7
1 Avoeto nau namei kamei, God na ari erevi ungotenau degi ta asi oje ena avoeto ari tapa deina ungotenau hamo te ahihi te tongopa eaguja avo toto God Otohu ke ijie joru ue embomeni jajavotoho jo tapa na asi tunga iketo pure aisora.
Paul na osa ari ta ke ena.
2 Eto dago tunga humbuvujo. Dagona ungota embo vahai amita degi ari sapura ae, embo ta javo sapura ae, ke gamo na poeketo nei do umbae eto sapura ta kihi umbae.
3 Eto ke erena amo ujekari ungota avo ke ae rate ke mahu ijiena amo eto dago peharote teho iroro avoeto ungo osa mahainge aisora.
4 Eto na ungo humota ue javo ungota avo jakeka ijie ere ovona. Eto dago memenga kogue mihera te na ungo hotembihe sovera ari humbuto tunga javotoho ereona.
5 Eto dago enda Macedonia ta pambuto aita jangu indari avo hambae be rate hamota memenga te hini kambari te joru te tapa avo koguera.
6 Rate God amo ungotenau tunga javotoho ikari embo amina Titus ikenu puvunu kito osa ue tunga javotoho uera.
7 Eto tunga javotoho uera amo Titus puvei kehera avo pere mane rate ungota pekari te undurarite avo puvuto ehei ingito osa uera. Eto ungona tunga osaga te si te tapa ijie na hotembeto ehako kesi uje ere ova avo ehei ingito tunga javotoho be uena.
8 Eto ke erena amo na ahari mahu kihi ungota degi kaeto ikihane humbuheva avo humbuto eheketo osaga kogueva avoeto namote tapa osaga koguena te oroho amo osaga mane kesona te tunga javotoho ereona,
9 amita be amo nane one osaga kogueva avoembo tunga javotoho ae rate ungo osaga kito jo haperekehei ajato ijieva avoembo tunga javotoho ere ona, eto amo God ta uje avoeto osaga kogueva, avoeto dagota degi sapura nei do hambae ueva.
10 Eto erena amo God na au embona osaga kito jo haperekau oreketo humbasuja te enda ta ari sapura na au osaga kogue ere uma amita ahihi amo pehasuja.
11 Eto ungona osaga keheva amo God na ikena avoeto keheva te ungo be kivujo, amita tutumota amo ungona jo tapa na embo jajavotoho asi ue ungota ari avoembo ajato eto namote namei eto ehako osa ue ke avo tambu aja uje isapamane ereova avo kogue ungo pehumba ari haite ae kogona.
12 Avoeto ungo na ingova uje ereona amo ahari kajihena, amo ari sapura embo avoembo kajae, eto ungota degi ari sapura uija avoembo kajae rate ungona dago osa eagova avo do aingere avo ungona God ta tihi ta be kiagova kajihera.
13 Eto ungona dago humota ue osa isapamane ereovova avo dagona kito sovera ari umbera, amite eto ungo na ove Titus na kito tunga javotoho be eto puvuto ehei ingito dagote tapa tunga javotoho be ehera.
14 Eto na ungo osa kageni ue Titus ta degi ke ijiena avoeto amina ungota degi pambuto dagota ke ungo avoembo ijiera amo ke be pere avo koguija eto ainge dombo dago ke do ungota degi ta eagora amo ke be pere eagora.
15 Eto Titus na ungota degi pambuto ke ijinu ingito joru te tapa agi asi ueva avo koguija, avo eto amita osa ari ungota degi avo pajito peni vahai be ere ua.
16 Avoeto na kogona amo ungo iji tapa amo ungota hamota ra avo eto osa pajire be ere ona.