9
Paul na amita pure ta ke ena
1 Na embo amuna peikaera. Na Keriso ta apostel ra eto na tihi nau na ungotenau Bada Iesu kia, eto na Bada ta pure eagona amita be amo ungona ere ova.
2 Eto embo nei na na kiagora amo apostel mane ke eagora te ungo miheva amo nau pure ta hajire ere kogova avoeto ungona na ere kogova amo apostel be ra.
3 Avoeto na pehumba ere ora embopo ta degi ke mine erena amo ungo avo kiagora erena.
4 Eto na Bada ta pure ue indari mane indesona ke ainge ererete?
5 Eto Bada ta eambopo te Peter te enana ta airi humbuto pahue pure ere ora amo dago na ari ainge amo mane ara ke ererete?
6 Eto Barnabas te namote tapa apostel be eto pure eagora te dagota ingeni vasiri eto pure ta mine umbarote?
7 Eto ke erena amo erevira, enda ta isoro embo ta koro pure nei irae rate gavana na ikeoi humbagora. Eto pure kovari embo na amita pure ta be avo humbaguja eto o ‘cow’ simba ari embona ‘cow’ ta emi mu avo indaguja.
8 Eto ke erena amo embo ta ke mane rate God ta ke pepeni kajari aita mihia amita ke avo erena
9 amo Moses na einge kajari mihia, “Eto o ‘cow’ na ‘wheat’ ve haito jasihirou amo ‘cow’ ta pe mane tigesova te tovujo indie pure ai.” Eto ke be amo God na o ‘cow’ rete embo re avo hotembihe enu?
10 Ke amo ungotena pure embopo avoembo ena, amo pure enda kovari embo te ve jukari embo te na enana ta pure amo indari pure amo eagora.
11 Eto ainge dombo dagona ahihi ta pure ue ungota degi donda ve urarako eagora te dagota pure ta mine ombari asari amo mane umbarote?
12 Eto embo nei nei na ungota degi pure ue mine ere humbuhora amo ungo ke nei do ae rate dago pure mahu ihikari embopo amo mine umbarote mane umbaro? Rate Keriso ta duru javotoho avo deina mane haekasuja avoeto mine humbari ta ke avo hotembeto ae toto beuje te tapa mihahera.
13 Eto temple ta pure ari embopo na temple jo ai ta pure ue indari humbuto indagora eto indari humbuto pene gaga ta iketo kaheketo humbuto indagora amo ungo kiagovete?
14 Eto God ta ke hande ari embopo na pure aita ue donda umbara Bada na ke ena.
15 Eto namote tapa nau pure ta mine umbaehena avo toto mihovona amo ungota jo haperekau avo mane erena te embona nau degi ta donda nei do ikae asora amo na tunga javotoho te mihima peheto mine God ta degi umbasona.
16 Eto na God ta pure eagona amo uje nau na ae rate God ta uje avo enu pure ereovona avoeto, “Na, na,” mane aisona. Eto Bada na nau degi ta hajire ikaguja avoeto na pure mane toasona.
17 Eto na uje nau na pure erevi ahena amo mine umbaehena te nanena pure erevi ana ena
18 avoeto nau pure ta mine amo deire avo ano ingesova, amo erevira. Eto na Keriso ta duru javotoho ungota degi hande eagona amo na mine mane umbagona te ungona hande mine vahai umbava eagona avoeto tunga javotoho ari nau degi ta puvaguja.
Paul amo embo tapa ta pure embora
19 Eto na embo amuta pure ari embo mane rate ke hande ururono ingihe ambo ambo ara embo tapa ta pure embo eagona.
20 Eto Judea embomeni na ke ingihe ambo ambo ara namote tapa Judea embo eto mihena te na enana ta ke pepeni na pundurae rate enana pundurari embomeni na ke be ingora namote tapa pundurari iragona.
21 Eto enda nei embomeni Moses ta ke pepeni kiae embopo amina Keriso ta duru javotoho ingihe ambo ambo ara namote tapa Moses ta ke pepeni ingae na enana ga irarako eagona, eto God ta ke pepeni amo na ingae na irarako mane eagona eto Keriso ta ke agi ue iragona.
22 Eto God humota ue sovera umbae embomeni amiga na mihie sovera umbae uena amo embo nei uhoho na sovera umbara uena, eto embo ta ari tapa neite neite ngangahia tapa avo humbuto nei do hotembae enana ga mihie God ta ke hande uena.
23 Eto ari ainge eagona amita be amo embomeni na kito Keriso ta duru javotoho avo humbuhuro nanena ari jajavotoho neite neite humbasi eagona.
24 Eto embo isapamane huhevasora te embo vahai amina dembeto siro kope humbasuja ainge dombo ungote tapa siro kope humbasi hotembeto inono ta huhevevujo
25 eto embo na sesena asi ue teho mane pambagora te kihi huheveto sovera humbuto ngahia eoi hamo eto sesena be ta pambagora. Eto enda ta siro kope sapura aisuja avo humbasi ue huhevagora te ungotena daroho irari ta siro kope avo humbasi ue pure eagora
26 eto nanena teho ahe kihira ue ae rate siro kope humbasi ue pure ngahia be na eagona.
27 Eto na embo nei ta ke hande ari embo rate huhevari ta simba ari embo ungotenau Bada na na kito sovera inono ae avoeto toaute mane toau avoeto hamota sovera ari humbasi huhevari ngahia be na eagona.