4
Mo hedai edgid g Hekia S-apꞌekam Gewkdag
1 Muꞌi at an i wuwhag k hab chum e wua mo d ha mihshmaddam. K eda pi ha wehmaj g Hekia S-apꞌekam Gewkdag. Kumt heg hekaj pi wabsh chum hedai ab wo s-ha wohochud k hoꞌip ha aꞌappe mas woho ha wehmaj g Hekia S-apꞌekam Gewkdag.
2 Ahchim o waꞌi t-wehmaj g Hekia S-apꞌekam Gewkdag mach hedai wohokamchud mo g Jesus d Jiosh alidag ch ia mahsi k d oꞌodham hab masma mach ahchim.
3 Pi o am hu ha wehmaj g Hekia S-apꞌekam Gewkdag hegam mo hedai pi ab hu wohochud g Jiosh alidag. Am o hema ha wehmaj ch d Jesus obga. Heki am hu kah mat an wo i wuhsh g obgaj. K hemuch in haꞌichug no pi an ha wehmaj hegam mo pi ab hu wohochud g Jiosh alidag.
4 Jiosh alidag obga o am ha wehmaj hegam mo g iattogi chum ha mihshmdahim. K wabshaba g Hekia S-apꞌekam Gewkdag in t-wehmaj. Kutt heg hekaj ha gewito no pi heg baꞌich i s-gewkdag mo hi g Jiosh alidag obga.
5 Hegam o ab wabsh jewed t ab haꞌichu k amjed neneok. K hegam ab ha kaiham mo hab waꞌap pi mahch g Jiosh.
6 Pi o ab hu t-kaiham mach chum neneok ab amjed g Jiosh no pi pi mahch g Jiosh. Hegam o ab waꞌi t-kaiham mo hedai s-mahch g Jiosh. Bach masma s-mahch mo hedai edgid g Hekia S-apꞌekam Gewkdag. Heg o am ha tashogid g wohokam.
Mo si pihk e elid g Jiosh ab t-wui
7 Ab att wo chum si pihk t-elidad aꞌai t-wui no pi g Jiosh ab t-mahkch g pihk elidadag. Mamtp woho wo s-mahchk g Jiosh ch d aꞌaligaj ch wo si pihk e elidad.
8 Jiosh o si t-tatchua ch heg hekaj si pihk e elid ab t-wui. K hegam mo pi edgid g pihk elidadag pi d shaꞌi aꞌaligaj.
9-10 Jiosh at ab i wuhshad g si hemako e alidag id dahm jewed. T heg ab nako g s-koꞌok t-namkidadag mach heg ab beihog. Kut hab masma ab t-mah g wechij doakag. Bat wa masma am t-tashogi g Jiosh mo si pihk e elid ab t-wui. Kutt heg amjed i s-mai g pihk elidadag k hahawa si pihk t-elid ab Jiosh wui.
11 Am o wa tasho mo ab t-wui si pihk e elid g Jiosh. Pegih, ni-wepnag, ahchim att hab waꞌap wo chum si pihk t-elidad ab aꞌai t-wui.
12 Pi ach hedai hekid shaꞌi neid g Jiosh g t-wuhpuikaj. K wabshaba heg ab t-mahkch g si geꞌe pihk elidadag. Kuch heg hekaj s-mahch mo t-wehmaj.
13 Jiosh at ab t-mah g Hekia S-apꞌekam Gewkdag. K heg d Jiosh ch ab t-wehm kihdag. Kuch heg hekaj s-mahch mach d aꞌaligaj.
14 Heki at hu am i kei g Jiosh g e-alidag mat ab wo i hih jewed wui k wo ha doꞌibia g hemajkam. Kuni si neid ihda ch heg amjed am em-ahgid.
15 Wehsijj ach d aꞌaligaj g Jiosh matt hedai ab s-wohochud k ah mo g Jesus d si alidaj.
16 Kuch heg hekaj s-mahch mo si pihk e elid g Jiosh ab t-wui ch ab si t-hemakojidch e wehm.
Jiosh o ab si t-tatchua. Kuch s-mahch mach d aꞌaligaj nach pi ab aꞌai si t-tatchua.
17 Ab o t-mahkch g si geꞌe pihk elidadag. Kuch wepo masma ab si tatchua mo g alidaj ch hab s-ap t-taht k wo ai g lodaita
18 k pi wo ehbidad. Gm at hu hab i juh g pi ap t-namkidadag g Jiosh no pi si pihk e elid ab t-wui. Kutt heg hekaj pi wo ehbidad ch wabsh aigo wo si pihk t-elidad ab wui. Pi o pihk e elid ab Jiosh wui hegai mat hedai wo s-ehbidad.
19 Wehpeg o si pihk e elid g Jiosh ab t-wui. Kuch heg hekaj edgid g pihk elidadag.
20 Pi o woho d Jiosh wohochuddam mo hedai pi ab hu pihk e elid t-wui ahchim mach d wohochuddam. Baꞌich o i s-hasig matt ab wo si tatchua hegai mach pi neid. Pi at wo e nako mat ab wo si tatchua g Jiosh matp hedai pi ab hu wo si ha tatchua g e-wepnag.
21 Ab o t-chehani g Jiosh ahchim mach ab si tatchua matt ab epai wo si ha tatchuad g t-wepnag.