7
1 Yoowart moortany djirin, ka Boolanga-Yira kardjir noonookany boorda djirin.
2 Narl war-djin noonook warma moortany djirin, God noonookany boorda djirin, kidji warriny noonook banidja warma moorta djirinyo, Boolanga-Yira warriny-djin boorda banidja noonookany djirinyo.
3 Nadjil noonook dalba djinang noonang ngooniyang miyal-bwora, yalga noonook boorn yoowart djinang noonroo miyal-bwora.
4 Noonook kayar-waangki noonang ngooniyang, “Ngany dalba djabban-oola noonang miyal-yen,” nginda noonook boorn kalyagal kadak noonroo miyal-bwora, wa?
5 Noonook dal-koodjal, koryat boorn wort-barrang noonroo miyalyen. Karro noonook boorda kwabba djinang kidji noonook dalba kayar djabban noonang ngooniyang miyalyen.
6 Yoowart yangka noolonga koranyi dwerda-k. Yoowart kwardo noonookang bedowan dwordoka-k. Bainya noonook bedowan kwardo dwordoka-k, baalap boorda kana baalapany nano-bwora.
7 Bayinya noonooka Boolanga-Yirayang djooratang waangki, Boolanga-Yira boorda-yanga noonookany. Nginda moortaman dorl-dorl Boolanga-Yira beederang, Boolanka-Yira boorda-yalgarany.
8 Narl nginda moortaman Boolangka Yira waangki; Boolangka Yira boorda-yanga baalany. Nginda moortaman dorl-dorl Boolangka Yira beederang, Boolangka-Yira boorda-yalgaran baalany.
9 Bayinya noonang nop mereny waangki, alidja kenyal boorda-yanga boya-yal, wa?
10 Ka bayinya baal waangki djil-djilany, noonooka boorda-yanga baalany wargil, wa?
11 Noonook wara-any, bayinya noonooka kaaditj moorditj noolonga noonookang koorlanga yanga. Ngarl, noonang Maaman Boolangka-Yirakang Boodjer, Baal boorda-yanga boola-ngatti moorditj noolonga nidja- nidjayan ngiyan Baalany waangki.
12 Noonooka djarnak don warma moortakang moodlooka noonooka koordook baalapany don noonooka. Nidja Karni nyinang Moses-ang Warriny wer Warda-Marridjinyakang kwadja-yakiny.
13 Bwora-koorl nooloo bida, yalga kabar bida wer koombaka djooroot, baalap ngardakul noyitj. Boola moortaman bwora- koorl alidja djooroot.
14 Narl nooloo bida wer koombarka djoorot, baalap bwora-koorl ngandabat, yalga keny-keny moorta djinbarranga alidja djooroot.
15 Balayi Warda-Karidjinywara. Baal boorak-koorl noonookany kookendjerriryang bwoka-yal, yalga bwora baalapang koorta, baalap mokiny-yang.
16 Noonooka baalapany boorda-kaaditj narl djildji baalap yidja. Moorta barrang kwonding mornitjayen, wa? Baalap yoowart barrang kamak marlakayen, wa?
...
17 War-djin, mandang moorditj boorna, baalap moorditj djildji-ya yidja, yalga boorna-wara djildji-ya-wara boorda-yidja.
18 Boorn moorditj yoowart djildji-wara kayar yidja. Boorn wara yoowart djildji moorditj kayar yidja.
19 Bayinya boorn djildji kwaba yoowart yidja, baalap boorn boorda kadjat. Kidji baalap boorn karla-bwora boorda kwarda.
20 Ngarl, noonooka djildji baalap-ang boorda djinang, kidji noonooka baalap boorda kaaditj.
21 Booli-ngati moorta nganyak waanka, “Birdiyar, Birdiyar.” Windji baalap boorda-koorl, wa? Boolangka Yirakang Boodja bwora, wa? Yoowart! Bainya moorta Boolangka Yirakak ala wer dwangka-don, arda baalap boorda bwora-koorl.
22 Kedal-la alidja, booli-ngati moorta nganyak boorda-waangka, “Birdiyar, Birdiyar, ngala noonang kolil waanka, wa? Ngala djenaka-wara noonang kolil yekany, wa?
23 Karo ngany baalapany mardayan boorda waranga, “Ngany noonookany yoowart kaaditj. Wort koorl ngany-ool, noonooka moortaman-wara!”
24 Yalga keny-keny moortaman nganyang waarda dwangka kidji baalap nidja-nidja nooloonga don. Baalap mamarap dwangka-boola mokiny. Baal baalang maya boya-k warn.
25 Kep ngarda koorl, bilya yira koorl wer mara nooyang kidji alidja maya bama. Yalga maya yoowart djabala, ngarl baal maya boya-k warn.
26 Nginda moortaman nganyang waarda dwangka kidji baalap nidja-nidja nooloonga yoowart don. Baalap dadan maamarap-mokiny. Baal baalang maya kwangkan-ak warniny.
27 Kep ngarda koorl, bilya yira koorl wer mara nooyang kidji alidja maya bama. Maya wara-djil djabala.
28 Nginda Jesus nganitj nidja-nidja noolonga waangkiny, boola moorta kai-kai narla baalang kaadadjan.
29 Narla nginda Jesus moortaman karni-waangka, baal mardayan moorta-mokiny waangka, yoowart Maamarapa-Warinyang-mokiny.