4
Ɨnjɨla jaa kʉbamanya abamanyisi baa bwanalooli na baa bʉtʉngʉlʉ
1 Bakʉndwe, paapo abakunguluka bingi abaa bʉtʉngʉlʉ baboniike pakiisʉ, mulɨngabiitɨkaga abandʉ boosa aba bikʉtɨ balɨ na Mbepo gwa Kyala, looli mubakeetege kanunu ʉkʉtɨ abandʉ abo bikʉlongosigwa na Mbepo gwa Kyala pamo mma.
2 Ɨnjɨla jaa kʉmmanya ʉkʉtɨ ʉmundʉ ikʉlongosigwa na Mbepo gwa Kyala jo ɨjɨ. Gwesa ʉjʉ ikwitɨka nʉ kʉjoba ʉkʉtɨ Jesu Kɨlɨsiti aaliisile alɨnkʉja nʉ mbɨlɨ bo ʉgwa mundʉ, ʉjo jo ʉjʉ ikʉlongosigwa na Mbepo gwa Kyala.
3 Looli gwesa ʉjʉ atikʉmmwitɨka Jesu bo ʉlo, atikʉlongosigwa na Mbepo gwa Kyala. Ʉmundʉ ʉjo ikʉlongosigwa nɨ mbepo jaa ndʉgʉ gwa Kɨlɨsiti. Ʉmwe mupɨliike ʉkʉtɨ ɨmbepo ɨjo jikwisa, na ʉlʉ jiisile pakiisʉ.
4 Looli baanangʉ, ʉmwe mulɨ bandʉ baa Kyala, mubatolile abandʉ abo abaa bʉtʉngʉlʉ, paapo Mbepo gwake ʉjʉ alimo nkatɨ mmyɨnu, ʉmwene alɨ na maka ʉkʉnkɨnda Seetano, ʉjʉ ikʉbalongosya abandʉ abaa pakiisʉ.
5 Abakunguluka abo abaa bʉtʉngʉlʉ baa pakiisʉ, bikʉjoba ɨsya pakiisʉ. Boope abandʉ abaa nkiisʉ bikʉbapɨlɨkɨsya.
6 Looli ʉswe tʉlɨ bandʉ baa Kyala. Ʉmundʉ ʉjʉ ammeenye Kyala, ikʉtʉpɨlɨkɨsya, looli ʉmundʉ ʉjʉ akaja gwa Kyala, atikʉtʉpɨlɨkɨsya.
Kʉ njɨla ɨjo tukʉkʉmanya ʉkʉlegana ʉkwa bandʉ aba bikʉlongosigwa na Mbepo gwa bwanalooli, na kʉlɨ bala bikʉlongosigwa nɨ mbepo ɨjaa bʉtʉngʉlʉ.
Kyala abaganile abaanaake, po boope bagananege
7 Bakʉndwe, tʉgananege, paapo ʉlʉgano lukʉfuma kwa Kyala. Ʉmundʉ gwesa ʉjʉ abaganile abanine, jo mwana gwa Kyala, kangɨ jo ammeenye Kyala.
8 Looli ʉmundʉ ʉjʉ akabagana abanine, akammanya Kyala, paapo ʉlʉgano lukʉfuma kwa Kyala.
9 Kyala jʉʉjo aatʉnangiisye ʉlʉgano lwake kʉ njɨla jaa kʉntʉma ʉMwanaake jʉmojwene ntɨga nkiisʉ muno, ʉkʉtɨ mo tʉbwagile ʉbʉʉmi.
10 Ʉlʉgano ʉlwa nalooli kʉkaja kokʉtɨ tʉnnganile Kyala! Looli ʉmwene jo ʉjʉ aatʉganile ʉswe, mpaka aalɨntʉmile nʉ Mwanaake, aje ikemo lya kʉbooligwa ʉkʉtɨ abʉsoosyemo ʉbʉtʉlanongwa bwɨtʉ nʉ kʉtʉfwania na Kyala.
11 Bakʉndwe, lɨnga Kyala aatʉganile ʉswe bo ʉlʉ, tukʉlondigwa na nuuswe tʉgananege.
12 Akajako ʉmundʉ najʉmo ʉjʉ ammbwenemo Kyala. Looli lɨnga tukʉganana, Kyala ikwendelela ʉkʉja nkatɨ mmyɨtʉ, nʉ lʉgano lwake lukwisʉla nkatɨ mmyɨtʉ.
13 Tʉmeenye ʉkʉtɨ tukwendelela ʉkʉja mwa Kyala, joope Kyala ikwendelela ʉkʉja nkatɨ mmyɨtʉ, paapo atʉpeele Mbepo gwake.
14 Ʉswe tʉsibwene, kangɨ tukʉbanangɨsya abangɨ, ʉkʉtɨ Taata Kyala aalɨntʉmile ʉMwanaake pakiisʉ, ʉkʉtɨ aje Mpoki gwa bandʉ.
15 Ʉmundʉ gwesa ʉjʉ ikwitɨka ʉkʉtɨ Jesu Mwana gwa Kyala, Kyala ikʉja nkatɨ mmyake, joope ikʉja nkatɨ mwa Kyala.
16 Lɨɨlɨno ʉswe tʉmeenye nʉ kwitɨka ʉkʉtɨ Kyala atʉganile.
Ʉlʉgano lukʉfuma kwa Kyala. Gwesa ʉjʉ ikʉja ndʉgano lwake, ikʉja moope mwa Kyala jʉʉjo, na kangɨ Kyala ikwendelelaga ʉkʉja nkatɨ mmyake.
17 Jo nongwa ɨjɨ, ʉlʉgano lwake Kyala lukwisʉla nkatɨ mmyɨtʉ, ʉkʉtɨ tʉjege bakifu pi isikʉ lya kʉlongigwa, paapo ʉbʉʉmi bwɨtʉ nkiisʉ muno, bʉfwene bo muno Jesu aatʉʉgaliile pakiisʉ.
18 Apa palɨ nʉ lʉgano pakaja nʉ lʉtende, looli ʉlʉgano ʉlwa nalooli lukʉlʉsoosya ʉlʉtende loosa, paapo ʉkʉlongigwa ko kʉno kukʉbapelela abandʉ ʉkʉja nʉ lʉtende. Gwesa ʉjʉ alɨ nʉ lʉtende, ʉlʉgano lwa Kyala lʉkiisʉla nkatɨ mmyake.
19 Ʉswe tukʉganana, paapo Kyala aatalile ʉkʉtʉgana.
20 Lɨnga jʉmo ikʉtɨ, “Nʉnnganile Kyala,” kʉno ammbengile ʉmwitɨki nnine, ntʉngʉlʉ. Po gwesa ʉjʉ akanngana ʉnnine, ʉjʉ ikʉmmbona na maaso, abagiile bʉleebʉle ʉkʉnngana Kyala ʉjʉ atikʉmmbona?
21 Kyala atʉpeele ʉlʉlagɨlo ʉkʉtɨ gwesa ʉjʉ annganile Kyala, ikʉlondigwa ʉkʉtɨ annganege joope ʉmwitɨki nnine.