1 Siseri hi i Ehab u veve lawe Jesebel a gineu doluegi hi i Elaeja u veire me vage ngeie u ue vagamate na tangaloi ligoligogi doluegi hi noi Tagaro vurogi gena buei vuro. 2 Siu Jesebel mo hora na nona gaihora lawe Elaeja vena na veve lawea vena, “Lo taro mwere ngaha mavugo, nam veve hogo lawego nain wehigo mwere hi gu wehi na nogu tangaloi ligoligogi, u garea hurive nongu huqe rain ue vagamate au tareve nain veie tae.” 3 I Elaeja mo matagu me mo toa huri na nona mwasoana. Tavohe ngeie mo vumai Berseba lolo Juda, mo tau na nona tangaloi tabanagi taie. 4 Siu ngeie gahea mo vano a rani dolue lo hala hi su lolo vanue vurogi. Ngeie mo vomai sulo vui gai biti, mo toga vuine lo vavagi me mo tataro hurive ngeie na mate. Ngeie mo veve vena, “Neu nau weli na gineu ngaha u tatarise, Huqe. Go lai vohogi na nogu mwasoana; I neu hateve nau garea mwerei reduvingu ngerehi rau mate beno.” 5 Siu mo eno suvine lo vavai gai hi mo maturu. Tasiserigi hi a gaihora noi HUQE mo singelie me mo veve vena, “Go maraga me go gagani.” 6 Ngeie mo kileu dali bulu, me kakarani lobei qatune a bereti u quiana lo ului dirigni mwamwavi, mena lahai wai. Ngeie mo gani bereti me mo inu wai siu mo eno suvine taligu. 7 A gaihora noiHuqe mo vumai taligu vagatuegi me mo singelie me mo veve vena, “Go maraga me go gagani, huri a turegi u qaravu liu huri go.” 8 Siu ngeie mo maraga mo gani na bereti me mo inu na wai. Hinaga hi u veie mo huire, u lei na turegi rani ngavulu geivesi me bongi ngavulu geivesi me mo dadari Horeb, a vusi noi Huqe Mauri. 9 Taie hi ngeie mo soro ta lolo malanga me mo manga lolo bongi. Me a leo noi Huqe mo vumai lawea vena, “?Gom vai na havai talehe?” 10 Nge mo duvi mo veve vena, “O Huqe, Huqe Mauri Managi, neu nau romasi huri na Israel. Ngere rau siregi na nomu waratau siaga, rau vei surisuri na nomu vonda, me rau teu na nomu tangaloi ligoligogi sulo mateana gena buei vuro. I neu gategale hogosie nam tino, me siseri ngaha rave rain ue vagamate au vage.” 11 A Huqe move, “Go vano varea me gom labe lo vusi lolo ute gogona noi Huqe, huri i Huqe mo gangarani mo dige utu.” Siu a langi lawua u huire mo heregi vurivuri na vusi hi lategi me a vatu ram tavisevise lo nagoi Huqe, nge a Huqe hateve nge lolo langi hi. Lo tagui langi hi a ruru, nge a Huqe hateve ngeie lolo ruru hi. 12 Lo tagui ruru a avi mo vumai, nge a Huqe ngeie hatie lolona. Me lo tagui avi hi a dilo mo vomai rorongo mo ngutu. 13 Tavohe Elaeja mo rongoe, ngeie mo reve na luqana goro na nagona me mo mwalue su varea me mo labe lo matai malanga. Siu a dilo mo veve lawea vena, “?Gom vai na havai talehe?” 14 Ngeie mo duvi mo veve vena, “O Huqe, Huqe Mauri Managi, neu nau romasi huri na Israel. Ngere rau siregi na nomu waratau siaga, rau vei surisuri na nomu vonda, me rau teu na nomu tangaloi ligoligogi sulo mateana gena buei vuro. I neu gategale hogosie namo tino, me siseri ngaha ngere rave rain ue vagamate au vage.” 15 A Huqe mo veve lawea vena, “Go tudori lo hala hi gu vumai lune, me goin vano sulo vanue vurogi Damaskas. Tavohe gom dadari taie, goin vurei Hasael na vuragi ratahigi goro Aram. 16 Taligu, goin vurei Jehu netui Nimsi na ratahigi goro Israel, me goin vurei Elisa netui Savat dena ute hi Ebol Mehola na vuragi na tangaloi ligoligogi lo tanomu. 17 Jehu vin teu ra hine hi sulo mateana ngere hi rain toa dena buei vuro noi Hasael, me Elisa vin teu ra hine hi rain toa dena buei vuro noi Jehu. 18 Nge hatie huri nau wiri bimbire ngere teri vagabitu lolo Israel. Ngere qaure rahe sisiqeu tea lawe Tagaro vurogi me ngere a singora he sungunie tea.”