11
Dos Oruwon Tohodponudtuu to Kovonnaan
1 Na nopongnga idda, id boggayan a to toppong no iling to tukod woy id ikohiyan a to, “Lohinat ka woy topongngow iddos templo to Monama woy dos buwisanan, woy iyapow iddos id ponsimba.
2 Piru yo ru opila tod toppong iddos lama to templo, su atag idda taddot diid pomakoy to Monama. Oyyos od geeheddan dan en iddos uhis no bonuwa to Jerusalem daom to oppat-no-puu oruwon buwan,
3 no idda en so sokkad no maan woy oruwon gatus annom-no-puu (1,260) no allow. Daom taddon timpu, id popiyod ku iddos oruwon tohodposivonnaa moka-atag koddi. Od oumpak sikandan to saku, woy id posaddoo ran iddos id poponudtuu ku kandan.”
4 Dos oruwon tohodposivonnaa, sikandan en iddos noponunggelengan dangan to oruwon kayu no olibo, woy dos oruwon suhu no id poohinat diyot isowwan to Monama nod Longaggon no od ponguu to mgo minuvu ka-ay to ampow't ingod.
5 Otik duwon od posakit kandan, od leggua kos apuy riyot bivig dan amoy'd loow taddot od pongkuntra kandan. Iling en taddon kopotayan kos od kosahapan to ahad ondoy nod posakit kandan.
6 Id boggayan sikandan to kotuusan nod tohoo to souhapun amoy diid poko-uran, laggun tod posaddoo ran taddot id poponudtuu to Monama kandan. Id boggayan mandad sikandan to kotuusan nod kovauy no longossa kos mgo oweg, woy id boggayan sikandan to kotungud nod po-uma to nokod-osso-osson kororattan ka-ay to ampow't ingod ahad kannu ran id kopi-i.
7 Na otid kopongnga ran don tod posaddoo iddos id poponudtuu to Monama kandan, od lusuran sikandan to moka-arat-arat no monnanap nod leggua pomon diyot bobbo no waad tomanan kos koroomman. Od toluwon taddon monnanap iddos oruwon tohodposivonnaa woy'd imotayan din sikandan.
8 Na iddos mgo bangkoy ran, id tonanan da riyot koosada tod bontuhon no bonuwa no riyon en no lugaa id pakpak to krus iddos kandan no Longaggon. Iddon bonuwa, od koponunggelengan to Sodoma woy Ehipto, oyya su morat kos pinuungan to mgo minuvu rutun.
9 Daom to otollu woy tongngot allow, iddos mgo minuvu no id pomon diyot nokod-osso-osson ingod, nokod-osso-osson kinohiyan woy nokod-osso-osson tribu, id undiyonnan woy'd tongtongngan dan iddos mgo bangkoy. Woy id diiyan dan idda no id lobbong.
10 Nahaa kos langun no minuvu ka-ay to ampow't ingod, woy id pista ran woy'd povoggayoy to rigalu pomon to kopotayan taddot oruwon tohodposivonnaa no id posuppit kandan.
11 Piru to nopongnga iddos otollun allow woy'd tongnga, id polivod to Monama iddos songnga rin nod pokovoggoy to umuu, woy idda ron en, id lohinat sikandan. De-en id pongkookoo to mattag allak iddos langun nod pokokita kandan.
12 Na, norinog taddot oruwon tohodposivonnaa iddos monokkaan bawos pomon diyot datas to langit no mid ungketen to, “Undini kow!” Na, novatun sikandan diyot datas to langit duma to souhapun, laggun tid ontong kandan iddos od pongkuntra kandan.
13 Idda ron en, tigkow id linug to oray'n monokkaa. Nohobba iddos iko-sopuun ba-ad taddon bonuwa, woy pittun maan (7,000) no minuvu kos id poomatoy. Iddos waa id poomatoy, id geddam don to dakkoon allak, woy id posivantug don sikandan to Monama no riyot datas to langit.
14 Na, idda en kos iko-oruwon moka-arat-arat no kotomanan nod inguma ka-ay to ampow't ingod, woy od tinundug mandon iddos iko-otollun moka-arat-arat no kotomanan.
Dos Iko-pittun Trumpeta
15 Na iddos iko-pittun ponolihan, id porahing to trumpeta rin, woy idda ron en, duwon monokkaan mgo bawos pomon diyot datas to langit no mid ungketen to, “Ko-ungkay, worad osson od hari ka-ay to ampow't ingod, ko konna, idda ra en so Monama nod Longaggon ta woy Mesiyas no id popiyod din, woy od hari sikandin to waad tomanon.”
16 Idda mandad so oruwompuu-oppat nod pombuyyahon no mid unsad diyot mgo trunu ran no riyot isowwan to Monama, id ponlingko-od sikandan woy id simba kandin.
17 Kahi ran to,
“Monama nod Longaggon no Motuus to Langun,
sikkow en kos Monama to waa pa kos tigkonayan to ingod, ahad ko-ungkay.
Od posolomatan doy sikkow,
su id pokita ru kos mokososoobbun kotuusan du, woy id tigkanoy kad nid hari.
18 Lampas kos langot to mgo minuvu no waa id pomakoy kikow,
piru id inguma ron en kos timpu no id pokita ru iddos lampas no langot du kandan, oyya su od hukuman du iddos id poomatoy ron.
Id inguma ron en kos timpu nod boggayan du to ganti iddos sinuhuwan du no mgo propeta,
dos langun no minuvu ru, dos langun no duwon allak kikow, dos novantug woy dos waa novantug.
Woy od imotayan dud iddos id puung to kororattan ka-ay to ampow't ingod.”
19 Na, nopokesan iddos templo to Monama no riyot datas to langit. Diyot daom taddon templo, nokita ku iddos kavan no id tawwan to mgo tandu to Monama no nosulat dangan. Woy idda ron en, id kokilat to moka-arat-arat, id pomaansi, id linug woy ayas id uran to doorakkoon ays.