11
Abandʉ aba bikʉlʉmbɨlɨla ɨsya bʉtʉngʉlʉ
1 Ngʉbasʉʉma mufise ɨlyojo, nalɨnga ngʉjoba ngatɨ ndɨ nkonyofu. Ngʉbasʉʉma mufise ɨlyojo!
2 Ʉne mbaganile fiijo, bo ʉlʉ Kyala abaganile, namanga mulɨ bo ʉlwa ndɨndwana ʉjʉ akammanyamo sikʉ ʉnnyambala, ʉjʉ naalɨmmwitɨkiisye ʉkwegigwa nʉ nnyambala jʉmojwene, ʉjʉ jo Kɨlɨsiti.
3 Looli lɨɨlɨno ngʉtiila ʉkʉtɨ, bo ʉlwa Efwa muno aasyobiigwe nɨ njoka jɨla ɨngomu, na nuumwe mulɨngiisa kʉsyobigwa, ʉkʉbʉleka ʉbʉgolofu nʉ lʉgano lwɨnu ʉlwa nalooli kwa Kɨlɨsiti.
4 Ngʉjoba bo ʉlo paapo ʉmwe mulɨ bengo ʉkʉmmwambɨlɨla ʉmundʉ ʉjʉ ikwisa kʉkʉmfumusya Jesu ʉjʉngɨ, ʉjʉ ʉswe tʉkaalɨmfumwisye. Kangɨ mulɨ bengo ʉkʉmmwambɨlɨla mbepo ʉjʉngɨ, pamo ɨndʉmi ɨjɨngɨ, ɨfi mukaalyambɨliile ʉkʉfuma kʉmyɨtʉ.
5 Ʉne kʉkaja kokʉtɨ ndɨ nnandɨ ʉkʉbakɨnda aba bikwibona ʉkʉja, “Batʉmigwa bakʉlʉmba.”
6 Nalɨnga sya nalooli ʉkʉtɨ ʉne ngamanya ʉkʉlʉmbɨlɨla kanunu nkyeni nkɨlʉndɨlo ɨkya bandʉ, poope ngaagɨlwa ʉbʉmanyi. Nnangiisye ɨsyo kʉmyɨnu akabalɨlo koosa kʉ njɨla syosa.
Abandʉ abo batʉmigwa baa bʉtʉngʉlʉ
7 Naaliijiisiisye ʉkʉfumusya kʉmyɨnu ɨNdʉmi ɨNunu ɨjaa Kyala, kɨsita kʉhombigwa, ʉkʉtɨ ʉmwe mwinʉligwe. Bʉle, naabombile kabiibi ʉkwijiisya?
8 Bo ngʉbomba ɨmbombo kʉmyɨnu, nambɨlɨlaga ɨfya bʉtʉʉli ʉkʉfuma kʉ fipanga ɨfya Kyala ɨfingi. Naafwene ngatɨ ngʉpoka ʉtʉndʉ twabo, ʉkʉtɨ mbatʉʉle ʉmwe.
9 Akabalɨlo ako lɨnga naagiilwe fimo, ngaabataamiisyepo, paapo abiitɨki biinɨɨtʉ abaa mu Maketonija baalɨmbeele ɨfi ngʉlonda. Niitiimaga ʉkʉtɨ ndɨngabatwalɨla ʉmwe ʉbʉtolwe na panandɨ. Ndikwisa kʉbatwalɨlamo ʉbʉtolwe sikʉ!
10 Ʉbwanalooli bwa Kɨlɨsiti bo ʉlʉ bʉjɨɨliile nkatɨ mmyangʉ, akajako ʉmundʉ najʉmo ntwaja toosa ʉtwa mu Akaja, ʉjʉ abagiile ʉkʉʉsigɨla ʉkwituufya kʉlɨ ɨsi.
11 Bʉle, ngabagana? Kyala ameenye ʉkʉtɨ mbaganile.
12 Ngwendelelaga ʉkʉbomba bo ʉlʉ ngʉbomba lɨɨlɨno, ʉkʉtɨ abatʉmigwa abo aba bikwibona bakʉlʉmba, batoligwe ɨfya kwituukɨfya ʉkʉtɨ bikʉbomba ɨmbombo bo ɨjɨɨtʉ.
13 Abandʉ bo abo, batʉmigwa baa bʉtʉngʉlʉ, bo babombeli abasyobi, bikwibɨɨka ʉkʉja ngatɨ batʉmigwa baa Kɨlɨsiti.
14 Ndɨ ɨsyo tʉtikʉswiga, paapo joope Seetano ikwibɨɨka ngatɨ gwandʉmi gwa lʉmuli.
15 Po leelo tʉtikʉswiga apa boope ababombeli baake bikwibɨɨka ʉkʉja ngatɨ babombeli bagolofu. Ʉmmalɨɨkɨsyo gwabo aabikwambɨlɨla ɨsi sifwene nɨ mbombo jaabo.
Paʉli ikwituufya kʉ ngʉbɨlo syake
16 Ngʉjoba kangɨ, ʉmundʉ alɨngiinogonaga ʉkʉtɨ ʉne ndɨ nkonyofu! Looli nalɨnga mukʉʉnjoba ʉkʉtɨ ndɨ nkonyofu, muundeke nje nkonyofu, mumbɨlɨkɨsye, ʉkʉtɨ na niine niituufyepo panandɨ.
