1 Eto na Paul ke nau avo ungota degita ere kajihena kivujo. Eto embo na ke eagora amo na ungote mihie na ke embo mane rate na ungote irae amo ke ngahia na eto ke peni be eagona ke ainge eagora te na Keriso ta jo ari eto tunga humbari na ungota degi penunu erena amo erevira. 2 Eto ungota embo nei uhoho amina ari nau eto ke nau amo teho enda embota ari te ke te ra ke ainge eagora avoeto na ungota degi pambuto ke ngahia be amina ke sapura avo haekasona avoeto ungo simba evujo 3 eto ke be amo ungotena enda ta mihie ari sasapura ta degi isoro ere orate amo enda ta isoro mane. 4 Eto enda ta ki emi amina isoro ae rate uhu ta ki emi sovera te amina Satan ta tihi jigari ta degi isoro ereora amo erevira 5 eto ke, eto ari deina au God ta kiari au sapura aisuja amita degi isoro eto embo ta hotembari tapa togeto humbuto eagore Keriso ta ke agi eagora 6 eto ungo jo hapereketo dagota ke agi aisova kito ungota peive ari do mihia avo kito hana kiari ikaro kogurovo irae aisuja.

7 Eto ke erena emo asavi avo mane ingesova te ke ta susu be avo ingihe be kivujo. Eto embo amuna dago Keriso ta tohora ke ainge aisora embo amina dagote tapa ainge dombo Keriso ta toho ke ara erena. 8 Eto dagona ungo taro veava Bada na ikae rate ungo jigoro ereva Bada na ikena eto na pure avo ana Bada na ikena avoeto na ke ijie me mane kesona te pure avo aisona 9 eto na ahari ta ke ngahia be na ere kajihena amo ungona kito joru ava kajae rate 10 embo nei nei na ke einge erera, “Paul na ahari ta ke ngahia na eriate ei ta iraehija amo ke ngahia eria aingeko amo mane aehija te eita puvuto gamo ke ijirou ungote mane ingesora,” ke ainge eagora te 11 ke ainge ari embo amina ke erevi hotembeto kioja erena. Eto ahari ta kajihone kiagova ainge dombo pambuto ungota tihi ta heteto ke ngahia be na ano ingesova.

12 Eto embo nei nei na ungo oenga, “Na, na” ijiroro ungona humota ava eagora avo dagona enana te dagote ari vahaira ke ainge avo mane aro ingesova te enana na God ta ari avo kogue ae rate enana ta ari avo ungo oenga heka ereora avoeto ari ainge amo sarika ue ere ora. 13 Eto dagona ari aingeko avo mane aisorate God na pure mahu ikari avo kogue ke aisora. Eto God ta pure ikena amo ungota degi eagora vahai avora. 14 Eto dagona Keriso ta duru ungota degi ikeo umbava avoeto dago ungo simba ere ora te dagota tihi jigari ta hane amo dembeto pambaera. 15 Eto embo nei na God ta pure eaguja avo kogue dagona ari ke mane eagora, te dagota uje amo ungona God humota ari avo pajihirou dagona kito pure neite neite ungota degi ururoro pajito 16 inono au dagona ungota enda hane oihota embo nei nei mihera amita degi God ta ke hande aisora, eto enda nei donda ve mahu urari aita dagona mane urasora te enda eha donda ve urae aita pambuto ve urasora. 17 Eto God ta ke ta einge kajari mihia, “Embo na ‘Na, na’ mane aisuja te Bada avoembo, ‘Na, na’ aisuja.” 18 ke amita be amo embona umo oenga, “Na, na” ijirou Bada na kito ke be ke mane aisuja te Bada na umo oenga kito ke be aisuja.