3
Johani ʉMoosi ikʉtendekesya ʉkwisa kwa Jesu
(Matai 3:1-12; Maalɨka 1:1-8; Johani 1:19-28)
1 Ɨkyɨnja kya 15 mbʉlongosi bwa malafyale gwa Balooma Tibelio, Pontio Pilati aalongosyaga nkiisʉ ɨkya mu Jutai. Heloti aalongosyaga ɨkiisʉ ɨkya Galilai, joope Filipo ʉgwamyabo aalongosyaga mu Ituleja na mu Tulakoniti. Lisanija joope aalongosyaga mu Abilene.
2 Anasi na Kajafa baalɨ bapuuti abalongosi.
Akabalɨlo ako, Kyala alɨnkʉntʉma Johani ʉmwana gwa Sakalija ʉkʉlʉmbɨlɨla ndʉngalangala.
3 Po Johani alɨnkwenda ntwaja toosa ʉtʉ twalɨ kɨfuki nʉ lwɨsi Jolitani. Aalʉmbɨlɨlaga ʉkʉtɨ abandʉ bapɨndʉke, boosigwe, po Kyala ikʉbahobokela ʉbʉtʉlanongwa bwabo.
4 Ɨsyo siboniike syo ɨsi syasimbiigwe liijolo mwa kalata gwa nkunguluka Jeesaja ʉkʉtɨ,
“Ɨliisyʉ lya mundʉ likʉkoolela ndʉngalangala likʉtɨ,
‘Mutendekesye ʉnsebo ʉgwa kwendamo ʉNtwa!
Mugolosye ɨnjɨla syake!
5 Kʉkʉtɨ lʉsooko lʉsyɨligwe,
kʉkʉtɨ kyamba nʉ twamba fitelamikigwege.
Apa paniongeele pagolosigwege,
apa pakaja kanunu pagwasigwege.
6 Po abandʉ boosa bikʉbʉbona ʉbʉpoki bwa Kyala.’ ”
7 Abandʉ bingi bankongaga Johani kʉkoosigwa. Alɨnkʉbabʉʉla alɨnkʉtɨ, “Ʉmwe mwe baa ndʉjungu lwa njoka! Bʉle, mukʉtɨ mubagiile ʉkʉpona ʉlʉfundo lwa Kyala lɨnga mukʉpɨndʉka kʉ bʉsyobi?
8 Po munangɨsye ɨseke ɨsi sikʉnangɨsya ʉkʉtɨ mupɨndwike. Muleke ʉkwinogona ʉkʉtɨ, ‘Ʉswe taata jo Abulahamu.’ Nikʉbabʉʉla, Kyala abagiile ʉkʉgapela amabwe aga ʉkʉja baana baa Abulahamu!
9 Ʉlʉ ʉbʉlongi bwa Kyala bʉfikile, bo ʉlwa mundʉ ʉjʉ akolile ɨndwanga, iitendekiisye ʉkʉtumula ɨmipiki. Po ʉmpiki ʉgʉ gʉtikʉpa ɨseke ɨnunu, gukʉtumuligwaga nʉ kʉsopigwa mmooto.”
10 Po ɨkɨlʉndɨlo kya bandʉ balɨnkʉnndaalʉʉsya balɨnkʉtɨ, “Ʉlʉ po tʉtɨ fiki?”
11 Johani alɨnkʉbaamula alɨnkʉtɨ, “Ʉjʉ alɨ nɨ myenda mibɨlɨ annjabɨle ʉjʉ akaja nɨ myenda, joope ʉjʉ alɨ nɨ findʉ annjabɨle ʉjʉ akaja nɨ findʉ.”
12 Abasongesya songo boope baabʉʉkile ʉkʉtɨ boosigwe, balɨnkʉnndaalʉʉsya Johani balɨnkʉtɨ, “Gwe Mmanyisi, na ʉswe tʉtɨ fiki?”
13 Alɨnkʉbaamula alɨnkʉtɨ, “Muleke ʉkʉsongesya ɨsongo ʉkʉkɨnda ɨkɨpɨmo ɨkɨ kɨbɨɨkiigwe.”
14 Boope abasikali balɨnkʉnndaalʉʉsya balɨnkʉtɨ, “Na ʉswe tʉtɨ fiki?” Alɨnkʉbabʉʉla alɨnkʉtɨ, “Muleke ʉkwega ɨndalama sya bandʉ kʉ maka, mulɨngasitaakaga abandʉ ɨsya bʉtʉngʉlʉ, looli mufwanege nʉ mfwalo gwɨnu.”
15 Akabalɨlo ako abandʉ baaguulɨlaga ʉkwisa kwa Meesija, boosa biinogonaga ʉkʉtɨ pamo Johani jo Meesija.
16 Looli Johani bo asyageenie ɨsyo, alɨnkʉbaamula boosa alɨnkʉtɨ, “Ʉne ngʉboosya na mɨɨsi, looli ikwisa ʉjʉ alɨ na maka ʉkʉngɨnda ʉne, ngabagɨsya nʉ kwabʉla ʉtʉkoba ʉtwa filato fyake. Ʉmwene jo ʉjʉ ikʉboosyaga na Mbepo Mwikemo nʉ mooto.
17 Afwene nʉ mundʉ ʉjʉ akolile mmaboko ɨkya kʉlʉlʉʉkɨsya, iitendekiisye ʉkʉlʉlʉʉsya. Bo alʉlʉʉsiisye, ikʉbʉngaania mu ndamba, looli ɨmikʉkʉʉjɨlo ikʉgɨkosya nʉ mooto ʉgʉ gʉtikʉsima sikʉ.”
