3
Ɨnyango jaa nyiipuuto
1 Ɨsya kʉmmalɨɨkɨsyo baamyɨtʉ ndwitɨko, mutwipuutɨlege ʉkʉtɨ ɨnongwa sya Ntwa Jesu, sibalanilege mbɨbɨmbɨbɨ nʉ kwambɨlɨligwa kʉ lwɨmɨko, bo ʉlʉ syalyambɨlɨliigwe pakatɨ pamyɨnu.
2 Kangɨ mutwipuutɨle ʉkʉtɨ Kyala atʉpoke kʉ bandʉ ababiibi fiijo, paapo abandʉ bingi batikʉsiitɨka ɨnongwa sya Ntwa Jesu.
3 Looli ʉNtwa nsʉʉbɨligwa, ʉmwene ikʉbakasya ʉmwe, ikʉbalɨndɨlɨla nʉ kʉnsigɨla Seetano.
4 Ʉswe ʉNtwa atʉpeele ʉlʉsʉʉbɨlo ʉkʉtɨ mukʉbomba, kangɨ mukwendelelaga ʉkʉbomba ɨsi tukʉbalagɨla.
5 ɄNtwa abalongosyege mu ndumbula syɨnu, ʉkʉja nʉ lʉgano bo ʉlwa Kyala, nʉ kʉʉmɨɨlɨla bo ʉmwene Kɨlɨsiti.
Paʉli ikʉbasoka aba bikʉtʉʉgala kɨsita kʉbomba ɨmbombo
6 Mwe baamyɨtʉ, tukʉbalagɨla mu ngamu jaa Ntwa Jesu Kɨlɨsiti ʉkʉtɨ mubeepʉkege abiitɨki boosa aboolo, na aba batikʉsikonga ɨmanyisyo ɨsya Ndʉmi ɨNunu ɨsi twabapeele.
7 Ʉmwe mumeenye muno sikʉlondigwa ʉkʉkonga, bo ʉlʉ twatʉʉgalaga kʉmyɨnu, paapo ʉswe bo tʉlɨ kʉmyɨnu tʉkaalɨ boolo.
8 Kangɨ tʉkaalyaga ɨfindʉ ɨfya mundʉ gwesa jʉla kɨsita kʉhomba. Looli twijʉʉlaga ʉkʉbomba ɨmbombo pakɨlo na pamuusi, ʉkʉtɨ tʉlɨngaja baa kʉbatwalɨla ʉbʉtolwe.
9 Twabombaga bo ʉlo, kʉkaja kokʉtɨ tʉkaabagiisye ʉkwambɨlɨla ʉbʉtʉʉli kʉmyɨnu, looli twabombaga sisiisi ʉkʉtɨ tʉjege baa kʉkeetelamo ʉmwe.
10 Bo tʉlɨ pamopeene na nuumwe, twabalagɨlaga ʉkʉtɨ, “Lɨnga ʉmundʉ ikʉkaana ʉkʉbomba ɨmbombo, mulɨngampaga ɨfindʉ nafimo.”
11 Tukʉjoba ɨnongwa ɨsi paapo tʉpɨliike ʉkʉtɨ, baliko abandʉ bamo nkɨlʉndɨlo kyɨnu boolo, batikʉbomba ɨmbombo najɨmo, looli kwene ʉkwingɨlɨla ɨnongwa ɨsya bangɨ.
12 Po tukʉbalagɨla nʉ kʉbasoka kʉ lʉlagɨlo lwa Ntwa gwɨtʉ Jesu Kɨlɨsiti abiitɨki abo, biijiisyege, babombege ɨmbombo syabo ɨsya kʉkabɨlamo ɨfya kʉbatʉʉla mbʉʉmi bwabo.
13 Looli ʉmwe mwe baamyɨtʉ, mulɨngakatalaga ʉkʉbomba ɨnunu.
14 Mujege maaso nʉ mundʉ ʉjʉ atikʉgakonga amasyʉ aga tʉsimbile mwa kalata ʉjʉ, kangɨ mulɨngalɨɨlanilaga nagwe ʉkʉtɨ sinkolege ɨsoni.
15 Mulɨngammbombelaga ngatɨ ndʉgʉ gwɨnu, looli munsokege ngatɨ gwamyɨnu.
Amasyʉ agaa kʉlagana
16 Po ʉNtwa ʉgwa lʉtengaano, abapege ʉlʉtengaano bwila na ndɨ syosa. ɄNtwa ajege pamopeene na nuumwe mwesa.
17 Ʉne Paʉli ngʉsimba ɨsya kʉbaponia ɨsi nɨ kɨboko kyangʉ jʉjʉʉne, bo ʉlʉ ngʉsimba mwa baakalata bangʉ boosa.
18 Ɨliipyana lya Ntwa gwɨtʉ Jesu Kɨlɨsiti lɨjege na nuumwe mwesa.