10
O ‘sheep’ simba ari embo javotoho amita ke.
1 Eto Iesu na ke einge ena, “Na ungota degi ke be erena, pegene embo na amo o ‘sheep’ ta huga peta mane horeuja te huga jaruketo jo ta veaguja
2 te o ‘sheep’ simba ari mamo na amo huga pe ta horasi uei
3 huga pe simba ari embo na o ta mamo kito pe hirikeoi horeto amita o ‘sheep’ vahai vahai javo ijie jage ijioi o amita pere na mamo ta ke hajire ingihe mamo ambo ambo ue arahata pambagora.
4 Eto arahata puvuto o mamo kihi pambuhoi ambota oroviketo ke hajire ingihe pambagora.
5 Te embo nei ta ke hajire ingihe amo mane ambo ambo eagora te joru toto pambagora.”
6 eto ke ainge Iesu na timu hatirari ke na ena te embomeni na ke be hotembae eo.
O ‘sheep’ Simba Ari Embo be amo Iesu ra
7 Iesu na ke ehako einge ena, “Na ungota degi ke be erena, na o ‘sheep’ ta huga pe ra.
8 Eto embo nei nei mahu kihi puvua amo pegene embopora avoeto o ‘sheep’ na ke hajire ingae ue toa.
9 Te huga pe amo namo avoeto embo na nau degi ta horeto osaga mane kesuja te puvuto pambuto ue samara eto enena javotoho kito indesuja.
10 Eto pegene embo amo pegene eto tau pehara puvaguja te na puvena amo embo ta vasiri ikano humbuto ve isapamane eto irora puvena.
11 Na o ‘sheep’ simba ari embo javotoho ra te o ‘sheep’ simba ari embo amo o ‘sheep’ orekasi amita hamo na ombuto taro sari aisuja.
12 Rate ‘sheep’ simba ari embo eto ‘sheep’ ta mamo mane avoeto isoro o ‘wolf’ na o ‘sheep’ kambasi puvutuhurou kito embo amo o ‘sheep’ toto joru pahurou o ‘sheep’ amo joru sepuriri eto pambasora.
13 Amita be amo koro pure ari embo na o ‘sheep’ hotembae eaguja te
14 Namo avo o ‘sheep’ simba ari embo javotohora te nanena nau jekahoka kiagona eto ungona na kiora.
15 Ainge dombo nau Mama na na kiaguja eto nanena nau Mama kiagona. Eto nau o ‘sheep’ irora namo avo vasiri te pehasora.
16 Eto nau o ‘sheep’ nenei mihera amo huga jo ei ta irae rate amite tapa nanena tatapeketo humbuto vahai ta ikasona. Eto enana te tapa nau ke hajire ingihe tatapeketo iriroro na enana ta simba ari embo ainge aisona.
17 Eto nau vasiri toasona eto ehako umbasona avo nau Mama na na osa ere ua.
18 Eto uje nau na nau vasiri toasona amo embo nei na mane egimbeto humbasuja. Eto na sovera humbuto pehasora eto sovera amina au nau vasiri ehako umbasona ari avo ainge ana nau Mama na nau degi ta ke ena,” ke ainge Iesu na enu,
19 Judea embomeni na tumo ue ke sio sao ijie ke einge ea,
20 embo nei nei na, “Embo emo ahihi sasapura na jo ta horari amita uha sapura oi eria avoeto ungotena amita ke mane ingesora,” ainge ijio
21 embo nei uhoho na ke einge ea, “Embo ahihi sapura na jo ta horari amo embo tihi tahimbari mane kojaehija te embo emo ke be ra,” ainge ea.
Iesu amunure avo ena
22 Eto huvira iji te da Jerusalem ta otohu ari pondo ta
23 Iesu na temple jo ta degi javo Solomon ta arara ai ta horeto heto unu
24 Judea embomeni na kito puvuto Iesu joeketo ke einge ea, “Umo Keriso rete mo amunure? Avo ke be na pere ejo. Dago iji koso mana mana ue mihera.” ainge eo.
25 “Na ke amo mahu eagone ingagova te ungona na ke be ae eagova. Eto nanena nau Mama ta javo ta ari neite neite eagone amina harikaguja aravora te
26 ungona na ke be ae eagova. Amita be amo ungo o ‘Sheep’ nau manera.
27 Eto o ‘Sheep’ nau be amina ke nau ingihe na ambo ambo uore nanena enana kiagona.
28 Eto nau o ‘Sheep’ amo vaine mane pambagora eto embo nei na mane puvuto ingeni nauta egimbeto humbagora te nanena enana ta degi vasiri daroho ikagona.
29 Eto o ‘Sheep’ amo nau Mama na nau ikarira eto nau Mama amo embo tapa dembari avoeto embo nei na nau Mama ta ingeni ta egimbeto humbari inono aera.
30 Nau Mama te namo te amo vahaira.” Ainge enu.
31 Judea embomeni na ingito Iesu tasi koro siriketo humbuho
32 Iesu na ke einge ena, “Nau Mama na ari neite neite jajavotoho amo nau degi ta eoi eagone kiagova te ari emita vahai mo deire ehene kito na taisi ere ove?” Ainge enu,
33 Judea embomeni na ke mine einge ea, “Dago no ari neite neite jajavotoho ere oa avoeto umo taisi ae rate inena umo embo rate God ke erea amo sapura be avo erea amita hamota umo taisi ere ora.” ainge eo,
34 Iesu na ke einge ena, “Eto ungota ke pepeni ta ke kajari amo einge mihia, ‘Ungo amo ke kaiha ari embomeni dombo be ra’ ke ainge amo God na ke humbari embomeni ta degi ena avo ungo eheketo kiaere?
35 Eto God ta ke amo eho mane irae aisuja eto aita amo enana embo ke kaiha ari embomeni dombo be avoeto
36 namo avo God Mamo na enda ta ikenu puvua avoeto nanena, ‘Na God ta Meni ra,’ ainge ene ingito ungona nanena God urumbari ke ereva.
37 Eto nanena nau Mama ta pure avo ahena amo ungona ke be mane aheva te
38 nanena pure avo ururono ungo na kogue na ke be mane aisova te pure avo kogue ke be ijie na Mama ta jo ta mihena eto Mama jo nau ta mihia avo kogue hotembevujo.” ainge enu.
39 Judea embomeni na andito humbasi eo Iesu na tiumbeto pambuto
40 umo Jordan oiho John na embomeni bapataito ena degi ai pambuto mihinu
41 embomeni na kito puvuto ke einge ea, “John na ari neite neite einge ae rate embo eremita ke avo ere ijiahija tapa amo ke be ra.”
42 ke ainge ijie embo isapamane na Iesu ke be ea.