7
Aba bikʉlongosigwa na Jesu bakaja paasi pa ndagɨlo sya Moose
1 Baamyɨtʉ ndwitɨko, ngʉjoba na nuumwe, mwe musimeenye ɨndagɨlo. Mumeenye ʉkʉtɨ ʉmundʉ ikʉlondigwa ʉkʉsikonga ɨndagɨlo bo aliko kwene kʉ bʉʉmi.
2 Bo ʉlwa kɨfwanikɨsyo ɨkya lʉlagɨlo ʉlwa bwegi, ʉnkiikʉlʉ akabagɨla ʉkʉnndeka ʉndʉme bo akaalɨ mʉʉmi. Looli lɨnga ʉndʉme afwile, po ʉnkiikʉlʉ ikwabʉligwa ʉkʉfuma ndʉlagɨlo ʉlwa bwegi.
3 Kokʉtɨ lɨnga ikwegigwa nʉ nnyambala ʉjʉngɨ bo ʉndʉme akaalɨ mʉʉmi, ʉjo ndogwe. Looli lɨnga ʉndʉme afwile, alɨ nʉ bwabʉke ndʉlagɨlo lʉla. Nalɨnga ikwegigwa nʉ jʉngɨ, atikʉja ndogwe.
4 Baamyɨtʉ, bʉbʉʉbo kʉmyɨnu, nuumwe mufwile kʉ ndagɨlo, mulɨ baabʉke kʉ njɨla jaa bʉfwe bwa Kɨlɨsiti. Po nuumwe mulɨ baa ʉjʉ aasyʉkile ʉkʉfuma mbʉfwe, ʉkʉtɨ ʉswe twesa tʉpege ɨseke ɨnunu kwa Kyala.
5 Akabalɨlo kala, ʉbʉndʉ bwɨtʉ ʉbwa bʉtʉlanongwa bwatʉlongosyaga, kangɨ ɨndagɨlo syafipelile ɨfinyonyo ɨfibiibi ʉkʉbomba ɨmbombo mmibɨlɨ gyɨtʉ. Jo nongwa ɨjɨ twapaga ɨseke ɨmbiibi ɨsi sikʉtwala ʉbʉfwe.
6 Twapinyiigwe nɨ ndagɨlo, looli akabalɨlo aka tʉfwile pamopeene na Kɨlɨsiti, kʉnongwa ɨjo tʉlɨ baabʉke kʉ ndagɨlo ɨsi syatʉpinyaga. Akabalɨlo aka tʉtikʉmmbombela Kyala kʉ njɨla ɨjaa ijolo ɨjaa kʉkola ɨndagɨlo ɨsi syasimbiigwe, looli tukʉmmbombela Kyala kʉ njɨla ɨmbya ɨjaa kʉlongosigwa na Mbepo Mwikemo.
Abandʉ boosa bikʉlagɨligwa nʉ bʉtʉlanongwa
7 Po tʉtɨ fiki? Bʉle, tʉtɨ ɨndagɨlo mbiibi? Hɨmma, bʉkaja bwanalooli na panandɨ! Nalooli lɨnga ɨndagɨlo sikaalipo, ʉne ngalɨ ngamanya ʉkʉtɨ ʉbʉtʉlanongwa fyo fiki. Namanga lɨnga lʉkaalipo ʉlʉlagɨlo ʉlʉ lukʉtɨ, “Ʉlɨnganyonywaga akandʉ akaa nnino,” ʉne ngalɨ ngamanya ʉkʉtɨ ʉkʉnyonywa akandʉ akaa mwinangʉ bʉtʉlanongwa.
8 Looli bo nsimeenye ɨndagɨlo, po ʉbʉtʉlanongwa bʉlɨnkʉfisambʉla ɨfinyonyo ɨfibiibi ɨfya lʉko nʉ lʉko nkatɨ mu ndumbula jangʉ. Po lɨnga ɨndagɨlo sikajapo, ʉbʉtʉlanongwa bʉkaja na maka.
9 Amasikʉ agaa ʉko kʉnyuma, naatʉʉgalaga kɨsita kʉsimanya ɨndagɨlo sya Kyala. Looli bo nsimeenye ɨndagɨlo, ʉbʉtʉlanongwa bʉlɨnkʉja nʉ bʉlagɨli kʉmyangʉ,
10 ndɨnkʉfwa, ndɨnkʉsibona ɨndagɨlo ɨsyo, ɨsi syalɨ sya kʉmba ʉbʉʉmi, ngɨmba sikʉmba ʉbʉfwe.
