10
1 Ni‑wepnag, chum ani si tatchua mat hu wo i e doꞌibia g ni‑wehm oꞌodham ch heg hekaj am ni‑hoꞌigeꞌidahun Jiosh wui.
2 Hegam o tatchua mat am wo i e apꞌech Jiosh tahgio ch wabshaba pi ap mahch mas has masma hab wo e juh.
3 Jiosh at am i apꞌech matt has masma wo s‑apꞌek am tahgio. K g ni‑wehm oꞌodham wabsh s‑ohhodamk g apchudaj ch wabsh hejel am chum s‑e apchudamk
4 ab s‑wohog elidch g Jiosh chehanig. K wabshaba g Jiosh am t‑chehgidch matt ab wabsh wo i s‑wohoch g s‑kehg haꞌichu ahgaj k ab wo i hiwigi g Christ. T heg am wo i t‑apꞌech am tahgio.
Mo wehs ab d chum t‑wuikam g doꞌibiadag
5 An atki hi wa oꞌoha g Mosesbad mash hab kaij g Jiosh:
Wehs amt wo himad g ni‑chehanig mamt heg hekaj wo bei g pi ha huhugedam doakag. Leviticus 18:5
6 K oi wa tasho mat pi hedai wo shaꞌi e nako mas wehs wo himad. K eda in haꞌichug g doꞌibiadag ahga. Kush heg hekaj hab kaij g Jiosh matt ab wabsh wo i s‑wohochud k ab wo i hiwigi. Kut am wo i t‑apꞌech hejel e tahgio. An o hab chuꞌig Jiosh oꞌohana ed:
Pi g hab wo i e ahgi mat hedai am wo em‑behijidam g doꞌibiadag dahm kahchim wui. Deuteronomy 30:12
Neh, bo chuꞌig nat pi g Jiosh alidag ia heki hu i t‑behij.
7 K an ep oꞌohanas:
Pi g hab ep wo i e ahgi mat hedai am wo em‑behijidam jewed wecho. Deuteronomy 30:13
Jiosh alidag at heki hu ab i wuhsh muhkig amjed mat ab wo t‑mah.
8 Bo hig woho chuꞌig:
Pi o shaꞌi mehk g Jiosh haꞌichu ahga ab em‑amjed.
Chum am hekid neꞌokchulid ch si s‑mahch. Deuteronomy 30:14
Neh, id o d ihda haꞌichu ahga ab amjed g wohochudadag mach am ahgahim.
9 Am g wo wohokamchud mo g Jesus d em‑kownalig ch ab uhpam e chegito muhkig amjed. T g Jiosh wo em‑doꞌibia.
10 Wehsijj atsh am wo i ha apꞌech g Jiosh hegam mat hedai ab wo i s‑wohoch g alidaj e‑ihbdag amjed. T wo e doꞌibia am i wohokamchudk mo g Jesus d ha‑kownalig.
11 Bo chuꞌig g Jiosh oꞌohana:
Mat hedai ab wo s‑wohochud k wo e doꞌibia. Psalm 34:22
12 Pi o ahchim waꞌi Tutuligo hab t‑ahg. Wehs hemajkam o d ha‑kownalig g Jiosh ch wehsijj s‑baꞌama ab wo s‑ha hoꞌigeꞌel hegam mat ab wo tahnid.
13 Bo chuꞌig g Jiosh oꞌohana:
Matp hedai ab wo tai g Jiosh k wo e doꞌibia. Joel 2:32
14 T wabshaba pi hedai has masma ab hu wo tai matp pi ab hu wo wohochudad. T hab waꞌap pi hedai has masma wo kah matp pi hedai wo ha ahgidad g haꞌichu ahgaj.
15 Kut pi hedai wo e nako mat hejel wo i e ah mat an wo ahgachugad. Jiosh o wa ab t‑chehani.
An o hab chuꞌig Jiosh oꞌohana ed:
Shoꞌo waꞌi si s‑kehg hab mahs mat wo dada g s‑kehg haꞌichu ahgdam. Isaiah 52:7
16-17 Pegih, ch an ahgachug g s‑kehg haꞌichu ahgaj g Jiosh ab amjed g si Kehshaj. T haꞌi kah k ab i s‑wohochud k ab wui e dagito k haꞌi ehp pi ab hu wohoch. An atki oꞌoha g Isaiabad matsh id hab wo e juh. K an hab chuꞌig oꞌohanaj ed:
Ni‑kownalig Jiosh, pi at muꞌi ab hu wohoch g haꞌichu t‑ahga ahchim haꞌichu i m‑tashogiddam. Isaiah 53:1
Neh, boki kaij.
18 K hemuch haꞌi hab chechꞌe mo pi wehsijj kah g hemajkam g Jiosh haꞌichu ahga. Nt wabshaba wo em‑ahgi mo wehsijj neid g Jiosh nahtoi. K g Jiosh oꞌohana hab chuꞌig:
An o wehsko e tashogid g Jiosh e‑nahtoi ed. Psalm 19:4
19 Tki an oꞌoha g Mosesbad moki hab kaij g Jiosh am ha wui g Tutuligo:
Bam ha ahg g gawul mahs hemajkam mo pi d Jiosh hemajkamga ch pi haꞌichu aꞌamichud.
Nt wabshaba ab wo ha mah g apꞌedag.
Kumt haha wo s‑ha hehgam k wo babgat ab ha wui. Deuteronomy 32:21
20 Tki g Isaiabad an oꞌoha mash s‑gewkam hab kaij g Jiosh:
Am ant ni‑chehgi ha wui hegam mo pi an hu ni‑gahg.
T ab i s‑ni‑mai hegam mo pi ni‑mahch. Isaiah 65:1
21 T an ep oꞌoha g Isaiabad mo hab kaij g Jiosh ab ha amjed g Tutuligo hemajkam:
Tash oidam ani ab i chum ha waid idam hemajkam.
K wabshaba pi chechkaidag ch pi ab hu ni‑wohog elid. Isaiah 65:2