18 Kʉ masyʉ ago na gangɨ amingi, Johani aabasokaga abandʉ nʉ kʉbalʉmbɨlɨla ɨNdʉmi ɨNunu ɨjaa Kyala.
19 Akabalɨlo akangɨ Johani alɨnkʉnkemela ʉmalafyale Heloti, paapo Heloti aalɨmmwegile Helotija ʉnkasi gwa gwamyabo, na kʉ mbiibi nyingi ɨsi aabombile.
20 Po Heloti alɨnkongelapo ʉbʉbiibi, alɨnkʉmpinya Johani mu nnyololo.
Jesu ikoosigwa
(Matai 3:13-17; Maalɨka 1:9-11)
21 Abandʉ bingi bo bikoosigwa, joope Jesu alɨnkoosigwa. Bo ikwipuuta, kʉmwanya kʉlɨnkwigʉka,
22 Mbepo Mwikemo alɨnkʉsuluka pamwanya pamyake, nʉ mbɨlɨ bo ʉgwa ngʉnde. Ɨliisyʉ lya Kyala ʉkʉfuma kʉmwanya, lɨlɨnkʉtɨ, “Ʉgwe gwe Mwanangʉ ʉNkʉndwe, gwe niikyeliile na nungwe.”
Ɨkɨkolo kya Jesu Kɨlɨsiti
(Matai 1:1-17)
23 Jesu bo ikwanda ɨmbombo jaake, aalɨ nɨ fyɨnja amalongo matatʉ bʉno. Abandʉ biinogonaga ʉkʉtɨ Jesu aalɨ mwana gwa Joosefu,
Joosefu aalɨ mwana gwa Eli,
24 Eli aalɨ mwana gwa Matati,
Matati aalɨ mwana gwa Leebi,
Leebi aalɨ mwana gwa Meliki,
Meliki aalɨ mwana gwa Jana,
Jana aalɨ mwana gwa Joosefu,
25 Joosefu aalɨ mwana gwa Matatija,
Matatija aalɨ mwana gwa Aamosi,
Aamosi aalɨ mwana gwa Nahumu,
Nahumu aalɨ mwana gwa Esili,
Esili aalɨ mwana gwa Nagaji,
26 Nagaji aalɨ mwana gwa Maati,
Maati aalɨ mwana gwa Matatija,
Matatija aalɨ mwana gwa Semeji,
Semeji aalɨ mwana gwa Joseki,
Joseki aalɨ mwana gwa Jota,
27 Jota aalɨ mwana gwa Jwanani,
Jwanani aalɨ mwana gwa Lesa,
Lesa aalɨ mwana gwa Selubabeli,
Selubabeli aalɨ mwana gwa Salatyeli,
Salatyeli aalɨ mwana gwa Neli,
28 Neli aalɨ mwana gwa Meliki,
Meliki aalɨ mwana gwa Andi,
Andi aalɨ mwana gwa Kosamu,
Kosamu aalɨ mwana gwa Elimatamu,
Elimatamu aalɨ mwana gwa Eli,
29 Eli aalɨ mwana gwa Jooswa,
Jooswa aalɨ mwana gwa Elieseli,
Elieseli aalɨ mwana gwa Jolimu,
Jolimu aalɨ mwana gwa Matati,
Matati aalɨ mwana gwa Leebi,
30 Leebi aalɨ mwana gwa Simyoni,
Simyoni aalɨ mwana gwa Juuta,
Juuta aalɨ mwana gwa Joosefu,
Joosefu aalɨ mwana gwa Jonamu,
Jonamu aalɨ mwana gwa Elyakimu,
31 Elyakimu aalɨ mwana gwa Meleja,
Meleja aalɨ mwana gwa Mena,
Mena aalɨ mwana gwa Matata,
Matata aalɨ mwana gwa Natani,
Natani aalɨ mwana gwa Ndaabɨti,
32 Ndaabɨti aalɨ mwana gwa Jese,
Jese aalɨ mwana gwa Obeti,
Obeti aalɨ mwana gwa Boasi,
Boasi aalɨ mwana gwa Salimoni,
Salimoni aalɨ mwana gwa Nasoni,
33 Nasoni aalɨ mwana gwa Aminatabu,
Aminatabu aalɨ mwana gwa Andimini,
Andimini aalɨ mwana gwa Esoloni,
Esoloni aalɨ mwana gwa Pelesi,
Pelesi aalɨ mwana gwa Juuta,
34 Juuta aalɨ mwana gwa Jaakobo,
Jaakobo aalɨ mwana gwa Isaka,
Isaka aalɨ mwana gwa Abulahamu,
Abulahamu aalɨ mwana gwa Tela,
Tela aalɨ mwana gwa Naholi,
35 Naholi aalɨ mwana gwa Selʉgi,
Selʉgi aalɨ mwana gwa Lagau,
Lagau aalɨ mwana gwa Pelegi,
Pelegi aalɨ mwana gwa Ebeli,
Ebeli aalɨ mwana gwa Sala,
36 Sala aalɨ mwana gwa Kenani,
Kenani aalɨ mwana gwa Alipakisati,
Alipakisati aalɨ mwana gwa Semu,
Semu aalɨ mwana gwa Nwaka,
Nwaka aalɨ mwana gwa Lameki,
37 Lameki aalɨ mwana gwa Metusela,
Metusela aalɨ mwana gwa Enoki,
Enoki aalɨ mwana gwa Jaleti,
Jaleti aalɨ mwana gwa Mahalaleli,
Mahalaleli aalɨ mwana gwa Kenani,
38 Kenani aalɨ mwana gwa Enosi,
Enosi aalɨ mwana gwa Seti,
Seti aalɨ mwana gwa Atamu,
Atamu aalɨ mwana gwa Kyala.