17 Amasyʉ aga ndɨ pakʉjoba ʉlʉ, gakaja go aga aalɨɨndagiile ʉNtwa Jesu, looli ʉkwituufya ʉkʉ ngʉjoba bo ʉlwa mundʉ ʉnkonyofu itolo.
18 Paapo bingi bikwituufya kʉ mbombo sya pakiisʉ apa, na niine ngwituufya.
19 Ʉmwe mukwibona mulɨ na mahala! Looli mutikʉpaasya, mukʉbiitɨkɨla abandʉ abakonyofu!
20 Nalooli, mukʉʉmɨɨlɨla nʉ kʉmmwitɨka nʉ mundʉ ʉjʉ ikʉbabɨɨka mbʉtʉmwa! Pamo ʉmundʉ ʉjʉ ikʉbiibɨla nʉ kʉpoka ʉtʉndʉ twɨnu! Pamo ʉmundʉ ʉjʉ ikʉkabɨlamo kʉmyɨnu, pamo ikʉbatʉka nʉ kʉbakoma kʉmaaso!
21 Sikʉngola ɨsoni ʉkʉjoba, po ʉswe twalɨ boonywa ʉkʉbomba ɨsyo!
Paʉli ikwituufya kʉ boonywa bwake
Lɨnga aliko ʉmundʉ ʉjʉ abagiisye ʉkwituufya ndɨ simo, na niine mbagiisye ʉkwituufya, looli ndɨ pakʉjoba bo ʉlwa mundʉ ʉnkonyofu muno ikʉjobela!
22 Bʉle, abeene bikwituufya ʉkʉtɨ Bahibʉli? Na niine ndɨ Nhibʉli. Bʉle, bikwituufya ʉkʉtɨ Banyaisilaɨli? Na niine ndɨ Mwisilaɨli. Bʉle, bikwituufya ʉkʉtɨ baa ndʉjungu lwa Abulahamu? Na niine ndɨ gwa ndʉjungu lwa Abulahamu.
23 Bʉle, abeene bikwituufya ʉkʉtɨ babombeli baa Kɨlɨsiti? Ʉne ndɨ mbombeli gwa Kɨlɨsiti ʉkʉbakɨnda abeene! Ʉne niijʉʉlile ʉkʉbomba ɨmbombo ʉkʉkɨndapo. Mbinyiigwemo mu nnyololo kaa kingi ʉkʉkɨndapo. Ngomiigwemo fiijo, kangɨ ndɨ mbʉtolwe ʉbwa kʉfwa kaa kingi, ʉkʉbakɨnda abeene. Ʉlʉ ndɨ pakʉjoba bo ʉlwa mundʉ ʉgwa kɨgɨlɨ.
24 Kahaano ngomiigwe ɨfingoti 39 na Bajuuta.
25 Katatʉ ngomiigwe ɨngili sya Balooma, kamo nduunyiigwe na mabwe, katatʉ ɨsitima jɨɨnyoonangɨkiile, kangɨ iisikʉ lɨmo naakupwike, naalɨ mu nyanja pakɨlo na pamuusi.
26 Ɨnjɨla nyingi ɨsi nendaga, naalɨ mbʉtolwe ʉbwa kʉloboka ɨnyɨɨsi ɨsi siiswile, mbʉtolwe ʉbwa kʉkoligwa nɨ minyambuta, mbʉtolwe ʉbwa kʉkomigwa na Bajuuta biinangʉ, nʉ kʉkomigwa na bapanja. Naalɨ mbʉtolwe ntwaja na mmatengele, mbʉtolwe ʉbwa kwenda mu nyanja, na mbʉtolwe ʉbwa ngʉbɨlo ɨsya bandʉ aba bikwibɨɨka ʉkʉja biitɨki biinɨɨtʉ.
27 Mbombile ɨmbombo ɨngafu nʉ kʉtaamigwa, kingi ngonile maaso, ndaamiigwe nɨ njala nɨ kyʉmɨlwa, kaa kingi ngalyamo ɨfindʉ, nʉ kʉtʉʉgala mu mbepo kɨsita myenda.
28 Pamopeene na ɨsyo syosa, kʉkʉtɨ isikʉ ndɨ nɨ kɨtwalo ɨkya kwɨmɨlɨla ɨfipanga fya Kyala fyosa.
29 Lɨnga ʉmundʉ gwesa moonywa, niine ngwipɨlɨka ʉboonywa. Lɨnga jʉmo bampelile ʉkʉgwɨla mbʉtʉlanongwa, ʉne ngʉsulumania.
30 Lɨnga ngʉlondigwa ʉkwituufya, ngwituufya kʉ boonywa bwangʉ.
31 Kyala, ʉGwise gwa Ntwa Jesu, ʉjʉ ikʉlondigwa ʉkʉtuufigwa bwila na bwila, ameenye ʉkʉtɨ ndikʉjoba ɨsya bʉtʉngʉlʉ.
32 Akabalɨlo aka naalɨ mu Ndamasika, ʉndongosi ʉjʉ aasaliigwe nʉ malafyale Aleta, aabɨɨkile abalɨndɨlɨli mfipata fya kaaja, ʉkʉtɨ bangole.
33 Leelo abandʉ bamo baalɨɨsulwisye nkiibo pi itʉʉlo lya imato, naaponile ʉkʉkoligwa.