3
Ɨndagɨlo kʉ bɨɨmɨlɨli baa kɨpanga kya Kyala
1 Ʉbʉjobi ʉbʉ bwa nalooli, ʉbʉ bukʉtɨ, “Ʉmundʉ ʉjʉ ikʉlonda ɨmbombo jaa kʉja mwɨmɨlɨli nkɨpanga kya Kyala, ʉjo asalile ɨmbombo ɨnunu.”
2 Po ʉmwɨmɨlɨli gwa kɨpanga kya Kyala ajege mundʉ ʉjʉ atikʉjobigwa kabiibi, ajege mwegi gwa nkiikʉlʉ jʉmojwene, alɨngasookelaga panja. Iitiimege ndɨ fyosa, ajege na mahala, ajege gwa kwɨmɨkigwa, ajege mwambɨlɨla baheesya, amanyege ʉkʉmanyisya.
3 Alɨngajaga ngaala bwalwa pamo ʉkʉfulasya abandʉ, looli ajege mooloolo, alɨngajwegaga na bandʉ, alɨngajaga nɨ kɨnyonyo ɨkɨbiibi ɨkya ndalama.
4 Ajege mundʉ gwa kwɨmɨlɨla kanunu ɨnyumba jaake, ʉjʉ ameenye ʉkʉmanyisya abaanaake, bampɨlɨkege nʉ kʉmpa ʉlwɨmɨko loosa.
5 Lɨnga ʉmundʉ akabagɨla ʉkwɨmɨlɨla ɨnyumba jaake, abagiile bʉleebʉle ʉkwɨmɨlɨla ɨkɨpanga kya Kyala?
6 Kangɨ alɨngajaga mundʉ ʉjʉ apɨndwike mbʉpiipi, alɨngiisa kwijumbɨka nʉ kʉlongigwa, bo ʉlʉ aalongiigwe Seetano.
7 Looli ajege mundʉ ʉjʉ bikʉnnjoba kanunu abandʉ aba bakaja baa nkɨpanga kya Kyala, ʉkʉtɨ alɨngajobigwaga kabiibi nʉ kʉkoligwa nʉ ntego gwa Seetano.
Ɨndagɨlo kʉ batʉʉli baa kɨpanga kya Kyala
8 Kangɨ abatʉʉli baa kɨpanga bajege bandʉ aba babagiisye ʉkwɨmɨkigwa, balɨngasyandʉlaga syandʉlaga ɨnongwa, balɨngajaga bagaala bwalwa, balɨnganyonywaga ʉkʉkaba ɨkyʉma kʉ bʉsyobi.
9 Bajege bandʉ aba bikʉʉmɨɨlɨla ʉbwanalooli ʉbwa lwitɨko nɨ ndumbula ɨnyeelu.
10 Bageligwege taasi. Lɨnga baboniike ʉkʉtɨ babagiisye, babombege ɨmbombo ɨjaa bʉtʉʉli nkɨpanga.
11 Kangɨ abakasi baabo babagɨsyege ʉkwɨmɨkigwa, balɨngajaga boohesi. Biitiimege nʉ kʉsʉʉbɨligwa ndɨ syosa.
12 Ʉntʉʉli ajege mwegi gwa nkiikʉlʉ jʉmojwene, alɨngasookelaga panja. Kangɨ abɨɨmɨlɨlege abaanaake nɨ nyumba jaake kanunu.
13 Aba bikʉbomba ɨmbombo jaa bʉtʉʉli bwa kɨpanga kanunu, bikʉkaba ʉlwɨmɨko. Bikʉja bakifu ndwitɨko ʉlʉ balɨ nalo mwa Kɨlɨsiti Jesu.
Ʉbwanalooli bwa lwitɨko lwɨtʉ
14 Nikʉkʉsimbɨla amasyʉ aga, bo ndɨ nʉ lʉsʉʉbɨlo ʉlwa kwisa kʉmyako mbʉpiipi itolo.
15 Lɨnga ngʉkaabɨla, ʉsyaganie ɨsi sikʉlondigwa ʉkʉbombigwa na biitɨki. Abo kyo kɨpanga kya Kyala ʉMʉʉmi. Ɨkɨlʉndɨlo ɨkyo jo mbanda, kangɨ lwalo lwa nalooli.
16 Kɨsita kwilaamwa, ɨsya mbʉsolofu ndwitɨko lwɨtʉ ngʉlʉmba, syo ɨsi,
Kɨlɨsiti aabonekiile mu mbɨlɨ gwa bʉndʉ,
Mbepo alɨ nkeeti ʉkʉtɨ ngolofu,
aaboniike kʉ bandʉmi,
aafumusiigwe mfiisʉ fyosa,
abandʉ baa mfiisʉ fyosa baalɨmmwitiike,
aalyegiigwe ʉkʉbʉʉka kʉmwanya mbʉsisya.