7
Sokkad no Gatus woy Oppat-no-puu Oppat no Maan (144,000) no Minuvu nid Potawan
1 Na nopongnga idda, nokita ku no duwon oppat no ponolihan no id ponloohinat diyot oppat no sungguk to ingod. Id toholan dan kos oppat no id pomonnan to monokkaan kaamag amoy diid ko-umannan to kaamag iddos livuta, dos dahat woy dos langun no kayu.
2 Nokita ku mandad iddos ossa pa no ponolihan no id inguma pomon diyon tid tollak. Duwon id piyod din no silyu to ma-antoy'n Monama, woy id ikohiyan din to monokkaan bawos iddos oppat no ponolihan no id boggayan to kotungud nod dora-at to livuta woy dahat.
3 Kahi rin to, “Yo row pa doratti kos livuta, dahat woy mgo kayu taman to od kotawwan doyd to patow iddos kiloy taddot mgo uripon to Monama ta.”
4 Na, duwon mid ikahi koddi no iddos ko-uralloy taddot id ponpotawan, sokkad no gatus woy oppat-no-puu oppat no maan (144,000) langun pomon diyon to koubbaran ni Israel.
5 Sopuu-oruwon maan (12,000) kos id potawan pomon diyot koubbaran ni Juda.
Sopuu-oruwon maan (12,000) pomon diyot koubbaran ni Ruben.
Sopuu-oruwon maan (12,000) pomon diyot koubbaran ni Gad.
6 Sopuu-oruwon maan (12,000) pomon diyot koubbaran ni Aser.
Sopuu-oruwon maan (12,000) pomon diyot koubbaran ni Neptali.
Sopuu-oruwon maan (12,000) pomon diyot koubbaran ni Manases.
7 Sopuu-oruwon maan (12,000) pomon diyot koubbaran ni Simeon.
Sopuu-oruwon maan (12,000) pomon diyot koubbaran ni Levi.
Sopuu-oruwon maan pomon (12,000) diyot koubbaran ni Isacar.
8 Sopuu-oruwon maan (12,000) pomon diyot koubbaran ni Zabulon.
Sopuu-oruwon maan (12,000) pomon diyot koubbaran ni Jose, woy
sopuu-oruwon maan (12,000) pomon diyot koubbaran ni Benjamin.
Dos Mo-uraan Minuvu no Diid Ko-iyap no id Pon-oumpak to Moputi
9 Na nopongnga idda, nokita ku iddos mo-uraan minuvu no diid ko-iyap. Id pomon sikandan diyot nokod-osso-osson ingod, nokod-osso-osson tribu woy nokod-osso-osson kinohiyan. Id ponlohinat dan diyot isowwan to trunu woy riyot isowwan to Natin Karnero. Id oumpak sikandan to moputi no mowwet, woy posidpiyod dan to mgo lokkoy to palmera.
10 Id porongnganoy sikandan nid ooseng to monokkaa, kahi ran to,
“Od doongon ta kos Monama no mid unsad duwot trunu, woy dos Natin Karnero
su notobbus ki pomon kandan.”
11 Na iddos langun no ponolihan, mid loohinat no nokolingkus taddot trunu, diyot od pombuyyahon woy riyot oppat no ma-antoy'n binovallan. Id ponlingko-od sikandan diyot isowwan taddot trunu woy id simba ran iddos Monama.
12 Kahi ran to,
“Oyya, od kotuman en ini!
Od doongon ta kos Monama ta, woy od posivontuhon ta sikandin
su moraom kos kandin no koovottan woy dakkoo kos kotungud woy kotuusan din.
Od posolomatan ta sikandin taman to waad tomanon. Oyya, od kotuman en ini!”
13 Nopongnga idda, mid intud koddi iddos sokkad taddot od pombuyyahon, kahi rin to, “Nosorollan du vo ko ondoy kos mgo minuvu no id oumpak to moputi no mowwet, woy ko ingkon dan id pomon?”
14 Mid tavak a to, “Waa saddoo ku, Sir. Ponudtuli a, su sikkow kos nokosaddoo.”
De-en kahi rin koddi to, “Sikandan en kos noko-ukit to koosayan diyon to ampow't ingod. Ikos mgo umpak dan, id pippiyan woy id pomoputi ran ukit to longossa to Natin Karnero.
15 Idda en kos unayan no riyon sikandan to isowwan taddot trunu to Monama. Na allow bulli, duwon kahaan dan no od tuman to kandin nid kopi-i riyot templo rin. Woy dos mid unsad to trunu kos od kupkup kandan.
16 Dii ron en sikandan od gutasan woy'd kotokkangan, woy dii ran don mandad od ko-ilad to monit woy taddot ahad ondan no mosakit no monit.
17 Oyya su iddos Natin Karnero no riyot isowwan to trunu kos od tamong kandan. Od piyoddon din sikandan diyot mgo sobsob to oweg no od pokovoggoy to umuu. Woy dii ron sikandan od lanu, oyyos od punason don to Monama iddos mgo dayas dan.”