3
Iesu amo Moses ainge mane Embo Peni ra
1 Avoeto nau namei kamei ototohu ungo uhu ta pondo ta oru humbari embopo ungo na ungotenau priest peni God ta ke hande ari embo Iesu ke be eagora avo be hotembevujo.
2 Eto God ta javo vahai embomeni eto Moses na God humota ena ainge dombo Iesu na Ikari Embo humota ena.
3 Eto bande amo peni rate bande gerikari embo amo peni be ra ainge dombo Moses amo peni rate Iesu amo peni be ra.
4 Eto bande tapa amo gerikari embo oenga oenga rate donda tapa amo God na ena.
5 Eto God ta javo vahai embomeni eto embo vahai Moses na God humota ue amita ke ingina avo inono ta hande enu ingia eto amita ambota God na ke nei ikenu puvuna amite tapa ungotena ere ingihera.
6 Rate God ta javo vahai embomeni rate Keriso vahai avo God ta Meni be ra. Te ungotenamo te tapa hamo ta sovera ari humbuto Keriso humota ue ke be ijie sovera ari iji kombu simba ue amo ungotena God ta hatira ere ora.
God ta embomeni ta jangu indari iji
7 Avoeto Ahihi Otohu na ke einge eria amo, “Ungo na ke nau ingihe kito amo ungota jo ngahia mane aisova.
8 Eto ungota mamahamane na degi sapura be ojagatambu ta jua 40 amita jo ta nau degi ta tumo ue.
9-10 Na undupa ue engekihe ari nau avo kogue osaga ere koguahera. Eto enana ta ari avo nanena kito tumo ue ke einge ea, ‘Enana na ari nau avo kiae ue jo ta hotembari na degi nei ta sio ere pahora
11 avoeto enana nau jangu indari degi ta mane horasora,’ ke ainge tumo te tapa ngahia na ea.” Eto ke ainge amo Ahihi Otohu na eria.
12 Avoeto nau namei kamei ungo ari sapura asi jo ta hotembari na God ke be ae ue God vasiri te avo toto pambuova avo kito kogoevujo
13 eto ari sasapura ta hotembari sokova amina eoi jo ngahia eaguja avo haekihe Iesu egerembeto puvurae eha emikote ungo oenga ke javotoho na hondate mine ara ue sovera ari humbuhe irivujo.
14 Eto ungotena kihi Keriso humota ea ainge pere humota ere uma Keriso kito amiga javo vahai embomeni aisora avoeto ere ora.
15 Avoeto ke einge Ahihi Otohu na eria avo ungota degi ehako erena, “Eto ungo na ke nau ingihe kito ungota mamahamane na degi sapura ojagatambu ta mihie jo ngahia ere uahera aingeko mane aisova.”
16 eto embo God ta ke ingihe jo ngahia ere uahera amo amunure? Amo Moses na Egypt enda ta eto tihi jigena embomeni amina ea.
17 Eto God na jua tapa 40 amita jo ta embo amita degi ta tumo ere uahei? Amo embo ari sasapura ue ojagatambu ta sasari ere uahera amita degi ta ena.
18 Eto God na embo amuta degi, “Ungo nau jangu indari degi ta mane horasova.” ke ainge hariketo ena. Amo embo God ta ke agi ae embomeni ta degi ena
19 avoeto God ke be ae embopo amina God ta jangu indari degi ta horae, avo ere kogora.