaipohihavini. Jesus ahoki'ina-ra vanokivini mani ida Jesus varani hina-ra vara vavani'avini hi'ia. Israel kaija'ari-ra va'ora vanava'isohibakhiaha vanoki'ikia.
32 Haria hida rakhaki a'onira anava'isohihavini Jesus monina jahakia.
33 Deua bada bini'a'iki ida athi akadija'ari avikhananavaki-ra va'ora nava'iponijoravini hi'iki. Vakadihanodi kaisai vavijavaronisiagaki hari. Deus Jesu-ra anahoki'avini kavaranihi ida namitha'ia.
Deus athi kapapirani pitani Salmo oniki 'bamikia hojaki ida athii:
“Ivani kodisai i.
Hidakaba'i kadabi'i
ohina-ra okahiki ho.”
34 Deua vara bivani'a'iki ida Jesus ahoki'ina kavaranihi afojora. Biva'aharihi ida Jesus aba'ona 'bathani. Deua bini'aha:
“'Bo'dakari Davi kohana-ra onava'isohijoravini hi'iki
a'onira okajoamoravini,
oniani ida oathi-ra bada
oni'avini hija.
Ka'oa oamani ida a'onira okajoamoravini
kavaranihi.”
Nimania ida Deus athi papira hojaki.
35 Papira pitani hoariha hojaki ida athii jaboni:
“Deus, ni-iva'ahaki 'bathani ida kadahonai abono
jahaki aba'ona.
Iathini-ra naabahaha'oadahaki ada kadahonai abono jahaka'oaki.”
Nimania ida papira athini.
36 Asia vara niha ada Paulo:
—Davi kohana hokina oadani bada bini'a'iki ida badani Deua binofiki. Na'arihavi hi'ina vani abini'aha, ka'damaha'aha. Kidi'arahoda avikhananavaki vaka'damana 'dihania Davi aba'ona-ra vaka'dama'aha. Oniaroa, 'batha'ihi ida Davi kohana aba'ona.
37 Jesus aba'ona vani ida Deua bianahoki'ia, oniani ida aba'ona na'bathani hirija.
38-39 Oigamina, ka'oa oamani hida Jesus ahoki'ina varani hini. Jesus ahoki'ina mani ida Deus ija'ari kahojai asohiriki-ra na'biravini hija, oniani ida ahoki'ina kavaranihia a'onira ananamithavini hija. Avarigavini anofiki jaboni hida moni. Deus kava'isohihi jiriki-ra avanofivini kaba'i, ni-avanaabahaha'oadahaki, oniani ida Deus avakadihojai asohiriki-ra na'biraravini hija. Jahaki ida Jesus kania avaabononi gahinai avanihavini. Ija'ari Jesu-ra vavakaijokahi, athi vanaabahi; Deus vakadihojai asohiriki bina'birahi.
40-41 Deus athi namoniva abono kohana vani'a'bo'da'iki:
“A'onivani Deus athi-ra
avakanahahanihabakhiaki,
mitha vani'a.
A'onira narapatahi,
avaabiniki bana a'oni.
Avakajari'daki bana ida
kodibadani bada oni'a'iki
avanokivini kaba'i.
Hoariha a'onira
nava'isohijahakivini kaba'i,
kodibadani-ra
avakajari'dahi.”
Nimania ida Deus athi. Avakava'igairi bana mahija Deua bini'a'iki a'onira napohimajaravini — Paulo va'ora ni'aha adani ija'ari vajoroniki.
42 Oniaroa, judeus kaija'ari Deu-ra vara vani'avini kagorania avikhaonani'aha adani Paulo, Barnabé khama. Avikhaonanina kaba'i, Paulo athi-ra vakamitha'iki Paulo-ra va'ora vani'aha:
—Aakoirina kamahini vikha'iana bana mahija haria avanava'isohi'ianavini Jesus varani hina — vakhaniha.
