3
Jezu ni mkulu kuposa Mozeji
1 Na tenepo, abale wakucena, omwe mudatambirambo kucemeredwa kucokera kudzulu, ikhani ndzeru zanu kuna Jezu, Mtumiki ndipo Mkulu wa anyantsembe wa cikhulupiriro comwe timbapupula.
2 Iye akhali wakukhulupirika kwa ule omwe adamuikha pa basa limweri, tenepayu ninga Mozeji akhali wakukhulupirika munyumba ya Mulungu yentse.
3 Jezu adayesedwa wakuthemera mbiri ikulu kuposa Mozeji, bzibodzi-bodzi ninga wakumanga nyumba an'pasidwa mbiri kwene-kwene kuposa nyumbayo.
4 Nakuti nyumba yentse ni yakumangidwa na munthu, tsono Mulungu ndiye an'manga bzentse.
5 Mozeji pakukhala wabasa akhali wakukhulupirika munyumba ya Mulungu yentse, acimbapereka umboni wa bzomwe bzingadadzalewedwa kutsogoloko,
6 tsono Krixtu pakukhala Mwana akhali wakukhulupirika munyumba ya Mulungu. Ndipo nyumba imweyo ndife, penu ife tidakhala dzololo pa cikhulupiriro na cidikhiro comwe ife tirikubzitumbiza naco.
M'cenjezo kwa kulamba kutawira
7 Tenepayu, ninga momwe ulikulewera Mzimu Wakucena kuti:
“Lero pomwe imwe munibva
fala la Mulungu,
8 lekani kuumisa mitima,
ninga bzidacitika pakusandukira Mulungu
panthawe ya kumuyeza mucidambo,
9 komwe makolo yanu
yadandiyeza,
yacindiikhira muyezo,
napo kuti mkati mwa magole makumi manai (40)
mukhadawona bzomwe ine ndidacita.
10 Ndipopo ndidadzakhala na ukali
kwa m'badwe umweule
ndipo ndidati: Mtima wawo
ulikusocera nthawe zentse,
ndipo iwo alibe kuzindikira
njira zangu.
11 Tenepayu ndidalumbira muukali bwangu:
An'dzapita lini cipo
pambuto yangu yakupumira”.
12 Mpholeni abale, kuti paleke kuwoneka m'bodzi wa imwepo wa mtima wakuipa na wakusaya kutawira omwe ungakufunduseni pa Mulungu wamoyo.
13 Tsono ntsiku zentse limbisanani wina na mwandzace, m'kati mwa nthawe yomwe in'cemeredwa “lero”, kuti paleke kuwoneka m'bodzi wa imwe aniumisidwa mtima na kunyengezedwa kwa utazi.
14 Nakuti takhala wa cipande ca Krixtu, pokha-pokha bzikakhala kuti cadidi ife tin'pitiriza kukhala dzololo mpaka kumalizira pacikhulupiriro comwe tikhanaco pakuyambirira.
15 Ndipopo bziri kulewedwa kuti:
“Lero pomwe imwe munibva
fala lace,
lekani kuumisa mitima,
ninga bzidacitika pakusandukira Mulungu”.
16 Mbani amwewa omwe adabva ndipo adamukira? Kodi ni amwewale lini wentse omwe Mozeji adacosa mudziko la Ejipito?
17 Mulungu akhadakalipira yani mkati mwa magole makumi manai (40)? Kodi ni amwewale lini omwe adataza, ndipo mitembo yawo idagwa mucidambo?
18 Ndipo Mulungu adalumbirira yani kuti an'dzapita lini mumbuto yace yakupumira? Kodi ni kwa wale lini omwe alibe kubvera?
19 Na tenepo, tawona kuti alibe kukwanisa kupita thangwe ra kusaya kukhulupirira.