11 Namanga kʉ njɨla jaa ndagɨlo ɨsyo, ʉbʉtʉlanongwa bʉlɨnkʉʉsyoba ʉne nʉ kʉʉngoga.
12 Po leelo silɨ pabwelu ʉkʉtɨ, ɨndagɨlo sya Kyala nyiikemo, nunu, kangɨ sya bwanalooli.
13 Bʉle, akandʉ akanunu ako kaalɨndwaliile ʉbʉfwe? Hɨmma na panandɨ! Ʉbʉtʉlanongwa bo ʉbʉ bwalɨndwaliile ʉbʉfwe ʉkwendela kʉ ndagɨlo sila ɨnunu, ʉkʉtɨ bʉboneke ʉkʉja bo bʉtʉlanongwa. Kʉ njɨla jaa ndagɨlo, ʉbʉtʉlanongwa bwasisimɨkɨsiigwe ʉkʉja bʉtʉlanongwa nalooli.
Jesu ikʉbapoka abandʉ ʉkʉfuma mbʉlagɨli ʉbwa bʉtʉlanongwa
14 Tʉmeenye ʉkʉtɨ ɨndagɨlo sya Moose syafumile kwa Kyala, looli ʉne ndɨ mundʉ itolo, ʉne nʉʉlɨsiigwe ʉkʉja ntʉmwa gwa bʉtʉlanongwa.
15 Ɨsi ngʉbomba nalooli ʉne ndikwibona. Niiganile ʉkʉbomba ɨnunu, leelo ndikʉbomba. Looli ɨsi ngasigana syo ɨsi ngʉbomba.
16 Paapo ʉne ngʉbomba ɨsi ngasigana, po sikʉnangɨsya ʉkʉtɨ ngwitɨka, ʉkʉtɨ ɨndagɨlo nunu.
17 Po ndikʉja jo ʉne ne ngʉbomba ɨsi ngasigana, looli bʉtʉlanongwa ʉbʉ bʉlɨ nkatɨ mmyangʉ.
18 Mmeenye ʉkʉtɨ nkatɨ mmyangʉ, kokʉtɨ mbʉndʉ bwangʉ ʉbwa bʉtʉlanongwa, kakajamo akandʉ akanunu kokoosa. Namanga niiganile ʉkʉbomba ɨnunu, leelo ndikʉbomba.
19 Po ndikʉbomba ɨnunu ɨsi niiganile, looli ngʉbomba ɨmbiibi ɨsi ngiigana ʉkʉsibomba.
20 Paapo ʉne ngʉbomba ɨsi ngasigana, po sikʉnangɨsya ʉkʉtɨ ndikʉja jo ʉne ne ngʉbomba ɨsyo, looli bukʉja bʉtʉlanongwa ʉbʉ bʉlimo nkatɨ mmyangʉ.
21 Po leelo nkabwene akandʉ aka: Bo ngʉlonda ʉkʉbomba akandʉ akanunu, ngʉkwabigwa ʉkʉbomba akandʉ akabiibi.
22 Ɨndagɨlo sya Kyala nsiganile nɨ ndumbula jangʉ joosa.
23 Looli ʉtʉmbakaasya ʉtwa mbɨlɨ gwangʉ tukʉlongosigwa na maka agaa bʉtʉlanongwa aga gikʉpɨngana nɨ nyiinogono. Fikʉmbela ʉkʉja ntʉmwa gwa kʉbʉbombela ʉbʉtʉlanongwa ʉbʉ bukʉbomba ɨmbombo mu mbɨlɨ gwangʉ.
24 Ahɨɨli ʉne! Jo jwani ʉgwa kʉmboka ʉne, nsookemo mbʉndʉ ʉbʉ bukʉlongosigwa nʉ bʉfwe?
25 Kyala atuufigwege, ʉjʉ ikʉmboka kʉ njɨla jaa Ntwa gwɨtʉ Jesu Kɨlɨsiti!
Namanga ʉne ndɨ ntʉmwa gwa ndagɨlo sya Kyala mu nyiinogono syangʉ, looli mbʉndʉ bwangʉ, ndɨ ntʉmwa gwa ndagɨlo ɨsya bʉtʉlanongwa.