43 Oniaroa, judeus kaija'ari Deu-ra vara vani'avini kagorania ai vihi'aha adani ija'ari hahavi vajoroni'iki. Judeus kaija'ari vaipohiki va'ora vavaipohiha'aha adani Paulo, Barnabé khama. Paulo-ra va'ora vavaipohihavini jaboni adani judeus kaija'ari vihiriki Deu-ra vanofi'iki. Paulo vara va'ora ni'aha adani ija'ari hahavi va'ora vavaipohiha'iki:
—Ija'ari-ra kajoamorabakhiaki ada Deus. Vakapoari bana ada Deus mahija a'onira kajoamoraha'oadahavini — Paulo va'ora vani'aha.
44 Hari. Avakoiri'ianana kamahini sidaji kaija'arini vaipohiki avikha'aha judeus kaija'ari Deu-ra vara vani'avini kagorania, vakamithaja kaimoni ida Deus athi.
45 Judeus kaija'ari va'ora vanoki'aha adani ija'ari vâipohiki vajoroni'iki Paulo kavarani-ra vakamithamahaki. Avakabaivini hiki ada Paulo, ovani ija'aria bivajoronivini. Paulo-ra avakabai'aha, oniani ida Paulo-ra vakanavaranihavini hija. Paulo korijanahi ka'oa kavaranina-ra vakahi'aha.
46 Vakanavaranihavini kaba'i, ni-Paulo va'ora vifiniki, vara va'ora ni'amaniha:
—Judeus kaija'ari avihihi, a'onira ananamithahi Deus athia. Jahaki ida a'onimiro'a avakamithavini. Avaabononi avanakaidivaravini mani ida Deus a'onira kajoamoravini-ra avanofiravini hija. Ni-avanofiki ida avakadimahi Deua bianaja'divini hidiaja. Kidiania avarikhani-ra avanofiri'oamanija. Deus athi-ra avakajonivini mani ida a'onira anahojahavini hija. Judeus kaija'ari vihiriki vakadiania vara avavani'aki bana ida Deus athi.
47 Deus athi kapapirania hojahi ida honari:
“Ira okaronahi arabo hahavi kaija'arini vakadiania
vava'i bodini inavagaja kaimoni, avigaja kaimoni
ida va'ora oakava'ijoavini onofivini.”
Nimania ida Deus athi haria honariavini hi'iki — niha ada Paulo.
48 Paulo athi-ra vakamitha'aha adani judeus kaija'ari vihiriki, khai vakhani'ahapiki'aha, vani'aha:
—Jahaki ida Deus athi — vakhaniha. Deus va'ora nagathogatho'avini mani ida Deus athi-ra vakajari'daravini hija, oniani ida vakadimahi anaja'dini hija, mahi jahaki anokhomiriki-ra vavahojavini hija Deus kania.
49 Oniaroa, Antioquia kaarabonia okha'okhaonihi ida Jesus varani hina.
50 Judeus kaija'ari varani jaharikia va'ora vakanavaraniha'aha adani Paulo, Barnabé khama, sidaji vaka'da'diva vakamithaja kaimoni. Gamoa jaboni vakamithaki ida Paulo vajaharina varani hini. Hi'adani gamo vakanahina'ahapikiki. Judeus kaija'ari vihirina kaba'i Deu-ra vanofiki adani.
Sidaji vaka'da'diva, gamo vihikia vakamitha'ihi ida Paulo vajaharina varani hini, oniani ida Paulo-ra va'ora vakaihamahivini hija. Va'ora vanofiki ida va'ora vanajahariharivini va'ora avakakoja'aha ibavi hoariha avikhara kaimoni.
51 Oniaroa, Pauloa vana'dara'dara'ihi ida khomakhomani vakadisandália hojaki. Ija'ari Deus athi-ra vakajoniki-ra vakavarajomivini ida sandália-ra vakana'dara'daravini.
Oniaroa, ai vihi'aha. Icônio sidaji onikia avikha'aha.
52 Antioquia sidajia va'ora vanahojaha'aha adani Jesus vaipohihava abono. Ma'onahai Jahaki vava'i binahonariahihivini mani ida khai va'ora ni'ahaha'oadahaja.